Antai Aika A Tataekina te Rongorongo ae Raoiroi?

“E na tataekinaki . . . n te aonnaba ni kabutaa.”​—MATAIO 24:14.

E TABE n tataekinaki te rongorongo ae raoiroi ni kabutaa te aonnaba irouia Ana Tia Kakoaua Iehova. A karaoa aei rinanon aanga aika kakaokoro. Te anga teuana bon rinanon . . .

Tataekinana. A kawariia aomata Ana Tia Kakoaua Iehova n tataekina te rongorongo ae raoiroi, n aron Iesu ma taan rimwina. (Ruka 8:1; 10:1) A aki taningaa kawaraia irouia aomata. Uarongorongoan Ana Tautaeka n Uea te Atua bon te mwakuri ae a bane ni karaoia taani Kakoaua aika raka i aon itua te mirion mwaitiia. A uarongorongo man te auti teuana ma teuana, irarikin te kawai, n te tareboon, ao n aanga riki tabeua. A a tia naba taani kakoaua ni kabanea te aoa ae raka i aon teuana ma te iterana te birion n te ririki ae nako n te mwakuri aei.

A aki tii reiakinia aomata taekan Ana Tautaeka n Uea te Atua ma a reiakinia naba “bwaai ni kabane ake [e] tua [Iesu].” (Mataio 28:20) A katoatai ni kairi reirei man te Baibara aika raka i aon wanua te mirion n aia auti aomata n aki kabooaki.

A uarongorongo ni katobibia te aonnaba taani Kakoaua n aaba aika 236 mwaitiia. A reireinia aomata aika kakaokoro nako aroia. A uarongorongo n te aba ao te kaawa, buakonikain Amazon ao Siberia, rereuan Aberika ao Maunga aika taian Himalaya. A aki kabooaki ni karaoan te mwakuri aei, ma a kamanenai oin aia mwane ao aia tai mani kaungaan nanoia n tangiran te Atua ao raoia. A kabutaa nako te rongorongo ae raoiroi rinanoni . . .

Beeba ni Kaongora. E boreetiaki ngkai te maekatin aei, ae bwaninin arana Te Taua-n-Tantani ae Tataekina Ana Tautaeka n Uea Iehova, nakon taetae aika 185 mwaitiia ao e tibwatibwaaki katotoni maekatin aikai ni kabane n te mwaiti ae raka i aon 42 te mirion. Iai te maekatin irarikin aei ae te Awake! are e tataekina naba te Tautaeka n Uea ae boreetiaki n taetae aika 83 mwaitiia ao e tibwatibwaaki katotona ni kabane n te mwaiti ae tao 40 te mirion.

Iai naba booki, boroutia, turaeki, CD/MP3, ao DVD aika a katauraoaki ake a kabwarabwarai reirei man te Baibara n taetae aika 540 tabuni mwaitiia. A a tia taani Kakoaua ni katauraoi ao n tibwatibwai nako baikai n te mwaiti ae riaon 20 te birion i nanon tebwina te ririki n nako, ao e katautauaki bwa tao kaka tenua te maekatin i aon temanna te aomata n te aonnaba!

A a tia naba Ana Tia Kakoaua Iehova ni boreeti ao ni kabooa boreetian rairai aika kakaokoro ibukin te Baibara. E a tia n rairaki te Baibara ae Te Baibara ae Tabu Te Rairai ae te Aonnaba ae Boou, e boreetiaki ao n tibwatibwaaki nako irouia taani Kakoaua ao e a tauraoi ngkai ni bwanin ke n tii te iterana n taetae aika 96 mwaitiia. E riaon te mwaiti ae 166 te mirion katoton te Baibara aei ake a a tia n tibwatibwaaki nako. A tibwaa nako naba te rongorongo ae raoiroi ibukin te Tautaeka n Uea taani Kakoaua rinanon . . .

Bobotaki ni Kristian. A kakaraoaki botaki n Taabo n Taromauri tiaki tii ibukin te nebonebo; ma a baireaki naba ibukin te reirei. A karaoaki kabwarabwara i aon reirei aika boto man te Baibara, ao e reiakinaki te Baibara rinanon te maekatin ae Te Taua-n-Tantani ao booki riki tabeua aika aanaki n te Baibara. A reiakinaki taani Kakoaua ni bobotaki aikai bwa a na mwaatai riki n tataekina te rongorongo ae raoiroi.

Titeboo te reirei ae a reiakinaki iai taani Kakoaua n ekaretia aika raka i aon 107,000 mwaitiia ni katobibia te aonnaba, ike e a boutokaaki iai katiteuanaakia. A butimwaeaki aomata ni kabane nakoni botaki aikai. Akea te karemwangko iai. Ni koauana, a na akea nanoni mwakuri ni kabane aikai ngkana a kabwaka taani Kakoaua ni maiuakini baike a tataekin nakoia aomata. Ngaia are a a kataia ni kaotiota te rongorongo ae raoiroi rinanon . . .

Aia Katoto. A kakorakoraia ni maiuakina te aroaro ni Kristian ae moani baan te raoiroi, ni karaoan aia kabanea n raoiroi nakoia aomata nako n aron are a tangiria bwa e na karaoaki naba nakoia. (Mataio 7:12) E ngae ngke a aki kororaoi ao ni kabwaka n taai tabetai, ma a korakora nanoia ni kani karaoi mwakuri n tangira nakoia aomata nako, tiaki tii rinanon tataekinan te rongorongo ae raoiroi ma a karababaa nako naba aia ibuobuoki n aanga riki tabeua.

A aki kataia Ana Tia Kakoaua Iehova ni bita te aonnaba rinanon aia uarongorongo. Ma ngkana e a tia ni karaoaki te mwakuri n aron are e tangiria Iehova, e na roko naba iai te toki n aron are e taetae ni burabetinna Iesu. Tera nanon anne ibukin te aonnaba ao aomata?

[Taamnei n iteraniba 7]

E tabe n tataekinaki te rongorongo ae raoiroi ni kabutaa te aonnaba irouia Ana Tia Kakoaua Iehova