Iesu—Aroni Maiuna

E BATI ae kaotaki ibukin te bae kaatuua ni maiuna Iesu n tein ana taeka akana oti i eta. A a tia ni mwamwananga Iesu ma taan rimwina rinanoni kaawan Tamaria ae tabukibuki man te ingabong ni karokoa te tawanou. (Ioane 4:6, te kabwarabwara mai nano) A iangoia taani rimwina bwa tao e a baki ngkai, ao a anganna teutana te amwarake. (Ioane 4:31-33) Ni kaekaan anne, e taekina ana kantaninga Iesu ibukini maiuna n te aro ae kimototo. E kakawaki riki irouna karaoan ana mwakuri te Atua nakon te amwarake. E maiu Iesu ibukini karaoan nanon te Atua n ana taeka ao n ana mwakuri. Baikara baika irekereke iai?

Uarongorongoan ao reiakinan Ana Tautaeka n Uea te Atua

E kabwarabwaraaki n te Baibara ana mwakuri Iesu ake e karaoi ni maiuna ni kangai: “E kabutaa Kariraia n angareirei . . . ao n tataekina te rongorongo ae raoiroi ibukin te tautaeka n uea.” (Mataio 4:23) E aki tii uarongorongo Iesu ke n tataekina Ana Tautaeka n Uea te Atua nakoia aomata. E reiakinia naba aomata n anganakia te kaetieti ao e kabwarabwarai ao ni kakoauai rinanon reirei aika raraoi. Te boto n iango n ana rongorongo Iesu bon te Tautaeka n Uea.

N ana tai ni mwakuri ni minita Iesu ni kabane, e reireinia ake a ongora taekan Ana Tautaeka n Uea te Atua, ao te bwai ae e na karaoia. Nori koaua aika mai i nano ibukin te Tautaeka n Uea n ikotaki naba ma kibun te Baibara aika kaotaki ake ti a ataa iai ana taeka Iesu n te reirei aei.

• Ana Tautaeka n Uea te Atua bon te tautaeka ae mena i karawa ao bon Iesu are e a tia n rineaki iroun Iehova bwa e na Uea iai.​—MATAIO 4:17; IOANE 18:36.

• E na katabuaki aran te Atua n te Tautaeka n Uea aei ao ni kakororaoaki iai nanona n te aonnaba n aron are i karawa.​—MATAIO 6:9, 10.

• E na bitaki te aonnaba ni kabane nakon te bwaretaiti i aan Ana Tautaeka n Uea te Atua.​—RUKA 23:42, 43.

• E na waekoa n roko Ana Tautaeka n Uea te Atua ao e na kakororaoa nanon te Atua ibukin te aonnaba.a​—MATAIO 24:3, 7-12.

Karaoani kakai

E ataaki Iesu bwa “te tia Reirei.” (Ioane 13:13) Ma e karaoi naba kakai tabeua n ana tai ni mwakuri ni minita ae maanna tenua ma te iterana te ririki. A ibuobuoki mwakuri aikai ibukini kantaninga aika uoua. Te moan, a kakoauaa bwa e boni kanakoaki iroun te Atua. (Mataio 11:2-6) Te kauoua, a kaotaraei bannani baika e na karaoi n te aro ae korakora riki n taai aika a na roko, ngkai te Uea ngaia n Ana Tautaeka n Uea te Atua. Nori kakai tabeua ake e a tia ni karaoi.

• E katoka buakan taari ao e boaa te ang ae korakora.​—MAREKO 4:39-41.

• E kamarurungia aoraki, n ikotaki naba ma bonotaninga, mataki ao mwauku.​—RUKA 7:21, 22.

• E kabatiaa te amwarake ni kaamwarakeia te koraki ake a baki.​—MATAIO 14:17-21; 15:34-38.

• E kautiia maate n taai aika tenua.​—RUKA 7:11-15; 8:41-55; IOANE 11:38-44.

Iangoa aron te maiu i aan ana kairiri te Uea ae korakora aio!

Kaotaraean aroaron Iehova ae te Atua

N reiakinaia tabemwaang ibukin Iehova, akea ae rabakau riki nakon Natin te Atua, are e a ataaki ngkai bwa Iesu Kristo. Ngkai Iesu “te moanibung i buakoni baika karikaki ni kabane,” e a kamani maeka irarikin Iehova i karawa, ao ni maan riki nakoia anera ake tabemwaang. (I-Korote 1:15) Iangoi taai ake e reke iai angana ni karin ana iango Tamana, ao n reiakina nanona, ana kaetieti ao kawaina nako.

E bon eti ana taeka Iesu ae kangai: “Akea ae ataa te Nati ma e tii ataia te Tama, ao akea ae ataa te Tama bwa tii te Nati ae e ataia, ao ane e kani kaotia te Nati nakoina.” (Ruka 10:22) Ni menan Iesu i aon te aba, e kukurei ao e ingainga nanona ni kaotiota raoi aroaron Tamana. E taetae Iesu ao n reirei n te iango ae okoro; e kabonganai baike e uringi ake e karekei n te moan tai n te aba n taamnei ao n te aro ae rine i matan te Atua ae Moan te Rietata.​—Ioane 8:28.

E kona ni kaikonakaki te bwai ae karaoia te transformer ma te baere e karaoia Iesu ibukini kaotaraean Tamana. E kona te bwai aei ni kamanena te iti ae korakora ao ni bita korakorana ni kauarerekea bwa e aonga n tau ni kabonganaaki irouia angiia taani kamanena. Ni menan Iesu i aon te aba, e uotii baike e a tia n reiakin i karawa ibukin Tamana ao e angania aomata aika mangori i aon te aba n aaro aika kai oota ao ni bebete maiuakinaia.

Iangoi baika kakawaki aika uoua ake e kaotioti Iesu ibukin Tamana.

• N ana angareirei Iesu, e kaotiota te koaua ibukin Iehova, arana, ana kantaninga ao kawaina nako.​—IOANE 3:16; 17:6, 26.

• E kaotiotii aroaron Iehova aika raraoi aika bati Iesu n ana mwakuri. E kaotiotii aroaron Tamana Iesu n te aro ae kororaoi ao e a kona iai ni kangai: ‘Ngkana kam kani kinaa Tamau ao tii tarataraai.’​—IOANE 5:19; 14:9.

Ti rangi ni mimi n aroni maiun Iesu. Akea tiani kakabwaiaakira ngkana ti nenera bukini matena ao ngkana ti kaboraoi maiura ma ae ti reiakinna.