Ana Tautaeka N Uea Te Atua​—Bukini Kakawakina Iroun Iesu

N aron ae taekinaki n te kaongora are imwain aei, e kaatuua maiuna Iesu “n tataekina te rongorongo ae raoiroi ae taekan ana tautaeka n uea te Atua.” (Ruka 8:1) E kakorakoraa n ririanna bubua ma bubua te maire rinanon te aba ae Iteraera bwa e aonga n reiakinia aomata taekan Ana Tautaeka n Uea te Atua. A koreaki rongorongon ana mwakuri ni minita Iesu n Euangkerio aika aua, ake a taekinaki iai taekan te Tautaeka n Uea 100 tabun te tai. A noraki angiin rongorongo akanne n ana taeka Iesu, ma e ngae n anne a riai n taekina tii teuana mwakoroni bwaai ni kabane ake e taekin ibukin Ana Tautaeka n Uea te Atua!​—Ioane 21:25.

Bukin tera bwa e rangi ni kakawaki iroun Iesu te Tautaeka n Uea ngke e mena i aon te aba? Bukina teuana, e ataia ae e a tia te Atua n rineia bwa ngaia ae e na Tautaeka iai. (Itaia 9:6; Ruka 22:28-30) Ma e aki kaatuua iangoan rekeni mwaakana ke neboakina. (Mataio 11:29; Mareko 10:17, 18) E aki karikirakea te Tautaeka n Uea ibukini kakabwaiaana. Ma ae kakawaki riki iroun Iesu, e mutiakina Ana Tautaeka n Uea te Atuaa rimoa ao ngkai naba ibukin te bwai are e na karaoaki iai ibukia te koraki ake e tangiriia, ae Tamana i karawa ao taan rimwina aika kakaonimaki.

TE BWAI AE NA KARAOIA TE TAUTAEKA N UEA IBUKIN TAMAN IESU

E rangi ni korakora ana tangira Iesu ibukin Tamana are i karawa. (Taeka N Rabakau 8:30; Ioane 14:31) E karinei aroaron Tamana aika anainano n aron Ana tangira, Ana nanoanga ao Ana kaetitaeka ae riai. (Te Tua-Kaua 32:4; Itaia 49:15; 1 Ioane 4:8) Ni koauana, e riai Iesu n ribai keewe aika butanako ibukin Tamana, n aron are aongkoa e aki tabeakin rawawataia aomata te Atua ao e tangirira te Atua bwa ti na rawawata. Aei bukina teuana ngkai e ingainga Iesu n tataekina “te rongorongo ae raoiroi ibukin te tautaeka n uea” ngkai e bon ataia bwa n te tai ae imwaira, e na kaitiakaki taekan Tamana n te Tautaeka n Uea. (Mataio 4:23; 6:9, 10) E na kangaa ni karaoaki anne?

E na karaoi bitaki aika bubura Iehova ake a na kakabwaiaaki iai botannaomata rinanon te Tautaeka n Uea. “E na kaoa te rannimata ni kabane” mai mataia aomata aika kakaonimaki. E na katoki baika a karika te tang Iehova ao n taraia raoi bwa “e nang akea riki te mate, ke te nanokawaki ke te tang ke te maraki.” (Te Kaotioti 21:3, 4) E na kamaunai karawawata ni kabane nakoia aomata te Atua, rinanon te Tautaeka n Uea.b

Maroaka are e ingainga Iesu n tataekina te Tautaeka n Uea nakoia aomata! E ataia ae e na boni kaotaki iai aron raoi mwaakan ao ana nanoanga Tamana. (Iakobo 5:11) E ataia naba Iesu bwa a na kakabwaiaaki aomata ake e tangiriia ake a kakaonimaki man te Tautaeka n Uea anne.

TE BWAI AE NA KARAOIA TE TAUTAEKA N UEA IBUKIA AOMATA AIKA KAKAONIMAKI

E a kamani maiu i karawa Iesu irarikin Tamana imwain rokona i aon te aba. E kabongana Natina te Tama bwa e na karikii bwaai ni kabane ni moa mani bwaini karawa aika kamimi n aron itoini karawa ma nna n itoi aika mwaitikurikuri n ara buraneti ae tikauarerei aei, n ikotaki naba ma baika maiu ni kabane. (I-Korote 1:15, 16) Ma ae moan te kakawaki riki iroun Iesu, e rangi ni “kukurei” irouia aomata.​—Taeka N Rabakau 8:31, BG.

E kaotiota tangiraia aomata Iesu n ana mwakuri ni minita. N te moantai are e karaoa iai anne, e kamataataa raoi bwa e roko i aon te aba bwa e na “tataekina te rongorongo ae raoiroi” nakoia kainnano. (Ruka 4:18) Ma e karaoa ae bati riki nakon tii taekinan aroni buokaia aomata. E aki toki ni kaotiota ana tangira nakoia botannaomata. N te katoto, ngke a kawara Iesu te koraki ae uanao bwa a na ongora irouna, e “nanoangaiia, ao e kamarurungia aia aoraki.” (Mataio 14:14) Ngke e kaotiota ana onimaki te mwaane are e rangi ni maraki n aorakina n taekinan ae e kona ni katoka aorakina Iesu ngkana e kani karaoia, e bon rotaki Iesu n ana taeka teuanne. E nanoangaa te mwaane aei ao e katoka aorakina ngke e tuangnga ni kangai: “I kani karaoia. Ko na itiaki.” (Ruka 5:12, 13) Ngke e nora raoraona Iesu are Maria n tanginiweneia mwanena are Rataro, e “ngirangira Iesu i nanona,” “e rawawata nanona,” ao ‘a tiinako rannimatana.’ (Ioane 11:32-36) Imwin anne, e karaoa te bwai ae aki kona ni kakoauaaki ngke e kauta Rataro man te mate, e ngae ngke e a tia ni mate aua te bong n nako!​—Ioane 11:38-44.

Ni koauana, e ataia Iesu bwa e na aki teimaan te kabebete are e karaoia n te tai arei. E ataia ae imwina riki ke n te tai ae waekoa, a na bane naake e kamarurungia ni manga aoraki ao a na manga mate naake e bane ni kautiia. Ma e ngae n anne, e ataia naba Iesu ae a na katokaki n aki toki aeka ni kangaanga akanne n Ana Tautaeka n Uea te Atua. Anne bukina ngke e aki tii karaoi kakai Iesu ma e kakorakoraa naba n “tataekina te rongorongo ae raoiroi ibukin te tautaeka n uea.” (Mataio 9:35) Boni bannani baika a na waekoa ni karaoaki n Ana Tautaeka n Uea te Atua ni kabutaa te aonnaba ana kakai ake e karaoi aika uarereke. Iangoi baika a beritanaki n te Baibara ibukin te tai anne.

• E na akea riki te aoraki.

  “A na kaureaki iai mataia akana mataki, ao a na kaukaki taningaia akana a bono taningaia. Ane e na ewewe iai te mauku n ai aron te ria, ao e na anene ni kimareirei newen ane e bae newena.” N ikotaki naba ma anne, “ane maeka iai e na aki kangai, I aoraki.”​—Itaia 33:24; 35:5, 6, BG.

• E na akea riki te mate.

  “A na abana te aba akana raoiroi, Ao a na mamaeka iai n aki toki.”​—Taian Areru 37:29, BG.

  “E oongaki te mate i Rouna n aki toki; ao E na kaoi rannimata te Uea ae Iehova mani maata ni bane.”​—Itaia 25:8, BG.

• A na manga kautaki naake a a tia ni mate.

  “A na bane iai n ongo bwanaana aomata ake a mena i nanon taian ruanimate, ao a na otinako.”​—Ioane 5:28, 29.

  ‘E na boni iai te mangauti.’​—Mwakuri 24:15.

• A na reke mwengaia ke aia mwakuri.

  “Ane a na katei auti, ao a na maeka i nanoia; ao a na uniki kurebe, ao a na kang uaaia. A na aki katea ae e na maeka i nanona temanna; a na aki unika ae e na kana uaana temanna: . . . ao au koraki aika rineaki a na kamaania ni bwain aia makuri baiia.”​—Itaia 65:21, 22, BG.

• E na akea riki te buaka.

  “E katoki buaka, ao tokina tabon aonaba.”​—Taian Areru 46:9, BG.

  “A na aki tabeka te kabaang te botanaomata teuana ni buakana te botanaomata teuana, ao a na aki manga reireiia te buaka.”​—Itaia 2:4, BG.

• E na bati te amwarake.

  “E kariki uaana aontano: E na kakabaiaira te Atua, ae bon Atuara.”​—Taian Areru 67:6, BG.

  “E na bati te uita i aon te aba i aon taubukini maunga.”​—Taian Areru 72:16, BG.

• E na akea riki te maiu ni kainnano.

  “A na aki mamanuokaki n aki toki akana a kai nanoia.”​—Taian Areru 9:18, BG.

  “E na kamaiua ane e kai nanona ngkana e bubuti; Ma ane akea ana bwai, ane akea te tia buokia. Ane E na nanoangaiia akana mamara ma akana a kai nanoia, Ao E na kamaiu tamneiia akana a kai nanoia.”​—Taian Areru 72:12, 13, BG.

Ko kona n nora bukina ngkai e rangi ni kakawaki iroun Iesu te Tautaeka n Uea, ngkana ko iaiangoi berita akanne ni kaineti ma Ana Tautaeka n Uea te Atua? Ni menana i aon te aba, e ingainga n tataekina Ana Tautaeka n Uea te Atua nakoia aomata nako ake a kukurei n ongora, bwa e ataia ae a na katokaki kangaanga ni kabane aika karawawata aika ti nori ni boong aikai n te Tautaeka n Uea anne.

E anaaki nanom ni berita aika n te Baibara ibukin te Tautaeka n Uea? Ngkana ngaia anne, ko na kangaa n reiakina ae bati riki ibukin te Tautaeka n Uea anne? Ao tera ae ko kona ni karaoia bwa ko na taraia raoi ae ko na karekei kakabwaiaam mai iai? A na kaekaaki titiraki akanne n te kabanea ni kaongora aika karinanaki teuana imwin teuana.