Iesu—Bukini Matena

E ATAA te bae e na riki Iesu. E ota naba bwa e na akea te rau ni maiuna. Ni kaitaraan anne, e ataia bwa e na karina ni kabuanibwai maiuna ngkana e koro 30 ana ririki ma e bon tauraoi ni mate.

E taekinaki n te Baibara bwa e rangi ni kakawaki maten Iesu. E taekinaki n te boki teuana bwa e mwaneweaki maten Iesu tao 175 te tai n te Koroboki ni Kristian ae Tabu n te Taetae ni Kuriiti ke te Nu Tetemanti. Ma e aera ngkanne ngkai e na kammarakaki ao imwina e na mate? Ti riai n ataia, bwa e na kona n rangi n rotaki maiura ni maten Iesu.

Baike e atai Iesu bwa a na riki

N ana kabanea n ririki ni maiu Iesu, a bati taai ake e kauringia iai taan rimwina ibukini karawawataana ao matena n taai ake i mwaina. Ngke e mwananga nako Ierutarem ibukini kaean te Toa ae te Riao ae ana kabanea n tai, e tuangia ana abotoro ake 12 ni kangai: “E na tauaki iai Natin te aomata nakoia mataniwi n ibonga ao taani koroboki, ao a na kabuakakaa nakon te mate, ao a na angania aomata aika tiaki I-Iutaia, ao a na bwainingareia, ao a na bawareia ma ni kataerea ma ni kamatea.”a (Mareko 10:33, 34) E aera ngkai e kakoauaa raoi te baere e na riki nakoina?

E rangi n atai taetae ni burabeti aika bati Iesu aika n te Baibara n Ebera ake a taetae ni burabetinaki iai aron tokini maiuna. (Ruka 18:31-33) Iangoi taetae ni burabeti tabeua n ikotaki ma kiibu riki tabeua n te Baibara aika kabwarabwaraa aroni kakoroani bukia.

E a kaman taekinaki te Mesia bwa e na . . .

• Kamwaneaki ibukin 30 te mwakoro n tirewa.​—TEKARIA 11:12; MATAIO 26:14-16.

• Oreaki ao ni bawareaki.​—ITAIA 50:6; MATAIO 26:67; 27:26, 30.

• Tauraki.​—TAIAN ARERU 22:16; MAREKO 15:24, 25.

• Kabuakakaaki ngke e tine i aon te kai.​—TAIAN ARERU 22:7, 8; MATAIO 27:39-43.

• Kamateaki n akea rina teaina ae mwaoto.​—TAIAN ARERU 34:20; IOANE 19:33, 36.

E kakoroi bukin taetae ni burabeti aikai Iesu ao a a bati riki. Akea te anga ae kona ni karaoa aei iai i bon irouna. E kakoauaaki bwa e boni kanakoaki iroun te Atua ni kakoroan nanon taetae ni burabeti aikai irouna.b

E aera ngkanne bwa e riai karawawataan Iesu ao matena?

E mate Iesu ibukini kaekaan titiraki aika kakawaki

E atai raoi titiraki ake a tabekaki n te onnaroka are i Eten aika kakawaki ibukia aomata ni kabane. Ni kaririakia Atam ao Ewa iroun te anera ae karitei aei, a a rineia bwa a na aki ongeaba iroun te Atua. N aia karitei te taanga aei, a kananououaa iai riain te Atua n tautaeka ke ana waaki n tautaeka. E tabekaki te titiraki ibukin aia bure bwa tao a kona n teimatoa ni kakaonimaki aomata nakon te Atua ngkana a kataaki ke a aki.​—Karikani Bwaai 3:1-6; Iobi 2:1-5.

E anga Iesu te kaeka ae aki kona ni kakeweaki nakon titiraki aikai ibukin ana tautaeka Iehova ao aia kakaonimaki aomata. Ibukin ongeaban Iesu ae kororaoi e a “kataua matena . . . i aon te kai ni kammaraki,” ao e boutokaa ana tautaeka te Atua. (I-Biribi 2:8) E kaotia naba Iesu bwa e kona te aomata ae kororaoi ni kateimatoa kororaoini kakaonimakina nakon Iehova n aki ongei kataaki aika rangi n rawawata.

E mate Iesu ibukini kamaiuaia aomata

E taetae ni burabetinna Itaia bwa kammarakan ao maten te Mesia are e beritanaki, bon ibukini kabwaraan aia bure aomata. (Itaia 53:5,10) E ataa raoi aei Iesu ao e tauraoi n anga “maiuna bwa te kaboomwi ibukia aomata aika bati.” (Mataio 20:28) E kareana maiuna ibukia aomata aika aki kororaoi bwa a aonga ni karekea aia iraorao ae kaan ma Iehova ao ni kamaiuaki man te bure ao te mate. Ni maten Iesu, e a anganira iai ara tai ni manga karekea te baere a kabuaa Atam ao Ewa, ae te kantaninga ibukin te maiu are e aki toki n te aonnaba ae a kororaoi bwaai ni kabane iai.c​—Te Kaotioti 21:3, 4.

Te bae ko kona ni karaoia

Ni kaongora aikai teuana i mwin teuana, ti a tia n nenera ana taeka te Baibara ibukin Iesu n aron te tabo are e roko mai iai, aroni maiuna ao bukini matena. N ataakini koaua akanne ibukin Iesu, e bati ae ti kona n ota iai nakon tii kaetan iango aika kairua. Ti kona ni karekei kakabwaiaara ni maiuakinan ae boraoi ma koaua aikai n aron te maiu ae raoiroi ngkai, ao te maiu ae akea tokina n taai aika imwaira. Ti tuangaki n te Baibara baika ti riai ni karaoi ni karekeani kakabwaia aikai.

• Reiakina ae bati riki ibukin Iesu Kristo ao mwiokoana n ana kantaninga Iehova.​—IOANE 17:3.

• Kaotiota onimakinan Iesu ni butimwaean ae boni ngaia am tia Kamaiu n aroaroni maium.​—IOANE 3:36; MWAKURI 5:31.

A kukurei Ana Tia Kakoaua Iehova ni buokiko n reiakina ae bati riki ibukin Iesu Kristo, ae Natin te Atua “ae te rikitemanna” are ti kona ni karekea mairouna te bwaintangira ae te “maiu are aki toki.”​—Ioane 3:16.