“Te Mataniwi ae Moan te Raoiroi Aroarona ao te Rao ae Rangi n Tangiraki”

E TOKI maiun John (Jack) Barr ae kaain te Rabwata n Tautaeka ibukia Ana Tia Kakoaua Iehova, n ingabongin te Kaonobong ae 4 n Ritembwa 2010. Ai 97 ana ririki. E kakoauaaki teuaei bwa bon “te mataniwi ae moan te raoiroi ao te rao ae rangi n tangiraki.”

E bungiaki Brother Jack Barr i Aberdeen i Tikaoteran, teniman ngaiia irouia aia karo, ao boni ngaia te bina. Boni Kristian aika kabiraki ana karo. E aki toki Brother Barr n taekina moan rikirakena n ana utu, ao e rangi ni kakaitau ibukin aia katoto ae moan te raoiroi ana karo aika tangiraki.

Ngke ai tebwi tabun ana ririki Jack, ao e a moanna n namakinna bwa moan te kangaanga irouna kataetaeakia aomata ake e aki kinaia. Ma e ngae n anne, e mwakuri korakora bwa e aonga n tokanikai i aon ana kangaanga aei, ao ni bwakantaain te Taabati teuana n 1927 ngke ai 14 ana ririki, ao e a tuanga tamana bwa e a tauraoi n raonna n te mwakuri n uarongorongo n te auti teuana ma teuana. E a boni moana iai ana beku ibukin Iehova, are e a tia ni karaoia i nanon te tai ae maan. E teimatoa n riki Brother Barr bwa te tia tataekina te rongorongo ae raoiroi ae ingainga nanona man te bong anne ni karokoa matena.

E a kairaki te roro n rikirake ae Jack bwa e na iaiangoa raoi te kantaninga ibukin te maiu man te kabuanibwai ae kananokawaki ike e a kuri ni bua iai maiun tinana, ao n 1929 e a katabua maiuna nakon Iehova ni kaota iai ana katabu n te moantai are e a angaraoi n 1934. Imwina n 1939, e a riki bwa kaain te utu ni Betaera i Lon­don i Engiran. Mai ikanne are e a moana iai kabwaninan ana tai ni mwakuri ae waakinako i nanon 71 te ririki.

N 29 n Okitobwa n 1960, e a moana te bwai are e atongnga Brother Barr bwa “te iraorao ae rangi ni kakawaki” ngke e mare ma Mildred Willett, ae te bwaiania ao te mitinare ae ingainga ni mwakuri i nanon te tai ae maan. A rangi n ataaki Brother ao Sister Barr bwa taanga ni mare aika a katea te banna ni katoto ae moan te tamaroa ibukin te itangitangiri i marenaia, ao a teimatoa n aroia anne ni karokoa tokini maiun Mildred n Okitobwa 2004. A kaai ni wawareka mwakoron te Baibara Brother ao Sister Barr ni katoabong i nanon tekatekaia n taanga.

Ibukia ake a kinaa teuaei, ngkana a ongo te ara ae Jack Barr, a kauringaki iai taekan te mwaane are e anganga te taeka n reirei ma te atataiaomata n aroni bwainan te iango ae riai ao te akoi n taai nako, ao e boto raoi ana iango i aon te Baibara. E mwakuri korakora ao bon te mataniwi ae atataiaomata ao ni mwamwannano ao bon te rao ae kakaonimaki ni koaua. E kaotaraeaki korakoran tangiran te koaua ao kaanin ana iraorao ma Iehova n ana taetaenikawai, ana kabwarabwara, ao ana tataro.

E ngae ngke ti nanokawaki bwa ai akea i rarikira raora ae tangiraki iroura ae Brother Barr, ma ti kukurei bwa e a tia ni karekea te bwaintangira ae te aki mamate, ae te kakabwaia are e kantaningaia ao n tataekinna n taai nako. Bon tii anne te bwai ae e rangi n tangiria.​—1 I-Korinto 15:53, 54.a

[Kabwarabwara ae nano]