Te Rongorongo Ae Raoiroi Ibukia Kainnano

E KARAUI nanora Ana Taeka te Atua aei: “A na aki mamanuokaki n aki toki akana a kai nanoia.” (Taian Areru 9:18, BG) E taekinaki naba ae kangai n te Baibara ibukin ara tia Karikiriki: “Ko kaurea baim, Ao Ko kabaneia akana maiu ni kanuaiia n te bwai ae a tangiria.” (Taian Areru 145:16, BG) Bon tiaki tii te mii te kantaninga ae taekinaki n Ana Taeka te Atua. E kona te Atua are Moan te Mwaaka ni karekea te bwai ae kainnanoaki ibukini katokan te maiu ni kainnano. Tera ae a kainnanoia aika kainnano?

E taekinna te tia tikona kaubwain te aba ae kaain Aberika bwa n etina, a boni kainnanoa aia “tia tautaeka ae atataiaomata” aaba aika aki kaubwai. Te bae nanonaki iai, e tangiraki temanna ae iai mwaakana bwa e na karaoi bitaki aika a na katoka te maiu ni kainnano ao n irianaki ma mwakuri n akoi. Ti kona naba n taekinna bwa te tia tautaeka are e kona ni katoka te maiu ni kainnano irouia aomata nako, e riai n riki bwa te tia tautaeka n te aonnaba ibukina bwa iai aaba aika kaubwai ao iai naba aika aki kaubwai ni katobibia te aonnaba. Irarikina, te tia tautaeka ae e kona ni katoka te maiu ni kainnano, e na kona ni karaoa te bwai teuana ibukin te bwai ae karika te maiu ni kainnano ae bon anuaia aomata ae te kani kakaraoi oin nanoia. E na reke ia te tia tautaeka ae raoiroi aei?

E kanakoaki Iesu nako aon te aba iroun te Atua bwa e na tataekina te rongorongo ae raoiroi ibukia kainnano. E kangai Iesu ngke e teirake ni wareka mwiokoana mairoun te Atua: “E anganai taamneina Iehova, bwa e kabirai bwa N na tataekina te rongorongo ae raoiroi nakoia kainnano.”​—Ruka 4:16-​18.

Tera te Rongorongo ae Raoiroi?

E a bon tia te Atua n rinea Iesu bwa te Uea. Ni koauana bon anne te rongorongo ae raoiroi. Bon te tia Tautaeka ae kororaoi ae e na katoka te maiu ni kainnano ibukina bwa (1) e na tautaeka i aoia botannaomata nako ao bon iai mwaakana ni karaoa aei; (2) e nanoangaiia aika kainnano ao e reireinia taan rimwina bwa a na tabeakinia, ao (3) e kona ni kamauna te bwai are e karika te maiu ni kainnano, ae rikiara ae te kani kakaraoi oin nanora. Ti na neneri ngkai kanoan te rongorongo ae raoiroi aika tenua.

1. Mwaakan Iesu n tautaeka i aoia natannaomata nako E taekinaki ae kangai ibukin Iesu n Ana Taeka te Atua: “E anganaki te tautaeka . . . ba a aonga ni bane natanaomata, ma botanaomata, ma taian taetae, n toro i rouna.” (Taniera 7:14, BG) Ko kona n iangoi kakabwaia aika a na reke ngkana tii teuana te tautaeka ibukia botannaomata nako? A nang akea iai te kiriwe ao te kaiangatoa ibukini kaubwain te aonnaba. A na boraoi kakabwaiaaia aomata nako. E anga te karaunano Iesu bwa e na riki bwa te tia Tautaeka ae iai mwaakana n te aonnaba aei. E taku: “I a tia n anganaki te mwiokoaki i aoni bwaai ni kabane i karawa ao i aonnaba.”​—Mataio 28:18.

2. E nanoangaiia aika kainnano Iesu E kaotiota nanoangaaia akana kainnano Iesu n ana tai ni mwakuri ni minita ni kabane i aon te aba. N te katoto, e ringa kunnikain Iesu te aine are e a tia ni kabanei ana bwai ibukini kabooan ana bwainnaoraki ma kantaningaan marurungina iai. E nraraa neiei i nanon 12 te ririki ao akea te nanououa bwa e a reke irouna te akea n raraa ae kakaiaki. E kona neiei ni kabarekaia aomata ake e ringia ni kaineti ma te Tua. Ma e akoa neiei Iesu ao e taku: “Natiu, e kamarurungko am onimaki. Naako ma te rau, ao ko na marurung man aorakim ae kakaiaki.”​—Mareko 5:25-34.

Iai mwaakan ana reirei Iesu ni bitii nanoia aomata bwa a aonga n nanoangaia naba aomata. N te katoto, iangoa ana kaeka Iesu nakon te mwaane are e kan ataa arona ni kakukureia te Atua. E ataia te mwaane aei bwa e tangiria te Atua bwa ti na tangiriia raora ma e bon titirakina naba Iesu ni kangai: “Antai raou ae I riai n tangiria?”

Ni kaekaan aei iroun Iesu, e taekina te kabotau ae rangi n ataaki ibukin te mwaane are e bwatete mai Ierutarem n nako Ieriko are a kimoaaki ana bwai ni kabane ao ni kitanaki ngke “e a kani mate.” E bwatete n te kawai anne te ibonga temanna ao e taonnako n iteran te kawai are teuana. Ao ai aron naba te I-Rewi temanna. “Ma e toua te kawai anne te I-Tamaria temanna ao ngke e noria ao e korakora nanoangaana.” E kaitiakii manekana ao e uotia nakon te auti n iruwa ao e kabooa te tia tararuaa te tabo anne bwa e na kawakina teuare e ikoaki. E titiraki Iesu ni kangai: “Antai . . . are e karikia i bon irouna bwa raon teuare e kamwaruaaki?” Aio te kaeka: “Teuare e karaoa te mwakuri n nanoanga nakoina.” E a manga taku Iesu: “Karaoa naba aekakin anne.”​—Ruka 10:25-37.

A reiakin ana reirei Iesu aomata ake a a riki bwa Ana Tia Kakoaua Iehova ao a bitii aroaroia bwa a na buokiia te koraki ake a kainnanoa buokaia. N te katoto, e korea taekan aorakina te tia kororongorongo i Latvia n ana boki ae te Women in Soviet Pris­ons n ana tai ni mwakuri n aia kaembwa buure i Potma i nukan 1960 tabun. “A taningamarau ni mwakuri n au tai n aoraki neeti ake [taani Kakoaua]. I aki kona n tangira te mwakuri ni kuakua riki teuana irarikin aei.” E reitia ni kangai: “A iaiangoia Ana Tia Kakoaua Iehova bwa bon tabeia buokaia aomata nako n aki ongea te Aro ke te reeti.”

Ngke e a rangi ni kerikaaki aia karekemwane Ana Tia Kakoaua Iehova tabeman i Ancón i Ecuador, ibukin akean aia mwakuri ke aia bwakabwai, a a manga iangoa te anga teuana raoia aika taani Kakoaua are a na karikirake iai ibukia, ni katauraoa te amwarake bwa a na kaboonakoa nakoia taan akawa ake a akawa ni kangaina (n te taamnei ane n te atai). A bane n ibuobuoki kaain te ekaretia ao ataei naba. A moana katauraoan te amwarake man te aoa teuana n te karangaina ni katoabong, bwa e aonga n tauraoi imwain rororakeni booti n akawa n te aoa aua n te karangaina. A tibwatibwaa te mwane taani Kakoaua ae reke irouia nakoia raoia ake a kainnanoa buokaia ni kaineti ma bwaai ake a kainnanoi.

A kaotiotaki ni baika riki aikai bwa iai mwaakan ana katoto Iesu ma ana reirei ni bitii aroaroia aomata, bwa a na buokiia te koraki ake a kainnanoa buokaia.

3. Mwaakan Iesu ni bitii rikiaia aomata ae te bure Ti bane n ataa aroaroia aomata ae te kani kakaraoi oin nanoia ao ti kariaia naba. E taekinaki te aro anne n te Baibara bwa te bure. E korea naba ae kangai te abotoro Bauro: “I a kunea ngkanne te tua aei ni kaineti ma arou: bwa ngkana I kani karaoa ae raoiroi, ao e memena irou te buakaka.” E manga reitia ni kangai: “Antai ae na kamaiuai man te rabwata ae kairai nakon te mate aei? I kaitaua te Atua rinanon Iesu Kristo.” (I-Rom 7:21-25) Te bwai ae e nanonna n aei Bauro, bon aron te Atua ni kamaiuia taan taromauria ni koaua rinanon Iesu man rikiaia ae te bure, are teuana mai buakona bon te kani kakaraoi oin nanoia ae wakaan te bwai ae karika te maiu ni kainnano. E na kanga n riki aei?

Teutana te tai imwini bwabetitoan Iesu, ao e kabwarabwaraaki Iesu iroun Ioane te tia Bwabetito ni kangai: “Noria! ao aei ana Tiibutetei te Atua, ae kamaunai aia bure kaain te aonnaba!” (Ioane 1:29) E na waekoa ni kaonaki te aonnaba irouia aomata aika kainaomataaki man rikiaia ae te bure, ao te kani kakaraoi naba oin nanoia. (Itaia 11:9) E na kamauna te bwai are e karika te maiu ni kainnano Iesu.

Ai kakimwareireira iaiangoan te tai are a nangi bane iai aomata ni karekei baika a kainnanoi! E taekinaki ae kangai n Ana Taeka te Atua: “A na tekateka, temanna i aan ana kurebe ma ana biku, ao temanna i aan ana kurebe ma ana biku; ao akea ae na kamakuia.” (Mika 4:4, BG) A karioaki taeka aikai ni kabwarabwaraa te tai ae a nangi bane iai n toa aomata ma aia mwakuri aika a na rauaki iai, a na mweraoi, ao e na bati aia tai ni kimwareirei n te aonnaba ae ai akea iai te maiu ni kainnano, ike a a neboa iai Iehova.