TITIRAKI AIKA KAEKAAKI MAN TE BAIBARA
E kona n toki te maiu ni kainnano n te aonnaba?
E na kangaa te atua ni karokoa te aonnaba ae akea iai te maiu ni kainnano?—Mataio 6:9, 10.
A a tia ni mate mirion ma mirion aomata ni katoa ririki man aki taun te amwarake ao te aoraki. E ngae ngke iai aaba tabeua aika kaubwai, ma e riaon riki iterani mwaitiia kaain te aonnaba aei aika maiu ni kainnano. E kaotaki n te Baibara bwa a teimatoa ni maiu ni kainnano aomata.— Wareka Ioane 12:8.
E riai n iai te tautaeka teuana ae na tautaekana te aonnaba ao ni katoka te maiu ni kainnano.E riai te tautaeka anne n iai mwaakana n tibwatibwaa kaubwain te aonnaba, ao ni katoki buaka ae boton rikin te maiu ni kainnano.—Wareka Taniera 2:44.
Iai ae kona ni katokia?
E a tia te Atua n rinea Natina ae Iesu bwa e na tautaekania botannaomata. (Taian Areru 2:4-8) E na katoka te maiu ni kainnano, te karawawata ao te iowawa.—Wareka Taian Areru 72:8, 12-14.
E a kaman taetae ni burabetinaki bwa e na karokoa te rau ao te mweraoi n te aonnaba Iesu are te “Uea n Raoi.” A a kona ngkanne ni maeka aomata n oin aia auti, a na kimwareirei n aia mwakuri ao e na bati kanaia.—Wareka Itaia 9:6, 7, BG; 65:21-23.