Titiraki Aika Kaekaaki Man Te Baibara

Tera ae na karaoia Iesu n taai aika imwaira?

N 33 C.E. ao e mate Iesu, e uti mai buakoia maate ao e rierake nako karawa. E maan imwina ao e a anganaki Iesu te mwaaka n tautaeka bwa te Uea. (Taniera 7:13, 14) E na boni karaoa mwiokoana n Uea Iesu ni karekea te rau n te aonnaba n taai aika imwaira ao ni kamauna te maiu ni kainnano.—Wareka Taian Areru 72:7, 8, 13.

E na karaoi mwakuri aika kamimi Iesu ngkana e a riki bwa te tia Tautaekania botannaomata. E na boni kamanena mwaakana are e anganna Tamana ni kaoka aroia aomata ae kororaoi. A na karekea te maiu i aon te aba ao a na aki manga rikirake ni kara ma ni mate.—Wareka Ioane 5:26-29; 1 I-Korinto 15:25, 26.

Tera ae tabe ni karaoia ngkai Iesu?

E a tabe ngkai ni kaira aia waaki taan rimwina ni koaua n uarongorongo ni katobibia te aonnaba. A kawariia aomata ni kaota te bwai ae taekinaki n te Baibara ibukin Ana Tautaeka n Uea te Atua. E taekinna Iesu bwa e na teimatoa ni boutokaa aia mwakuri taan rimwina ni karokoa kamaunaakin aia tautaeka aomata n Ana Tautaeka n Uea te Atua.—Wareka Mataio 24:14; 28:19, 20.

E a tabe ngkai ni kaiririia aomata Iesu nakon te maiu ae raoiroi riki rinanon te ekaretia ni Kristian ae koaua. E na bon teimatoa ni kaiririia n taini kamaunaan te waaki ae ngkai i aon te aba ni karokoia n ana waaki ae boou te Atua i aon te aba are e beritanna.—Wareka 2 Betero 3:7, 13; Te Kaotioti 7:17.