TITIRAKI AIKA KAEKAAKI MAN TE BAIBARA

Tera te kantaninga ibukini manga okini Kristo?

Imwaini waeraken Iesu Kristo nako karawa n 33 C.E., ao e berita bwa e na manga oki. E boni kabotaua ma te aomata ae te bwaanuea are mwananga nako i nanon te tai ae maan ao n oki ma mwaakana n tautaeka bwa te uea. Te kantaninga ibukini manga okin Iesu, boni karekean te tautaeka ae raoiroi ibukia botannaomata.​—Wareka Ruka 19:​11, 12.

Tera rabwatani Kristo ngkana e a manga oki? E boni kautaki ma rabwatana ae aki kona n noraki ae te taamnei. (1 Betero 3:18) Imwina, e nako karawa ao n tekateka i angaatain te Atua. (Taian Areru 110:1) E maan imwin anne, ao e a kairaki Iesu nako matan Iehova ae te Atua, ae “Teuare Iai ma Ngkoangkoa,” are e anganna mwaakana n tautaeka i aoia botannaomata. Mangaia are e aki oki Iesu n rabwatana n aomata ma ai bon te Uea ae aki kona n noraki.​—Wareka Taniera 7:​13, 14.

Tera ae na karaoia Iesu ngkana e roko?

E na boni motiki taekaia botannaomata Iesu ma ana anera ngkana e roko ma rabwatana ae aki kona n noraki. E na kamaunaia aomata aika buakaka ma e na anga te maiu n aki toki nakoia te koraki ake a kariaia bwa e na Uea.​—Wareka Mataio 25:​31-33, 46.

E na boni bita te aonnaba Iesu nakon te bwaretaiti ngkana e a tautaeka bwa te Uea. E na kautiia maate bwa a aonga ni maiu i aon te aonnaba ae bwaretaiti.​—Wareka Ruka 23:​42, 43.