Iesu Kristo Tera Arora ae Riai Ibukin Ururingana?

A nonoraki taamnein Iesu ae te merimeri irouia aomata aika bati ni katobibia te aonnaba i nanon Ritembwa. E boni wene i nanon nneni kanaia maan, ae te bwaoki ae bubura ae kawakinaki iai te uteute ibukini kanaia maan. Ma e koaua bwa ti riai n ururinga Iesu bwa tii te merimeri?​—a Ti na maroroakina te anga ae kakawaki riki ibukin ururingana. Ti kona ni karekei reireiara iai man te bwai ae riki nakoia taani kawakintiibu ake a ikotaki n tawaana ake a uakaan ma Betereem n te tairiki teuana.

E karina ni kaoti te anera nakoia taani kawakintiibu. E tuangia ni kangai: “E a bungiaki ibukimi n te bong aei, te tia Kamaiu ae Kristo ae te Uea.” E tuangia naba te anera bwa ane a nora Iesu bwa e “niraki n te kunnikai ae te ninira, ae wene ni nneni kanaia maan.” Bon imwin naba anne, a a kaoti anera riki tabeman ao a a moanna ni “karaoiroa te Atua.”

Tera am namakin ngke arona bwa ko ongo aia anene anera ni karaoiroa te Atua?​— A boni kukurei taani kawakintiibu! A taku: “Ti a nako Betereem bwa ti na nora te baere riki ikekei.” N rokoia ikekei, a a nora “Maria ma Ioteba ao te merimeri ae wene ni nneni kanaia maan.”

N te tai ae waekoa, a a roko aomata riki tabeman i Betereem ike a a mena iai Maria ma Ioteba. Ngke a tuangaki naakai irouia taani kawakintiibu te bwai are e riki, a a bane ni mimi. Ko kukurei ngkai ko a atai baika kamimi aikai ibukin Iesu?​— Ti bane ni kukurei ngaira aika ti tangira te Atua. Ti na noria ngkai bwa bukin tera ngke e rangi ni korakora te kukurei ni bungiakin Iesu. Ni karaoan anne, ti riai n okirikaki nakon te tai are imwaini mareni Maria.

N te bongi teuana ao e a kawaraki Maria iroun te anera ae Kabiriera. E berita nakon neiei bwa e na riki natina ae “na kakannato ao e na aranaki bwa Natin Teuare Moan te Rietata.” E taku riki Kabiriera: “E na tautaeka bwa te uea . . . ao e na akea tokin ana tautaeka n uea.”

E kan ataia Maria bwa e na kanga n riki aei nakoina ngkai e tuai ni boo ma te mwaane. Mangaia are e kabwarabwaraa nakoina Kabiriera ni kangai: “E na rabuniko mwaakan Teuare Moan te Rietata,” ao “e na atongaki te nati are e bungiaki bwa e tabu, ae Natin te Atua.” Bon aei te kakai ae moan te kakannato ae anaakin Natin te Atua mai karawa ao karinani maiuna i nanoni biroton Maria bwa e na rikirake bwa te teei!

Ko a tia n nori taamnei ke kaotioti aika kaotaki iai “taani kaiwan itoi” aika teniman ake a kawara Iesu ma taani kawakintiibu?​— A rangi n nonoraki riki taamnei akanne n tain te Kiritimati. Ma a boni kairua. Bon taani kaiwan taai aika a na roko ao taani kakaraoi naba mwakuri aika kabuakakaaki iroun te Atua taani “kaiwan itoi” akanne. Ti na noria bwa tera ae riki ngke a a roko iroun te teei. E taekinaki ae kangai n te Baibara: “Ngke a rin n te auti, a nora te teei ma tinana ae Maria.” Ngaia are n te tai anne, ai tiaki te merimeri Iesu ae mena ni nneni kanaia maan, ma ai bon te teei ae maeka ma Ioteba ao Maria i nanon te auti!

E kanga n reke Iesu irouia taani kaiwan itoi?​— E kaiririia te “itoi,” tiaki nako Betereem, ma e kairiia moa nakon te Uea are Erote i Ierutarem. E kaotaki n te Baibara bwa e ukoukoraki Iesu iroun Erote ao e kani kamatea. Iangoa ngkai aei. N am iango, antai ae karaoa te bwai are e taraa n itoi ma ni kaiririia taani kaiwan taai aika a na roko nakon Erote?​— Bon te tia kairiribai ke te tia kakaaitara ae Tatan te Riaboro ma tiaki te Atua ae koaua ae Iehova!

Ni boong aikai, e kataia Tatan ni kairiia aomata bwa a na iangoa Iesu bwa tii te ataei ae akea te bwai ae kona ni karaoia. Ma e tuangaki Maria iroun te anera are Kabiriera ni kangai: “E na tautaeka bwa te uea . . . , ao e na akea tokin ana tautaeka n uea.” E a tautaeka ngkai Iesu bwa te Uea i karawa ao e na waekoa ni kamaunaia te koraki ni kabane ake a riribaa te Atua. Bon anne te bwai ae ti riai n ururingnga ibukin Iesu, ao ti riai ni kaongoia aomata nako.