Karekea Reireiam Man Ana Taeka Te Atua
E na Katea te Tautaeka Teuana te Atua ae na Tautaekana te Aonnaba ni Kabutaa?
A na rinanoaki titiraki aika ko bae n tia n tabeki n te kaongora aei, ao ni kaotaki naba kaekaaia n am Baibara. A kukurei Ana Tia Kakoaua Iehova ni maroroakini kaekaaia ma ngkoe.
1. E aera bwa e kainnanoaki te tautaeka teuana ae e na tautaekana te aonnaba ni kabutaa?
Ni boong aikai, a aki toki n riiriki aia kangaanga aomata ni katobibia te aonnaba. N aaba tabeua, a maiu ni kainnano ao ni karawawataaki angiia aomata. Ao n aaba riki tabeua, a bati aika a taraa n riao aia bwai nakon are a kainnanoia. Bon tii te tautaeka anne ae kona n tibwa kaubwain aon te aba ni kaboraoia.—Wareka Te Minita 4:1; 8:9.
2. Antai ae kona n onimakinaki bwa e na tautaekana te aonnaba?
A aki kukurei aomata n te iango ae e na tautaekanaki te aonnaba iroun temanna ibukina bwa akea ae kona ni karaoa raoi te mwakuri anne. Bon akea ae kona n tangiraki irouia aomata ni kabane. Ao e kaineti naba aio nakoia naake iai irouia te mwaaka ni kairiri ni manga babakanikawaia aomata. E rangi ni kakamaaku iangoan te aomata ae kairimatoa ae tii temanna bwa e na tautaekana te botannaomata ni kabane.—Wareka Taeka N Rabakau 29:2; Ieremia 10:23.
E a tia Iehova ae te Atua n rinea Natina ae Iesu bwa e na tautaekana te botannaomata n aki toki. (Ruka 1:32, 33) E a tia n rinanon te maiu i aon te aba Iesu. Ni menana i aon te aba, e kamarurungia aoraki, e reireinia aika maem, ao e karekea naba ana tai ma ataei. (Mareko 1:40-42; 6:34; 10:13-16) Ngaia are Iesu bon te tia Tautaeka ae kororaoi.—Wareka Ioane 1:14.
3. E boni kona n reke te tautaeka teuana ae e na tautaekana te aonnaba?
E a tia te Atua n rinea Natina bwa e na tautaekana te aonnaba mai karawa. (Taniera 7:13, 14) N aron te tia tautaeka i aon te aba ae e aki kona ni mena ni kaawa nako ake e tautaekani, ao ai arona naba Iesu bwa e aki riai ni mena i aon te aba ibukin tautaekanakia botannaomata.—Wareka Mataio 8:5-9, 13.
A na bane aomata ni butimwaea Iesu bwa te tia Tautaeka? A na aki. Bon tii aomata ake a tangira te raoiroi aika a na butimwaeia. A na boni kamaunaaki iroun Iehova te koraki aika a ribaa te tia Tautaeka ae tatangira ao n raoiroi are e a tia n rineia.—Wareka Mataio 25:31-33, 46.
4. Tera ae e na karaoia te tia Tautaekana te aonnaba?
N aron te tia kawakin tiibu ae bobotiia ana tiibu, e a kaman bobotiia aomata aika maem Iesu mai buakoia natannaomata ao n reireinia taekan ana tangira te Atua. (Ioane 10:16; 13:34) A a riki aomata aika ingainga akanne bwa taani boutokaa Iesu ma ana tautaeka. (Taian Areru 72:8; Mataio 4:19, 20) A katiteuanaaki ana aomata Iesu aika kakaonimaki ni katobibia te aonnaba ni katanoataa rikina bwa te Uea.—Wareka Mataio 24:14.
E na waekoa Iesu ni kamanena mwaakana ni kabebeteia aomata man te tautaeka ae babakanikawai. E a tia n rineiia tabeman mai buakoia taan rimwina aika kakaonimaki bwa a na tautaekana te aonnaba ma ngaia i karawa. (Taniera 2:44; 7:27) E na buta aonnaba n ataakin Iehova n ana Tautaeka N Uea Iesu, ao e na kaoka te bwaretaiti are e bua ngkoa ni moani karikaia aomata.—Wareka Itaia 11:3, 9; Mataio 19:28.
Ibukin rongorongo riki tabeua, nora mwakoro 8 n te boki, Tera Ana Reirei ni Koaua te Baibara?, aei ae boreetiaki irouia Ana Tia Kakoaua Iehova.