Antai te Uea n Ana Tautaeka n Uea te Atua?

• Rineaki iroun te Atua. “I a bon tia ni katea au uea . . . N na anganiko natannaomata bwa tibwangam, ao tabon nako aonnaba bwa abam.”​—Taian Areru 2:6, 8.

• Riki bwa te tia bwaibwai imwin te Uea are Tawita. “E bungiaki te teei nakoira, ti anganaki te nati te mwaane . . . E na akea tokin ririkiraken ueana ao te rau, i aon ana kaintokanuea Tawita ao i aon ana tautaeka n uea, bwa e aonga ni kateia ni kamatoaa.”​—Itaia 9:6, 7.

• Bungiaki i Betereem. “Ngkoe ae Betereem . . . , e na otinako mairoum te aomata ae e na riki bwa te tia tautaeka ibukiu . . . e na rokoroko kakannatona i tabon nako aonnaba.”​—Mika 5:2, 4.

• Ribaaki irouia aomata ao ni kamateaki. “E riribaaki, ao ti kakeaa bongana. . . . E ewaraki ibukin ara bure. E korakora karawawataana ibukin ara kairua.”​—Itaia 53:3, 5.

• Kautaki man te mate ao ni kamimitongaki. “Ko na aki katukai n te Ruanimate. Ao ko na aki kariaia am aomata ae kakaonimaki ni koaua bwa e na nora te mwarua. . . . E mena te kukukurei i angaataim n aki toki.”​—Taian Areru 16:10, 11.

E Bon Tau Raoi Iesu Kristo

Bon akea te aomata temanna ae botau ma kabwarabwara akanne ibukin te tia Tautaeka ae bon tau raoi ma bon tii Iesu Kristo. E boni kangai te anera nakoni Maria are tinan Iesu: “Te Atua e na anganna ana kaintokanuea tamana are Tawita, . . . ao e na akea tokin ana Tautaeka n Uea.”​—Ruka 1:31-33.

E bon aki riki Iesu bwa te tia tautaeka n te aonnaba. Ma e na bon tautaekania aomata mai karawa, n rikina bwa te Uea n Ana Tautaeka n Uea te Atua. Tera ae e karikia bwa te tia Tautaeka ae te kabanea n raoiroi? Iangoi baike e karaoi ni menana n te aonnaba.

• E tabeakinia aomata Iesu. E buokiia mwaane ma aine, ataei ao kaara, n aki ongeia bwa tera aroia ke rikiaia. (Mataio 9:36; Mareko 10:16) Ngke e bubutii te rebera ni kangai: “Ko kona ni kaitiakai ngkana ko kani karaoia,” ao e boni kaitiakia Iesu ibukina bwa e nanoangaia.​—Mareko 1:40-42.

• E reireinira aroni kakukureian te Atua. E taku: “Kam aki kona ni kaai n toro iroun te Atua ao te Kaubwai.” E taku naba bwa te baere ti tangiria bwa e na karaoaki nakoira, ti riai naba ni karaoia nakoia tabemwaang, ae anne bon te boto n reirei are e a riki bwa te Kibu ni Koora. E kaotia naba ae e aki tii tabe te Atua ma baika ti karaoi, ma e tabe naba ma ara iango ao ara namakin. Ibukini kakukureian te Atua, ti riai n taratara raoi ma baika i nanora. (Mataio 5:28; 6:24; 7:12) E katuruturua Iesu bwa ngkana ti na kukurei ni koaua, ti riai n reiakini baika e tangiri te Atua bwa ti na karaoi, ao ni maiuakin.​—Ruka 11:28.

• E angareirei Iesu n ae nanonaki n tangiraia aomata. A rangi n anainano ana taeka ma ana mwakuri Iesu ao e rotii nanoia taan ongora. “A a miroaroa te koraki n arona n angareirei, bwa e reireinia n aron te aomata ae mwiokoaki iroun te Atua.” (Mataio 7:​28, 29) E reireinia ni kangai: “Tangiriia aomata aika kairiribai nakoimi.” E tataro naba ni kangai ibukia naake a kamatea: “Tamau, kabwarai aia bure bwa a aki ataa te bwai ae a karaoia.”​—Mataio 5:44; Ruka 23:34.

E bon tau raoi Iesu n riki bwa te tia Tautaekania kaain te aonnaba, ae ibuobuoki ao e akoi. Ma e na moana n ningai ana tautaeka?