TITIRAKI AIKA KAEKAAKI MAN TE BAIBRA

Bukin tera bwa ti tataroa rokon Ana Tautaeka n Uea te Atua?

Ana Tautaeka n Uea te Atua bon te tautaeka i karawa. E tuangia taan rimwina Iesu bwa a na tataroa rokona ibukina bwa e na manga kaoka te raoiroi ao te rau i aon te aba. Akea aia tautaeka aomata ae kona ni kamauna te tiritiri ni kabane, te ribuaka ke te aoraki, ma e kona ni karaoa anne Ana Tautaeka n Uea te Atua ao e na boni karaoia. E a tia te Atua n rinea Natina ae Iesu bwa te Uea n te Tautaeka n Uea. E a tia naba Iehova n rineia taan rimwin Iesu tabeman ake a na tautaeka ma ngaia n te Tautaeka n Uea.​—Wareka Ruka 11:2; 22:28-30.

E na waekoa Ana Tautaeka n Uea te Atua ni kamwaawaia naake a karitei ni kabane nakon ana kairiri te Atua. Ai ngaia are te tataro ibukin rokon Ana Tautaeka n Uea te Atua, bon te bubutii bwa a na oneaki mwin tautaeka n aomata ni kabane n ana tautaeka te Atua.​—Wareka Taniera 7:13, 14; Te Kaotioti 11:15, 18.

Bukin tera bwa a na kakabwaiaaki aomata n Ana Tautaeka n Uea te Atua?

Bon te Uea ae te kabanea n raoiroi Iesu ibukina bwa e nanoanga. Ngkai bon Natin te Atua, iai naba mwaakana n angania aomata ni kabane baika a kainnanoi ake a butiia te Atua.​—Wareka Taian Areru 72:8, 12-14.

A na kakabwaiaaki aomata nako ake a tataro ma nanoia ni koaua bwa e na roko Ana Tautaeka n Uea te Atua ao naake a kaboraoi naba maiuia ma nanona. Ko na bon aki uringaaba n te bwai ae ko reiakinna n te Baibara ibukin Ana Tautaeka n Uea te Atua.​—Wareka Ruka 18:16, 17; Ioane 4:23.