Aia Titiraki Taani Wareware . . .

Tera Aremaketon?

▪ A mwaiti n te aonnaba aei aika a karioiango i aon te taeka ae “Aremaketon,” bwa te urubwai ae korakora, n aroni bwaai ni buaka aika mwaakaroiroi, kabuanibwai aika karina n riiriki n te aonnaba, ke boni kabuanibwai aika a riki mani birirakeni kabuebuen taai ni katobibia te aonnaba. E kamanenaaki te taeka anne n te Baibara ma akea teuana mai buakon akanne ae kaineti ma ngaia. Tera ngkanne Aremaketon are e taekinaki n te Baibara?

E kaoti n te Baibara te taeka ae “Aremaketon,” (“Are–Maketon”) n te boki ae Te Kaotioti. E kaineti nakon te buaka ae okoro, ae “te buaka n te bong ae kakannato ae ana bong te Atua ae Moan te Mwaaka,” ike a a katauraoaki iai “ueea n te aonnaba ni kabutaa” nakon ana kabanea ni buaka te Atua. E oti naba taekan te buaka aei ni kiibu riki aika bati.—Te Kaotioti 16:14-16; Etekiera 38:22, 23; Ioera 3:12-14; Ruka 21:34, 35; 2 Betero 3:11, 12.

Tera ae karika te buaka aei? Ti tuangaki ae kangai n te boki ae Te Kaotioti n te aro ni kaikonaki: “Uean aonnaba ma aia taanga ni buaka, aika ikotaki bwa a na buakana teuare toka i aon te aoti ma ana taanga ni buaka.” “Teuare toka i aon te aoti” bon Iesu Kristo ae Natin te Atua, are e rineaki iroun te Atua bwa e na kairiia taanga n anera aika taani buaka bwa a na tokanikai i aoia taani kairiribai nakon te Atua. (Te Kaotioti 19:11-16, 19-21) E kaotaki n Ieremia 25:33 (BK), aroni korakorani kamaunanakoaia te koraki aika aki tangira te Atua ni kangai: “N te bong arei, ao a na wene rabataia akana a kamateaki irouni Iawe, mai tabon aonaba ni karokoa tabona.”

E aera ngkai e kainnanoaki Aremaketon? A rawa natannaomata ni kakoauaa ana tautaeka te Atua ma a taetaekina oin aia tautaeka. (Taian Areru 24:1) E kabwarabwaraaki aia karitei n Taian Areru 2:2 (BG) ni kangai: “A tei rake n un uean aonaba, ao a botaki ni kabowi taan tau-taeka, n eka nako Iehova ma ana Mesia.”

Ni koauana, a taku taani karitei aikai bwa bon aia bwai te aonnaba ao a aki kabongana raoi ao a urua. A a urua te aonnaba botannaomata ni boong aikai ao a a kabarekaa te otabwanin. E a kaman taetae ni burabetinaki te waaki ae rangi ni buakaka aei n Ana Taeka te Atua ae kangai: “A un botannaomata, ao e roko [unin te Atua].” E “na kamaunaia iai te koraki ake a urua te aonnaba” te Atua. (Te Kaotioti 11:18) E a tia ni baireia te Atua are iai riaina n tautaeka i aoia aomata ni kabane, bwa Aremaketon boni ngaia te kawai ae e na kaetaki iai te bukibuki.—Taian Areru 83:18.

E na roko n ningai Aremaketon? E kamataataa ni kangai Natin te Atua: “Akea ae ataa te bong ma te aoa anne, a aki ataia anerani karawa ao e aki ataia naba te Nati, ma tii te Tama.” (Mataio 24:36) E ngae ngke e koaua anne ibukin Aremaketon, ma e reitia riki te tia Buaka ae te Uea ae Iesu Kristo n anga te kauring ae kangai: “Noria! I a roko n ai aron rokon te tia iraa. E a kukurei ane teimatoa n tantani.” (Te Kaotioti 16:15) Mangaia are e irekereke te buaka ae kabutaa te aonnaba aei ma okin ao tikun Kristo, ae kaotaki n taian taetae ni burabeti n te Baibara bwa ti a mena ngkai n te tai anne.

A na tii kamaunaaki n Aremaketon te koraki ake a motinnanoia bwa a na karaoa ae buakaka, ao a na kamaiuaki “te koraki ae uanao.” (Te Kaotioti 7:9-14) A na nori koauan taeka aikai: “Ba ai ti teutana riki, ao akea naba te aomata ae buakaka: Eng, ko na tarataraa raoi ana tabo, ao akea naba. Ma a na abana te aba akana nimamanei; ao a na kukurei ni kabatian te raoi.”—Taian Areru 37:10, 11, BG.

[Kabwarabwaraan n iteraniba]

“A na abana te aba akana nimamanei; ao a na kukurei ni kabatian te raoi”