E na Moanaki Aremaketon i Iteraera?​—Tera ae E Taekinna te Baibara?

E kabwarabwaraaki Aremaketon n te Baibara bwa bon te buaka ae e na boo ni kabutaa te aonnaba i marenan te Atua ma tautaeka n aomata, ao tiaki n ae e na boo n te aono ae tii teuana.

• “Rongorongo mairouia taimonio, aika . . . a kawariia ueea n te aonnaba ni kabutaa bwa a na ikotiia nakon te buaka n te bong ae kakannato ae ana bong te Atua ae Moan te Mwaaka. . . . A ikotiia nakon te tabo ae aranaki n te taetae n Ebera bwa Aremaketon.”​—Te Kaotioti 16:​14, 16.

Te taeka ae “Aremaketon” e nako man te taetae n Ebera ae Har Meghid·dohnʹ, ae nanona “Maungani Mekito.” Mekito bon te kaawa teuana n aia aono I-Iteraera rimoa. Ibukin anne, a kakoauaa aomata tabeman bwa Aremaketon bon te buaka ae e na boo i Iteraera. Ma e aki tau buburan te aono ae Mekito ke aonon teuana te Middle East are a na kona ni bane n ono iai “ueea n te aonnaba ni kabutaa” ma kaain aia taanga ni buaka.

E koreaki te boki ae Te Kaotioti “rinanon taiani kanikina,” ke rinanon te taetae ni kaikonaki. (Te Kaotioti 1:1) Aremaketon bon tiaki te tabo raoi ni koaua, ma e kaineti ma te bwai ae e na riki ni kabutaa te aonnaba, ae taekan aia kabanea n tai natannaomata ake a ikotaki bwa a na kaitaraa ana kairiri te Atua.​—Te Kaotioti 19:​11-16, 19-21.