Ko a Tia ni Kekeweaki?

A KARAKO baika riiriki nakoira aika kammarakira riki nakon ataakin ae e a tia ni keweira temanna ae ti onimakinna. Tao ko kona ni bwainrang, n un, ke ni kamwaneaki naba. A urui iraorao ao maare keewe nako, ao a babakanikawaia aomata n iraean te mwane ae mirion ma mirion te taaraa.

Iangoa arom ngkana ko a ataia ae ko a tia n tuangaki rongorongo aika kewe ibukin te Atua. E na bae ni korakora rotakim n aroia taan taromauri, ngkana e rangi ni kakawaki iroum am taromauri:

● E taku DEANNE: “I a ataia ae I a mwane n au Aro.”

● E taku LUIS: “I un bwa I a ataia ae I a tia ni mwamwanaaki, ao ai akea uaan tiau nako ma baika I kantaningai.”

E bae ni kangaanga iroum kakoauaan ae ko a tia n tuangaki rongorongo aika kewe ibukin te Atua. Tao a taekinaki baika ko a tia n atai iroun ae ko onimakinna, ao ae e aki kona ni karaoa ae buakaka nakoim n aroia am karo, tamam, mataniwin am Aro, ke raoraom ae ko kaani ma ngaia. Tao ko a tia ni kakoauaa te reirei anne man uarerekem ni karokoa ngkai. Ma ko kakoauaa ae e kona naba ni kewe te iango teuana ae taabangaki? E kakoauaa aei te Beretitenti ngkoa n te U.S. ae Franklin D. Roosevelt ngke e kangai: “E aki bitaki te kewe nakon te koaua ngkana e kaokiokaki mwaneweana.”

Ko na kanga n ataia bwa ko a tia ni kekeweaki ke ko aki? E taku Iesu n te tai teuana ngke e tataro nakon te Atua: “Bon te koaua am taeka.” (Ioane 17:17) Eng, iai i nanon Ana taeka te Atua ae te Baibara baika ti kainnanoi bwa ti aonga n ataa kaokoron reirei aika koaua ao aika kewe.

E aera bwa ko aki wareki kaotaraeani keewe aika nimaua ibukin te Atua n te Baibara? Ko na bae n nora aron te koaua ni bita maium ibukini kakabwaiam.