A Kewe Betero ao Anania—Tera Reireiara Iai?

N aron ae ko ataia, te kewe bon te bwai ae ko taekinna ao ko ataia bwa e aki koaua. Iai te tai ae ko a tia ni kewe iai?​—a A a bon tia naba ni kewe ikawai tabeman ake a tangira Iehova. Ko bae n ataa te aomata ae taekinaki n te Baibara are e a tia ni karaoa anne. Arana boni Betero, ae temanna mai buakoia ana abotoro Iesu ake 12. Ti na ongora ngkai n te karaki bwa e aera ngke e taekini keewe tabeua.

Imwini katikan Iesu, e a uotaki nakoni mwengan te ibonga ae rietata. E a boni karangaina n te tai aei. E rin Betero n te katawanang ni mwengan te ibonga ao e aki kinaaki. Ma e a kinaaki n ootan te ai iroun ana toro te ibonga ae rietata ae te ataeinnaine are e karinna. E taku neiei: “Ngkoe naba raon Iesu.” E maaku Betero ao e kaeka bwa tiaki raon Iesu ngaia.

E taekinaki n te Baibara bwa rimwi riki ao e a manga “kinaaki iroun te teinnaine naba temanna” ao e taku neiei: “Teuaei bon raon Iesu.” E a manga kewe riki Betero. Imwin tabeua te tai, a a roko aomata tabeman nakoni Betero ao a taku: “Boni ngkoe naba temanna mai buakoia.”

E maaku Betero, ngaia are e a manga kewe ao ai ana katentai. E taku: “I aki kinaa teuanne!” Ao e a tang naba te moa. E taraaki Betero iroun Iesu ao e a uringnga Betero bwa tabeua te aoa imwain aei, e tuangnga ni kangai: “Ko na kakeaai tenua te tai imwain tangin te moa.” E otinako Betero ao e tang. E bon rangi n nanokawaki!

E kona n riki naba aei nakoim?​— Tao Ko ongo bwa a taekinia Ana Tia Kakoaua Iehova ataei, n am tabo n reirei. E taku temanna: “A aki karinea te buraeki.” E reitia temanna riki ni kangai: “A aki buaka ibukin abaia.” Ao are temanna e kangai: “Bon tiaki Kristian ngaiia bwa a aki bukamarua te Kiritimati.” Imwin anne, e tanrikaaki temanna nakoim ao e titirakiniko: “Tiaki naba ngkoe Ana Tia Kakoaua Iehova?” Tera ae ko na taekinna?​—

Ko riai n tauraoi n anga te kaeka ae eti raoi imwain ae riki te aekaki aei nakoim. E aki tauraoi Betero, ao e kewe ngke e aitara ma te kangaanga! Ma e ngae n anne, e rangi n nanokawaki ibukin te baere e karaoia, ao e kabwaraa ana bure te Atua.

E boni kewe naba temanna te tia rimwin Iesu rimoa ae Anania. Ma e aki kabwaraa te Atua ana bure ma buuna are Tabeire. E a tia neiei ni kariaia bwa e na kewe ma buuna. Ti na nora bukin aki kabwaraan aia bure taanga aikai iroun te Atua.

Tebwina te bong imwini kitanakia abotoro iroun Iesu ngke e a okira te Atua i karawa, ao a a bwabetitoaki tao 3,000 aomata i Ierutarem. A bati ake a roko man aaba aika raroanako ni bukamarua te Toa are Bentekota, ao imwin rikia bwa taan rimwin Iesu a a kan tiku ni kamaania ibukin reiakinan riki taekan te onimaki are e a tibwa reke irouia. Ai ngaia are a a kamanenai oin aia mwane taan rimwin Iesu tabeman ibukini karekeani bwaai ake a kainnanoi aomata aikai.

A kaboonakoi aia bwai tabeua Anania ma buuna bwa e aonga reke naba aia mwane ibukini buokaia naake a a tibwa bwabetitoaki. Ngke e roko Anania ma te mwane nakoia abotoro, e tuangia bwa bon anne mwaitin raoi te mwane are e reke mani kabonakoan aia bwai. Ma e boni kewe! Iai ae e kawakinna ibukina! E kaota te koaua te Atua nakoni Betero, ngaia are e a kangai Betero nakon Anania: “Ko aki kewe iai nakoia aomata ma ko kewe nakon te Atua.” Ngke e ongo taeka aikai Anania ao e bwaka ni mate! Tao tenua te aoa imwina, e a manga roko buuna. Ao e aki ataa te bwai ae riki nakoni buuna ao e a manga kewe naba ike e a bwaka naba ni mate.

Ai anai nanora te reirei aei: E kakawaki tataekinan te koaua! Eng, ti bane ni kainnanoa reiakinan anne! E ngae n anne, ti bane ni kakairua, ai moarara riki ngkana ti uarereke. Ko aki ngkanne kukurei ngkai e tangiriko Iehova ao ni kabwaraa am bure n aron are e karaoia nakoni Betero?​— Ma uringnga, ti riai n taekina te koaua. Ao ngkana tao ti karaoa te kairua ae bubura ni kaineti ma te kewe, ti riai ni bubutii, eng, n onnonia te Atua bwa e na kabwaraa ara bure. E boni bae ni karaoa anne Betero ao e kabwaraaki ana bure. Ngkana ti kakorakoraira n aki kewe nakon temanna, e na boni kabwarai naba ara bure te Atua!