“Tera te Tua ae Moan te Kakawaki Mai Buakon Tuua Nako?”

Tera ae e tangiria mairoura te Atua? Iai tuua aika mwaitikurikuri aika ti riai n tou mwia? Ti rangi ni kakaitau bwa bon akea. Ni kaineti ma Natin te Atua ae Iesu Kristo, a kona ni katiteuanaaki baike e tangiri te Atua mairoura n te taeka ae tii teuana.​—Wareka Mareko 12:​28-31.

Iangoa moa tein ana taeka Iesu akanne. E angareirei n te tembora n Nisan 11, tabeua te bong imwaini matena. A tabeki tabeua titiraki aika a aki toki ni kauntaekaaki nakon Iesu bwa e aonga ni kairua te bwai are e na taekinna. N angiin te tai, e kaini wia n ana kaeka. Imwina, e a tabekaki nakon Iesu te titiraki ae kangai: “Tera te tua ae moan te kakawaki mai buakon tuua nako?”​—Kibuna 28.

E rangi n kangaanga te titiraki anne. A kauntaekaia I-Iutaia tabeman bwa tera te tua ae te moan ke ae rangi ni kakawaki riki mai buakon tuua aika a raka i aon 600 mwaitiia ake n te Tua Rinanoni Mote. A kauntaeka ake tabeman riki bwa e taraa n ae titeboo kakawakin tuua ni kabane, ao e kairua te iango ae a kakawaki riki tuua tabeua nakon ake tabeua riki. E na kanga Iesu ni kaekaa te titiraki anne?

Ni kaekaan aei, e aki taekina teuana te tua Iesu ma bon uoua. E taku: Te moan: “Ko riai n tangira Iehova ae Atuam ma nanom ni kabanea, maium ni kabanea, am iango ni kabanea, ao korakoram ni kabanea.” (Kibuna 30; Te Tua-Kaua 6:5) A kona n irekereke nanon taeka aika “nanom,” “maium,” “am iango,” ao “korakoram.”a Aio nanona: E riai n irekereke tangiran Iehova ma rabwatan te aomata ni kabane, ae nanona ana konabwai ao ana bwai ni kabane. E taekinaki ae kangai n te boki ae The Expositor’s Bible Commentary are kabwarabwaraa te Baibara: “E riai n tabwanin raoi tangiran te Atua.” Ngaia are ngkana ko tangira te Atua, ko riai ni karaoa am kabanea n tamaroa ni maiuakina te aro are e na reke iai tangiram irouna n taai nako.​—1 Ioane 5:3.

Te kauoua, e taku Iesu: “Ko riai n tangira raom n aomata n aron tangiram i bon iroum.” (Kibuna 31; Nakoaia Ibonga 19:18) E rangi n irekereke tangiran te Atua ma tangiraia raora. E na reke tangiraia raom n aomata imwin reken tangiran te Atua iroum. (1 Ioane 4: 20, 21) Ngkana ti tangiriia raora n aomata n aron tangirara i bon iroura, ti na boni karaoi mwakuri ake ti tangiri bwa a na karaoi nakoira. (Mataio 7: 12) Ao ngkanne, ti a kaotia iai bwa ti tangira te Atua are e karikira ao ngaiia naba ni katotongana.​—Karikani Bwaai 1:26.

Tera aroni kakawakin tuua aika ti na tangira te Atua ao raora n aomata? E taku Iesu: “Akea te tua ae kakawaki riki nakon aikai.” (Kibuna 31) N te rongorongo ae titeboo ma anne ao e taekinna iai Iesu bwa a boto tuua ni kabane i aon tuua aika uoua aikai.​—Mataio 22:40.

E aki kangaanga kakukureian te Atua. A kona bwaai ni kabane ake e tangiri mairoura ni katiteuanaaki n te taeka ae tii teuana ae: te tangira. Bon anne aron te Atua ma ngkoa bwa e tangiriia ana toro bwa a na tangiria ao e na teimatoa ni waakinako anne. Ma e aki tii kaotaki te tangira n am taeka ke te namakin, ma e riai ni kaotaki n te mwakuri. (1 Ioane 3:18) E aera ko aki reiakina arom ae ko na kona iai ni karikirakea ao ni kaotiota am tangira ibukin Iehova, ae te Atua are “bon te tangira”?​—1 Ioane 4:8.