“I Noria ma I Aki Ota Iai”

A buuraure au karo ngke tao nimaua tabun au ririki, ao e a boni kaikawaira tinara n tii ngaia, ngai ma tariu ake a a ikawai riki aika uoman mwaane ao temanna te aine. N taai akanne, a aki reireiaki ataei aika bonotaninga i Buranti n aron ae kakaraoaki ngkai, ao a karekea rawawatau ae korakora n tabetai aanga n reirei ake a kakabonganaaki. Ma man uarerekeu, iai kakabwaia ake I karekei aika a aki reke irouia ataei aika bonotaninga aika bati. Ongora bwa N nang kabwarabwaraa.

Inanon tabeua te tai, a a bati taan reirei aika a kakoauaa bwa a riai n reireiaki ataei aika bonotaninga rinanoni kamanenaan te taetae ao tarataraani kakammwakurin te ria. Ni koauana, e rangi n tabuaki te taetae n te bai n tain te reirei n te tabo are I ikawairake iai i aoni Buranti. A boni kabaeaki naba i akuia baia ataei aika bonotaninga n tain te reirei.

Ngke tao ai teuana nakon nimaua au ririki, I rereirei tabeua te aoa ni katoa wiki ma te aine ae mwaatai n reireinia ataei aika bonotaninga. E tauaki mwangaiu ke atu ao I kairoroaki bwa N na okioki ni kakairi ni bwanaa ake I aki kona n ongo. I bon aki kona n taetae ma ataei ake tabeman riki. Bon akanne ririki ake I rangi n rawawata iai.

Ngkanne ngke ai onoua au ririki, I a karinaki n te kuura ae a mamatu iai ataei n te tabo n reirei ae onoti ibukia ataei aika bonotaninga. Ai bon tibwa au moantai aei n taetae ma ataei aika bonotaninga naba. E bon tabuaki naba ikai te taetae n te bai. Ngkana ti taetae n te bai n tain te reirei, ti katuuaaeaki n oreaki nimoimoini baira ke waera ke ni buritaki irannatura. Ma e ngae n anne, ti boni karabaira naba n taetae n te bai ni kamanenaan ara tua ake ti karaoi. N tokina, I a kona n taetae ma ataei ake tabeman riki. Ai ngaia are a a moanaki au ririki aika kakukurei aika aua.

Ngke ai tebwina au ririki, I a kamwaingaki nakon te moan rinan n reirei ibukia ataei aika aki bonotaninga. I a bon rangi n nanokawaki! I iangoia bwa titeboo ma a a bane ni mate ataei aika bonotaninga ao ai bon tii ngai te nikira n te aonnaba aei. N touani mwin aia taeka n reirei taokita ake a tabeaianga bwa I kona ni kabuai kakabwaiaau mani bwainnaorakiau ibukin te taetae, a a bon aki reireinaki n te taetae n te bai kaain au utu ao I aki kariaiakaki naba ni bobotaki ma ataei aika bonotaninga. I teimatoa naba n ururinga kawaran te taokita ae mwaatai n te aoraki ae te bonotaninga are iai ana boki ibukin te taetae n te bai i aon ana taibora. Ngke I nori taamnei i tinanikuna, I kotei ao I taku: “I tangira te bwai anne!” Ma e waekoa te taokita ni karabaa te boki.a

MOAN REIAKINAU TAIANI KOAUA MAN TE BAIBARA

E kataia tinau ni kaikawaira bwa ti na maiuakini booto n reirei man te Baibara. E kakairira nakoni bobotaki n aia ekaretia Ana Tia Kakoaua Iehova ae te Mérignacion, i rarikin Bordeaux. Tii teutana otau man taiani bobotaki ibukina bwa I uarereke. Ma e ngae n anne, a uatei aomata aika kakaokoro n tekateka ni kaaniai ao ni korei baike a taekinaki. E anaaki nanou n aia tangira ao aia mwamwannano. I reirei ma tinau n te Baibara ni mwengara ma I aki ota raoi ni baike I reiakin. E kuri n titeboo au namakin ma te burabeti are Taniera are e kangai imwin anganakina te taetae ni burabeti iroun te anera: “I ongo ma I aki ataia.” (Taniera 12:​8, BG) Ma irou, bon te bwai ae “I noria ma I aki ota iai.”

Ma e ngae n anne, I a reiakini moan reirei man te Baibara tabeua, teutana imwin teutana. I kawakini baike I a ota raoi iai ao I kataia ni maiuakin. I karekea naba reireiau mani matakuakinan aroaroia tabemwaang. N te katoto, e taekinaki n te Baibara bwa ti na taotaon nanora. (Iakobo 5:​7, 8) I aki ota raoi n te taeka ae taotaonan nanora. Ma imwini matakuakinaia raao n te onimaki n aroia ni kaotiota te aroaro aei, I a kona n ota iai. Ni koauana, I rangi ni kakabwaiaaki man te ekaretia ni Kristian.

TE BWARANNANO AE KORAKORA AO TE BWAI NI KAKUKUREI AE KAKUBANAKO

N te bong teuana ngke ai tebwi tabun au ririki, ao I a noriia rooro n rikirake tabeman aika bonotaninga n te kawai aika taetae n te bai i marenaia. I a moanna ni kakarabaai ni bobotaki ma ngaiia ao ni moanna n reiakina Te Taetae ni Buranti n te Taetae n te Bai. I waakinaanako irirakini bobotaki ni Kristian, ike e a tii tatangirai naba temanna te roro n rikirake ae te tia uarongorongo ae te mwaane ae Stéphane. E rangi ni kekeiaki n taetae ma ngai, ao I namakina au itoman ae nene ma ngaia. Ma e ngae n anne, iai te bwarannano ae korakora ae N nang aitara ma ngaia. E a kabureaki Stéphane ibukin teimatoana n rawa n ira te taanga ni buaka. I a bon rangi n nanokawaki! E a moanna n rangi ni bwara nanou ao I a aikoa iririi bobotaki ngkai ai akea i rarikiu Stéphane.

Tebwi ma teuana te namwakaina imwina, e a kaotinakoaki Stéphane man te karabuuti ao e a oki. Iangoa kubanakou ngke e a moanna Stéphane ni maroro ma ngai n te taetae n te bai. I aki kona ni kakoauaa te bae I noria! Tera ae riki? E a bon tia n reiakina Te Taetae ni Buranti n te Taetae n te Bai n te karabuuti. I matakuakina kakammwakurini baina ao teini ubuna, ao e a rikirake kukureiu ngke I a karaua n iangoia ae e a kona ni kabwarabwaraa te koaua n te aro ae mataata riki nakoiu.

I A OTA RAOI NI KOAUA MAN TE BAIBARA IMWIN TE TAI AE MAAN

E a moana au reirei Stéphane man te Baibara. Man te tai anne, I a moanna n tomatomai otau ni koaua nako man te Baibara ake I a tia n reiakini ngkoa. Ngke I uarereke, I kani mamataku n taamnei aika kantara n ara boki aika boto man te Baibara, ni kabotauia naake bon rongorongoia ao n neneri karakinaia ni kabane bwa e aonga ni bwanin raoi n au iango. I ataa taekan Aberaam, ana “kariki,” ao te “koraki ae uanao,” ma I a tibwa ota raoi n te bae nanonaki iai ngke a a kabwarabwaraaki n te taetae n te bai. (Karikani Bwaai 22:​15-18, BG; Te Kaotioti 7:9) E teretere raoi bwa e a reke irou au taetae ae I ota raoi iai ae I tangiria.

Ibukina bwa I a kona ngkai n ota ni baika taekinaki ni bobotaki, e a ringaki nanou ao I a bwarua reiakinan ae bati riki. E teimatoa n rikirake au atatai man te Baibara n ana ibuobuoki Stéphane, ike I a katabua iai maiu nakon Iehova ae te Atua ao ni bwabetitoaki n 1992. N aki ongea rikiraken au atatai are e a tia n reke, I bon teimatoa naba ni maamaa ao e kangaanga irou te bobotaki ma aomata riki tabeman ibukina bwa I aki kona n itoman ma aomata ngke I rangi n uarereke.

BUAKANAKINI MAAMAAU

N tokina, e a ikotaki te kurubu ni bonotaninga are I mena iai ma te ekaretia i Pessac ibukia bonotaninga, n aonon Bordeaux. E bon rangi ni buokai anne ao e a teimatoa n rikirake au onimaki. E ngae ngke I teimatoa ni kabokorakora ma tianakin au konabwai n taetae, ma a boni buokai raoi raoraou ake a aki bonotaninga bwa N na ota ni bwaai ni kabane. A kakorakoraia naba n aaro aika okoro taangaia Gilles ma Elodie bwa a na maroro ma ngai. A aki toki ni kaoai bwa ti na kaai n amwarake ke ni moi n te kobee imwini bobotaki, ike e a rikirake iai te iraorao ae kakukurei. Ai kakukureira te mena i buakoia aomata aika toua mwin aroaron te Atua aika e kaotiotaki iai te tangira!

Bon aei te ekaretia are I kaitiboo iai ma Nei Vanessa ae rangi n anainano aroarona. E reke tangirana irou man ana nanoanga ao kakaraoan ae eti. E aki iangoa bonotaningau bwa te bwai n tutuki n ara maroro, ma e iangoia bwa te anga are e na kona iai n reiakina arona ni maroro ma ae bonotaninga. I a bon tangiria, ao ti mare n 2005. E ngae ngke I noria bwa e kangaanga irou te maroro raoi ma aomata, ma e boni buokai Vanessa ni buakana maamaau n te aro are I a biririmoa ni kataetaeia aomata. I boni kakaitau ibukini boutokaau irouna ngkai I tabe ni karaoi mwiokoau.

TE BWAINTITURAOI RIKI TEUANA MAIROUN IEHOVA

N te ririki are ti mareaki iai, I a kaoaki man aia aobiti n tararua Ana Tia Kakoaua Iehova i Louviers i aoni Buranti, bwa N na kaea te kataneiai ibukin te mwakuri n raitaeka ae maanna teuana te namwakaina. N ririki aika tibwa nako imwaini kaoakin teuaei, a rangi ni mwakuri korakora kaain te aobiti n tararua ni karaoi booki tabeua aika boto man te Baibara n Te Taetae ni Buranti n te Taetae n te Bai n te DVD. Ma ibukini batin riki te mwakuri n taai aika imwaira, e a kainnanoaki te boutoka nakon te tiim n raitaeka.

Ti uaia n namakinna ma Vanessa bwa ngkana N na beku n te aobiti n tararua, bon te kakabwaia ae rangi ni bubura ao te bwaintituaraoi naba mairoun Iehova ae te Atua, ma I riai ni kaota nanora bwa ti boni maaku. Tera ae na riki ngkanne nakon ara kurubu n te taetae n te bai? Tera ae ti riai ni karaoia ma ara auti? E kona n reke ana mwakuri Vanessa n te aono arei? E boni katauraoi kaekaan ara titiraki ni kabane Iehova n te aro ae rangi n tamaroa. I namakina ana tangira Iehova ibukira ao ibukia naba aika bonotaninga.

BOUTOKAAU IROUIA AOMATA AIKA KATITEUANAAKI

Ibukina bwa I karaoa naba te mwakuri n raitaeka, I a kona n ota raoi riki ni bwaai ni kabane aika katauraoaki ibukini buokan aia onimaki aika bonotaninga. Ai kakukureira noraia raao n te onimaki aika bati aika a kataia n taetae ma ngai! E ringaki nanou n aroia n reiakina te taetae n te bai tabeua ao ni kataia ni kamanenai. I a bon aki kona n namakina te maroaa. Boni kaotiotan te tangira aaro aikai ni kabane ao katiteuanaakia ana aomata Iehova ae rianako.​—Taian Areru 133:1.

I rangi ni kakaitaua Iehova bwa rinanon te ekaretia ni Kristian, ao e a tia n taraia raoi bwa e na iai te aomata ae buokai n taai nako. I kakaitau naba ni mwiokoau ae uarereke ae buokaia raou ni bonotaninga, bwa a na ataa ara tia Karikiriki ae tatangira ao ni kaaniaki ma ngaia. I ingainga ni kariariaa te bong are a nang akea iai te kangaanga n te taetaenikawai ao a nangi bane n taetae iai aomata n “te taetae ae itiaki,” ae te koaua ibukin Iehova ae te Atua ao ana kantaninga nako ae kaineti naba ma katiteuanaakin te utu.​—Tebania 3:​9, BG.