E Berita Iesu Nakon Tia Kakaraoa ae Buakaka Bwa E na Maiu i Karawa?

E rio te titiraki man ana berita Iesu nakon te tia kakaraoa ae buakaka bwa e na maiu teuare e tauraki irarikina n te Bwaretaiti. E taku Iesu: “E koaua ae I tuangko n te bong aei, Ko na mena ma ngai n te Bwaretaiti.” (Ruka 23:43) Iangoia bwa ngke e taetae Iesu ao e aki taekinna bwa e na mena ia te Bwaretaiti anne. E nanonna Iesu ngkanne bwa e na raonna i karawa teuare e kakaraoa ae buakaka?

Te moan, ti na noria bwa e tau teuare e kakaraoa ae buakaka anne nakon te maiu i karawa ke e aki. A a tia ni bwabetitoaki n te ran ao n te taamnei ae raoiroi aomata ake a kantaningaa te maiu i karawa ao a kona ngkanne n riki naake a kabiraki n te taamnei bwa taan rimwin Iesu. (Ioane 3:​3, 5) Te bwai riki ae tangiraki mairouia bon maiuakinan ana tua nako te Atua ni kaineti ma te aroaro ni maiu ae riai ao kaotiotan aroaro n aroni bwainan te koaua, te kakaonimaki ma te nano ae eti ao ai te atataiaomata. (1 I-Korinto 6:​9-11) A riai naba n teimatoa ni kakaonimaki nakon te Atua ao te Kristo n uaa tokini maiuia. (Ruka 22:​28-30; 2 Timoteo 2:12) A kona ni kautaki man te mate tii ngkana a karaoi baike a tangiraki ao ni kaotiia bwa a a tau ibukini mwioko aika kakawaki ake a mena imwaia i karawa, are nanona bwa a nang beku bwa ibonga ao ueea ma Kristo i aoia te botannaomata i nanon tenga te ririki.​—Te Kaotioti 20:6.

Ni kaitaraan anne, e a tia te tia kakaraoa ae buakaka are e tauraki irarikin Iesu n riki bwa te tia kamwarua ao ni mate naba n aron te tia kamwarua. (Ruka 23:​32, 39-41) Ni koauana e kaotiota te karinerine teuaei ngke e kangai nakon Iesu: “Uringai ngkana ko a roko n am tautaeka n uea.” (Ruka 23:42) Ma e ngae n anne, e bon aki roko n te bwabetitoaki, e aki riki bwa te tia rimwin Iesu ae kabiraki ke tao iai rongorongona aika raraoi ao taekan arona n nanomwaaka ibukin ana onimaki. E eti ngkanne bwa e na berita Iesu nakoina te maiu i karawa i rarikia taan rimwina aika kakaonimaki ma te nano ae eti?​—I-Rom 2:​6, 7. 

Te kabotau: Ngkana e bubutii kabwaraan ana bure te aomata ae iraea am mwane, ko bae n iangoia bwa ko aki tangira kabooani mwina. Ma ko na onimakinna bwa e na waakina am bitineti ke ni kawakinia am utu? Ko na boni kan angania riki naake ko rangi n onimakinia aeka ni mwioko akanne. Tii te arona naba nakoia naake a anganaki kantaningaan te nako karawa, a riai n nene aan aia onimaki ibukin aroia ni kawakin ana kaetieti te Atua aika raraoi ngkana a tautaekana te botannaomata. (Te Kaotioti 2:10) Ni kaineti ma te tia kakaraoa ae buakaka bon akea aan ana onimaki, e ngae ngke e taara ni bubutii rairan nanona n ana kabanea ni miniti ni maiuna.

Ma e koaua bwa e taetae Iesu nakon te tia kakaraoa ae buakaka bwa e na mena ma ngaia i karawa n te bong naba arei? E aki kona n riki anne kioina ngkai e aki nako karawa Iesu n te bong naba anne, bwa e boni “mena naba i aantano” ae taekan te ruanimate i nanon tenibong. (Mataio 12:40; Mareko 10:34) E ngae ngke e a tia ni kautaki, ma e bon teimatoa naba n tiku i aon te aba i nanon 40 te bong imwain rierakena nako karawa. (Mwakuri 1:​3, 9) Ngaia are e bon aki mena i karawa te tia kakaraoa ae buakaka irarikin Iesu n te bong naba arei.

Ma te Bwaretaiti raa ngkanne are e na mena iai te tia kakaraoa ae buakaka? Imwini kautakina, e na boni mena n te aonnaba ae Bwaretaiti are e na tautaeka iai Iesu. (Mwakuri 24:15; Te Kaotioti 21:​3, 4) Maroro ma temanna Ana Tia Kakoaua Iehova ngkana ko kan reiakina riki taekan te Bwaretaiti anne ao baike e tangiri mairoum te Atua.