Tera Reireiara Mairoun te Kamwarua?

E kona n reke reireiara mairoun te kamwarua ae ko noria n te taamnei ane e kataetaea Iesu. E bon nanokawaki te kamwarua anne n ana bure. E taku nakon Iesu: “Uringai ngkana ko a roko n am tautaeka n uea.” N aron ae ko noria n te taamnei aei, e taetae Iesu nakon te kamwarua. Ko ataia bwa tera ae taekinna nakoina?​—a E berita Iesu nakoina ni kangai: “E koaua ae I tuangko n te bong aei, Ko na mena ma ngai n te Bwaretaiti.”

Tera am iango n tein te Bwaretaiti anne?​— Ngkana ti kan ataa raoi rekena ae eti, ti na maroroakina moa te Bwaretaiti are e karaoia te Atua ibukin te moan aomata are Atam ao Ewa. E mena ia te Bwaretaiti anne? I karawa ke i aon te aba?​—

E eti am kaeka ngkana ko taekinna bwa i aon te aba. Ngaia are ngkana ti iangoa te kamwarua bwa e “mena n te Bwaretaiti,” ti riai n iangoia bwa e na mena ikai i aon te aba ngkana e a riki ni bwaretaiti. Aekara te Bwaretaiti anne?​— Ti na noria.

Imwini karikaia te moan taanga are Atam ao Ewa iroun Iehova ae te Atua, e taekinaki n te Baibara bwa e kamaekaia n te bwaretaiti ikai i aon te aba. E aranaki bwa ‘te nne n aroka i Eten.’ Ko kona n iangoia bwa tao tera aron tamaroan ‘te nne n aroka i Eten’?​— Ni koauana, bon te tabo ae raoiroi riki ao n rianako tamaroana ibukini maekanakina ae tuai man nonoraki iroun temanna!

Tera am iango? E na mena naba Iesu ikai i aon te aba ma te kamwarua are e nanokawaki ibukin ana bure?​— E aki, ma e na mena Iesu i karawa bwa te Uea are e na tautaekana te aba ae Bwaretaiti. Ngaia are e nanonaki ni menan Iesu ma te kamwarua bwa e na kautia man te mate ao n taraia bwa e na mwaneaki raoi n te Bwaretaiti i aon te aba. Ma e aera ngkai e na kariaia Iesu bwa e na maeka te kamwarua anne n te Bwaretaiti?​— Ti na maroroakina anne ngkai.

Ni koauana, e a tia ni karaoi mwakuri aika rangi ni buakaka te kamwarua aei. Ma anne naba ae a a tia ni karaoia birion ma birion aomata ake a a tia naba ni maiu i aon te aba. A karaoi mwakuri aika bubuaka angiia mai buakoia ibukina bwa a aki roko n te reireiaki taekan Iehova ao baike e tangiri bwa a na karaoi.

Ngaia are a na boni kautaki nakon te Bwaretaiti ikai i aon te aba aomata aika aroia akanne n ikotaki naba ma te kamwarua are e taetae Iesu nakoina i aon te kai. A na reireiaki nanon te Atua. Ngkanne, a a kona ni kaotiia bwa a tangira Iehova.

Ko ataia bwa a na kanga ni kaotiota anne?​— Boni man aroia ni karaoa are e tangiria te Atua. Ai kakukureira ngkanne te maeka n te Bwaretaiti ao ni memena i buakoia aomata aika tangira Iehova ao n itangitangiri naba i marenaia!