E Tararuaira Iehova Ibukini Kamaiuara
“Kam tararuaaki ni mwaakan te Atua rinanon te onimaki, ibukin te kamaiuaki are tauraoi ni kaotaki n tain te toki.” —1 BETERO 1:5.
KO NA KANGA NI KAEKA?
․․․․․
E kanga Iehova ni katikira nakon te taromauri ae koaua?
․․․․․
Ti na kanga ni kariaia bwa e na kairirira Iehova n ana reirei ni kairiri?
․․․․․
E kanga Iehova n anganira taiani kaungaunga?
1, 2. (a) Tera te karaunano ae e na buokira iai te Atua, ni kateimatoa kakaonimakira ma te nano ae eti? (b) Tera aron ataakira iroun Iehova n tatabemanira nako?
“ANE nanomwaaka ni karokoa te toki ao e na kamaiuaki.” (Mataio 24:13) N ana taeka Iesu akanne, e a kamataataa iai ae ngkana ti kan teimatoa ni maiu ni motikan taekan ana waaki Tatan iroun te Atua, ti riai ni kateimatoa kakaonimakira ma te nano ae eti ni karokoa te toki. Ma e aki nanonaki n aei, bwa e kantaningaira Iehova bwa ti na nanomwaaka n oini wanawanara ke korakorara. A karauaki nanora n te Baibara ni kangai: “E kakaonimaki te Atua ao e na aki kariaia bwa kam na kaririaki n ae riaon ami kona, ma e na karekea naba te anga ae kam na buutakinako iai bwa kam aonga n nanomwaaka ngkana kam kaririaki.” (1 I-Korinto 10:13) Tera nanon taeka akanne?
2 Ngkana e na taraia raoi Iehova bwa ti na aki kaririaki n te aro ae riaon ara kona, e riai n atai bwaai ni kabane ibukira n ikotaki naba ma kangaanga aika ti kaaitarai, aroarora, ao ai tian nanomwaakara. E kinaira raoi te Atua n aron anne? Eng, e kaotaki n te Baibara bwa e kinaira raoi Iehova n tatabemanira nako. E atai anuara ao baika ti kakaraoi ni katoabong. E kona naba n atai ara iango ao nanora.—Wareka Taian Areru 139:1-6.
3, 4. (a) E kanga ni kaotaki n rongorongon Tawita bwa Iehova e tabeakinia aomata n tatabemania nako? (b) Tera te mwakuri ae rianako ae tabe ni kakororaoia Iehova ni boong aikai?
3 E kangaanga kakoauaan ae e na tabeakinia aomata aika mangori te Atua? E iaiangoa te titiraki aei te tia areru ae Tawita ao e kangai nakon Iehova: “Ngkana I taratarai am karawa ake ana makuri tabonibaim, ma namakaina ma itoi, ake Ko motiki aroia; Ao tera te aomata, ngkai Ko ururingnga?” (Taian Areru 8:3, 4, BG) Tao e tabeka te titiraki aei Tawita n noran tabeakinana. E noria Iehova bwa Tawita are ana bina Iete, bon ‘ana aomata ae ai aron nanona’ ao e weteia ‘man rimwiaia tiibu, bwa e na riki bwa mataniwia’ I-Iteraera. (1 Tamuera 13:14, BG; 2 Tamuera 7:8, BG) Iangoa ana namakin Tawita ngke e a ataia ae a tabeakinaki baike e iaiangoi ao ana namakin iroun te tia Karika te iuniweeti, ngkai bon te teinimwaane ae te tia kawakintiibu ngaia!
4 E kamimi naba iaiangoan tabeakinara ae rianako iroun Iehova ni boong aikai. E botiia nakon te taromauri ae koaua “bwaai aika tatangiraki aika aia bwai botanaomata ni kabaneia,” ao e buokiia ana toro n teimatoa ni kakaonimaki ma te nano ae eti. (Akai 2:7, BG) Ibukini kamatataara n aron Iehova ni buokira n teimatoa ni kakaonimaki ma te nano ae eti, ti na iangoa arona ni katikia aomata n te moantai nakon te taromauri ae koaua.
A KATIKAKI IROUN TE ATUA
5. E kanga Iehova ni katikiia aomata nakon Natina? Kabwarabwaraa.
5 E taku Iesu: “Akea te aomata ae kona n nakoiu ngkana e aki katikia te Tama are e kanakomaiai.” (Ioane 6:44) E kaotaki n taeka akanne, bwa ti kainnanoa ana ibuobuoki te Atua ngkana ti kan riki bwa taan rimwini Kristo. E kanga Iehova ni katikiia aomata aika ai aroia tiibu nakon Natina? Bon rinanon tataekinan te rongorongo ae raoiroi ao mwamwakurin te taamnei ae raoiroi. N te katoto, ngke e mwakuri Bauro ma raona ni mitinare i Biribi, a kaitiboo ma te aine ae Ruria ao a tataekina te rongorongo ae raoiroi nakoina. E taekinaki te rongorongo ae kairaki koreana rinanon te taamnei ni kangai: “E kauka nanon neiei Iehova bwa e na butimwaei baike e taekini Bauro.” Eng, e kamanena taamneina te Atua ni buoka neiei bwa e na ota raoi n te rongorongo ao n tokina, e a bwabetitoaki ma kaaini batana.—Mwakuri 16:13-15.
6. Tera aron te Atua ni katikira ni kabane nakon te taromauri ae koaua?
6 Tii Ruria n riki aei nakoina? Tiaki tii ngaia. Ngkana te Kristian ngkoe ae ko a tia ni katabua maium, e a tia naba te Atua ni katikiko nakon te taromauri ae koaua. E nora te bwai ae raoiroi i nanom Tamara are i karawa, n aron are e nora naba te bwai ae kakawaki i nanon Ruria. E buokiko Iehova bwa ko na ota raoi rinanon te taamnei ae raoiroi, ni moan ongoraam n te rongorongo ae raoiroi. (1 I-Korinto 2:11, 12) Ngkana ko kakorakorako ni maiuakina ae ko a tia n reiakinna, e na boni kakabwaiaa am kekeiaki ni karaoan nanona. E kimwareirei nanona ngkai ko katabua maium nakoina. Ni koauana, e na raoniko Iehova n nakonakom n taai nako man te tai are ko moana iai am beku ibukina.
7. Ti kanga n ataia bwa e na boni buokira te Atua bwa ti na teimatoa ni kakaonimaki?
7 Ti kakoauaa bwa e teimatoa Iehova ni buokira ni kakaonimaki nakoina, ngkai boni ngaia ae e buokira ni moanakin ara beku ibukina. E ataia bwa ngkai ti aki kona ni butimwaea te koaua i bon iroura, ti aki kona naba n teimatoa n te koaua n oini korakorara. E kororeta te abotoro Betero nakoia Kristian ake a kabiraki ni kangai: “Kam tararuaaki ni mwaakan te Atua rinanon te onimaki, ibukin te kamaiuaki are tauraoi ni kaotaki n tain te toki.” (1 Betero 1:5) A kaineti taeka akanne nakoia Kristian ni kabane ao nakoira n tatabemanira nako ni boong aikai. Bukin tera? Ibukina bwa ti bane ni kainnanoa ana ibuobuoki te Atua bwa ti aonga n teimatoa ni kakaonimaki nakoina.
TUKARA MANI KARAOAN AE KAIRUA
8. E aera ngkai ti kona n ruanikai ni karaoan ae kairua?
8 A kona ni kairira kangaangan te maiu aei ao aki kororaoira, bwa ti na aki kaatuui ara iango i aon ara onimaki, ao ti a ruanikai ni karaoan ae kairua n akea ataakina iroura. (Wareka I-Karatia 6:1.) E kamatataaki aei n te baere e riki ni maiun Tawita.
9, 10. E kanga Iehova n tuka Tawita mani karaoan ae kairua, ao tera ae E karaoia ibukira ni boong aikai?
9 E kaotiota te taotaonaki n nano ae rianako Tawita n ukoukorana iroun te Uea ae Tauro are e bakantang, ngke e aki kabooa mwin ana bure. (1 Tamuera 24:2-7) Ma imwin tabeua te tai, ao e aikoa kona n taona nanona. E a rangi ni kainnanoa te amwarake ao te moi ibukia ana aomata, ngaia are e a bubutii buokana ma te karinerine nakon Nabara are te I-Iteraera naba. Ngke e kaekaa te bubutii Nabara n taeka ni kabwainrang ao e rangi n un Tawita, ngaia are e a nakoia kaaini batan Nabara bwa e na irantangaia i bon irouna. E mwaninga are tiringaia aomata aika akea aia bure, bon te katuturaraa i matan te Atua. Ma e tukaki Tawita mani karaoan te kairua ae karuanikai n te ibuobuoki ae roko raoi n taina ae riai mairoun Abikaira are buun Nabara. E oki ana ururing Tawita n noran ana ibuobuoki Iehova n aei, ao e taku nakon neiei: “E na karaoiroaki Iehova, ae Atuaia Iteraera, ae kanakomaiko n te bong aei ba ko na butimaeai: ao e na materaoi rabakaum, ao ko na kabaia, ngkoe ae ko tauai n te bong aei ba N na aki rin n te raraa ni bure iai, ao ba N na aki ira tangau n oini baiu.”—1 Tamuera 25:9-13, 21, 22, 32, 33, BG.
10 Tera reireiara man te rongorongo aei? E kairaki Abikaira iroun Iehova bwa e na tuka Tawita mani karaoan ae kairua. E karaoa naba aei nakoira ni boong aikai. Ni koauana, ti aki riai ni kantaningaa te Atua bwa e na kanakoa temanna ni buokira ngkana ti nang karaoa ae kairua n taai nako. Ao ti aki ataa naba te bwai ae e na karaoia te Atua ni bwaai nako ake a riki nakoira, ke tera ae e na kariaia rikina ibukini kakororaoan ana kantaninga. (Te Minita 11:5) Ma e ngae n anne, ti kona ni kakoauaa raoi bwa e atai baika riki nakoira Iehova n taai nako, ao e na buokira n teimatoa ni kakaonimaki nakoina. E karaunanora ni kangai: “N na reireiko ma n tuangko te kawai ae ko na nakonako iai: N na tuatuangko arom, n tarataraiko.” (Taian Areru 32:8, BG) Tera aron Iehova n anganira taeka n reirei? Ti na kanga ni kakabwaiaaki iai? Ao ti kanga ni koaua raoi bwa e kairiria ana aomata Iehova ni boong aikai? Nora kaekaan titiraki akanne n te boki ae Te Kaotioti.
TI TARARUAAKI N REIREI NI KAIRIRI
11. Tera aron Iehova n atai raoi baika riiriki n aia ekaretia ana aomata?
11 E taekinaki Iesu Kristo ae neboaki n te miitara are n Te Kaotioti mwakoro 2 ao 3, bwa e nori baika riki n ekaretia aika itiua i Asia Minor. E kaotaki naba n te miitara bwa e aki tii nori bitaki Kristo, ma e nori naba baika riiriki. N tabetai, e bon taekinia aomata ao e kamoamoaia, ke e anga te reirei ni kairiri ae kainnanoaki n taai akanne ni kabane. Tera ae kaotaki n aei? Ni kakororaoan te miitara, a tei ekaretia aika itua ibukia Kristian aika kabiraki imwin 1914, ao te reirei ni kairiri are a anganaki ekaretia ake itua, e kaineti naba nakoia aia ekaretia nako ana aomata te Atua ni boong aikai ni kabutaa te aonnaba. Ngaia are ti a kona n taekinna bwa e kaiririia ana aomata Iehova rinanon Natina. Ti na kanga ni kakabwaiaaki man te kairiri anne?
12. Ti na kanga ni kariaia Iehova bwa e na kairirira?
12 Te anga teuana ae ti kona iai ni kakabwaiaaki man ana kairiri ae tatangira Iehova, bon rinanon ara ukeuke n reirei i bon iroura. E katauraoi reirei ni kairiri aika rangi ni bati man te Baibara Iehova, rinanoni booki ake a boreetiaki iroun te toro ae kakaonimaki ma ni wanawana. (Mataio 24:45) Ngkana ti kani kakabwaiaaki mai iai, ti riai ni kabatiai ara tai n ukeuke n reirei ao ni maiuakini baike ti reiakini. Te ukeuke n reirei i bon iroura, bon te anga teuana ae e kona iai Iehova ni ‘kawakinira bwa ti na aki bwaka.’ (Iuta 24) Ko a tia n reiakina te bwai teuana man ara boki ae ko iangoia bwa e boni kaineti nakoim? Butimwaea kaetam mairoun Iehova. N aron raoraom ae e ororea aonnangam bwa e na kaota te bwai teuana nakoim, e kona naba Iehova ni kamanena taamneina bwa e na kairiko ma aomata aika bati naba, nakon te aroaro teuana ke te anua ae kam riai ni katamaroaa riki. Ti kariaia kairakira iroun Iehova ngkana ti butimwaea ana kairiri te taamnei. (Wareka Taian Areru 139:23, 24.) Ni kaineti ma aei, ti wanawana ngkana ti neneri arora n ukeuke n reirei.
13. E aera ngkai ti wanawana ngkana ti neneri arora n ukeuke n reirei?
13 E kona n iraeaki ara tai n ukeuke n reirei i bon iroura, ngkana ti kabanea te tai ae rangi ni bati n te kaakibotu. E taku temanna te tari te mwaane: “E rangi ni kai taonaki te tai n ukeuke n reirei. A rangi ni bati aaro ni kaakibotu ao a boraoi riki ngkai nakon are rimoa. A kona n reke n te TV, te kaombiuta ao te tareboon. Ti a otabwaniniaki iai.” Ngkana ti aki taratara raoi e kona n anaaki teutana imwin teutana, te tai ae kainnanoaki ibukini kananoan ara ukeuke n reirei i bon iroura, ni karokoa ae e a bon toki. (I-Ebeto 5:15-17) Ti riai ni bane n titirakinira ni kangai: ‘I kamanena te tai ibukini kananoan au ukeuke n reirei n Ana Taeka te Atua n taai nako? I tii karaoia ngkana iai au kabwarabwara ke ngkana I katauraoa au reirei ibukin te botaki?’ Ngkana ngaia anne, tao ti kona ni kamanena raoi te tairiki ae kaokoroaki ibukin te taromauri n utu ke te ukeuke n reirei i bon iroura, bwa ti aonga n ukera iai rabakaun Iehova ae katauraoia ibukin tararuaakira ao kamaiuara.—Taeka N Rabakau 2:1-5.
KAKORAKORAAKI N TE KAUNGAUNGA
14. E kanga ni kaotaki n te Baibara bwa e mutiakin ara namakin Iehova?
14 E kaaitara Tawita ma karawawata aika bati ni maiuna. (1 Tamuera 30:3-6) E kaotaki n te Baibara bwa e ataaki ana namakin Tawita iroun Iehova. (Wareka Taian Areru 34:18; 56:8.) E atai naba ara namakin te Atua. E boni kaanira ngkana a ‘uruaki nanora’ ke n ‘raraoma taamneira.’ A kabebeteaki nanora n aei n aron Tawita ngke e anene ni kangai: “N na kukurei ma ni kimareirei n am atataiaomata: Ba Ko tarataraa kananoangau; ko ata marakin tamneiu.” (Taian Areru 31:7, BG) E bati riki ae karaoia Iehova nakon tii ataakin rawawatara. E kateimatoaira rinanoni kabebetean nanora ao kaungaakira. Te anga teuana are e karaoa iai aei, bon rinanoni bobotaki ni Kristian.
15. Tera reireiara man rongorongon Ataba?
15 E kabwarabwaraaki n rongorongon te tia areru ae Ataba te kakabwaia ae reke man irirakini bobotaki. Ibukini kaatuuan ana iango Ataba i aon aaro n ribuaka, e a kairaki iai bwa e na nanououa ibukini kakawakin te beku ibukin te Atua. E rikirake ni bwara nanon Ataba. E kabwarabwaraa ana namakin ni kangai: “Ngke e rawawata nanou, ao kaanga I a teke iai.” Ibukin anne, e a kuri ni katoka ana beku ibukin Iehova. Ma tera ae buoka Ataba bwa e na manga eti ana iango? E taku: ‘I rin n umwan te Atua ae tabu.’ Ni menana i buakoia raona n taromauria Iehova, e a manga nakoraoi ana iango. E noria bwa a kakabwaiaaki ake a buakaka tii i nanon te tai ae kimototo, ma e na boni kaetii taekaia aomata akanne Iehova. (Taian Areru 73:2, 13-22, BG) Ti kona naba n namakina anne. E kona ni bwara nanora n te rawawata ae ti kekeiaki ribuakona, ibukin aaro n ribuaka man ana waaki Tatan. Ti a kaungaaki ao ni buokaki ni bobotakira ma tarira, bwa ti na kateimatoa kukureira ngkai ti beku ibukin Iehova.
16. Ti na kanga ni kakabwaiaaki man ana katoto Anna?
16 Ma tera ae ko na karaoia ngkana iai te kangaanga n te ekaretia ae tuka rokom nakoni bobotaki? Tao ko a kakerikaakaki mani mwiokoam ae okoro ao ko a maamaa, ke iai unraam ma te tari te mwaane ke te tari te aine. Ngkana anne ae riki, kakairi n ana katoto Anna ae rangi n ibuobuoki. (Wareka 1 Tamuera 1:4-8, BG.) Uringnga are e rangi ni maraki nanon neiei n te baere e riki n ana utu, ae irekereke ma Beninna ae ana kairiribai are buun naba Erekana. E korakora riki namakinan aei iroun Anna ni katoa ririki, ngkana a nako kaain ana utu n angakarea nakon Iehova i Tiro. E rangi n rawawata iai Anna n te aro are “e tang, ao e aki amarake.” Ma e bon aki kariaia te aro aei bwa e na tuka taromaurian Iehova irouna. E nora kakaonimakin neiei Iehova ao e kakabwaiaa.—1 Tamuera 1:11, 20.
17, 18. (a) N aaro raa ake a reke iai kaungara ni bobotaki n te ekaretia? (b) Tera am namakin n ana tangira Iehova ni katauraoan te ibuobuoki ibukini kamaiuira?
17 A riai Kristian ni boong aikai ni kakairi n ana katoto Anna. Ti riai ni kakaonimaki n iririi bobotaki. N aron ae ti a tia n rinanona, a reke taeka ni kaungaunga aika kakawaki mani bobotaki. (I-Ebera 10:24, 25) A kabebeteaki naba nanora n aia tangira raora ni Kristian. A ringaki nanora n te bwai ae ti ongoraeia n te kabwarabwara ke taeka ni kaunganano. A bae ni kaotiota aia akoi raora n onimaki n aroia ni kakauongo raoi nakoira ke n taekin taeka ni kabebetenano n ara maroro imwain ao imwini bobotaki. (Taeka N Rabakau 15:23; 17:17) A kaungaaki nanora ngkana ti anene ni kanenei bwanaara nakon Iehova. Ngkana ti taonakinako n “iango n raraoma,” ti a kainnanoa riki te kaungaunga ae ti karerekea ni bobotaki ike e a kateimatoaira iai Iehova n ‘ana taeka ni kabebetenano,’ ao e boutokaira bwa ti na teimatoa ni kakaonimaki.—Taian Areru 94:18, 19, BG.
18 Ngkai ti a mano raoi n ana tangira Atuara, titeboo iai ara namakin ma te tia areru ae Ataba are e anene nakon Iehova ni kangai: “Ko tautaua ataiu. Ane Ko na kairirai n am taeka n reirei.”(Taian Areru 73:23, 24, BG) Ai kakaitaura ngaira ngkai e tararuaira Iehova ibukini kamaiuara!
[Taamnei iteraniba 29]
Ko a tia naba ngkoe ni katikaki iroun Iehova
[Taamnei iteraniba 30]
Ti tararuaaki ni maiuakinan ana reirei ni kairiri te Atua
[Taamnei iteraniba 31]
Ti kateimatoaaki ni kaungaunga ake ti anganaki