A Riai n Irekereke Kristian ma te Waaki n Tautaeka ni Boong Aikai?
A AKI irekereke Kristian ni koaua ni boong aikai ma te waaki n tautaeka. Bukin tera? Ibukina bwa a kakairi n ana katoto Iesu. E taekina ae kangai Iesu ibukina: “I aki arona aroia kaain te aonnaba.” Ao e a manga kangai ibukia taan rimwina: “Kam aki arona aroia kaain te aonnaba.” (Ioane 15:19; 17:14) Iangoi bukina tabeua ngkai a aki riai n irekereke Kristian ma te waaki n tautaeka.
1. Iai tian aia konabwai aomata. E taekinaki n te Baibara bwa akea aia konabwai ke riaia aomata n tautaekania i bon irouia. E korea ae kangai te burabeti are Ieremia: “Tiaki ana bwai te aomata ae nakonako te kaeti eueutakina.”—Ieremia 10:23, BG.
Ngkai a aki karikaki aomata bwa a na nakoraoi maiuia n oini korakoraia, a aki naba karikaki bwa a na nakoraoi aia tautaeka i bon irouia. E taekina ae kangai te tia korea rongorongon rimoa ae David Fromkin ibukin tianakin aia konabwai taian tautaeka: “A kaainaki tautaeka irouia aomata ao a bae ni kabwaka, ao a aki onimakinaki baike a kantaningai ibukin taai aika imwaia. A kaotiota mwaakaia ma e tiatianaki.” (The Question of Government) Maroaka ae ti kauringaki n te Baibara bwa ti na aki onimakinia aomata!—Taian Areru 146:3.
2. Iai mwaakaia taanga n taamnei aika buakaka n taai aikai. E kakoauaa mwaakan te Riaboro Iesu ngke e anganaki bwa e na tautaekani taian tautaeka iroun Tatan n te aonnaba. Ni koauana, e taekinaki Tatan iroun Iesu n te taina rimwi riki bwa, “te tia tautaekania kaain te aonnaba.” Tabeua te ririki imwina, e kabwarabwaraaki Tatan iroun te abotoro Bauro bwa, “atuan te waaki ae ngkai i aon te aba.” (Ioane 14:30; 2 I-Korinto 4:4) E korea ae kangai Bauro nakoia raona ni Kristian: “Ti kaunrabwata ma . . . taan tautaekana te aonnaba ae rotongitong aei, ao taanga n taamnei aika buakaka i karawa.” (I-Ebeto 6:12) A aki ataia botannaomata ae taanga n taamnei aika buakaka, bon taan tautaekana te aonnaba aei. E na kanga te koaua anne n rotii arora n iangoan te waaki n tautaeka?
Iangoa te kabotau aei: N aroni kaibuke aika uarereke ake a uouotaki n airan taari ae korakora, a kairaki naba aia waaki n tautaeka aomata irouia taanga n taamnei aika buakaka mani korakora aia anainano. Ao n aron ae e karako ae a kona ni karaoia kaimoa ni kaibuke akanne ibukini bitakin aira aika korakora akanne, e karako naba ae a kona ni karaoia taan tautaeka ni katoki kangaanga aika kakaiaki n te aonnaba, ke ni kainaomataia mani mwaakan Tatan ao ana taimonio. A kakorakoraia taanga n taamnei aikai ni babakanikawaiia botannaomata, ike e a kona iai n “reke kain aon te aba.” (Te Kaotioti 12:12) Mangaia are e tii kona n reke te bitaki ni koaua iroun te aomata ae mwaaka riki nakon Tatan ma ana taimonio. Bon Iehova ae te Atua te Aomata anne.—Taian Areru 83:18; Ieremia 10:7, 10.
3. A boutokaa tii Ana Tautaeka n Uea te Atua Kristian ni koaua. E ataia Iesu ma taan rimwina bwa e na katea ana tautaeka te Atua i karawa, are e na tautaekana te aonnaba ni kabane n te tai are e namatia. E aranaki te tautaeka aei n te Baibara bwa Ana Tautaeka n Uea te Atua, ao e kaotia ae e a tia n rineaki Iesu Kristo bwa te Uea iai. (Te Kaotioti 11:15) Kioina ngkai a na rotaki aomata nako n te Tautaeka n Uea anne, e a tataekina “te rongorongo ae raoiroi [Iesu] ae taekan ana tautaeka n uea te Atua,” bwa te boto n iango n ana angareirei. (Ruka 4:43) E reireinia naba taan rimwina bwa a na tataro ni kangai: “E bia roko am tautaeka n uea.” Bukin tera? Ibukina bwa i aan te Tautaeka n Uea anne, e na taraia raoi te Atua bwa e na kakororaoaki nanona i karawa ao i aon te aba.—Mataio 6:9, 10.
Tera ngkanne ae na riki nakon aia tautaeka aomata? E kaekaaki aei n te Baibara bwa a na kamaunaaki taian tautaeka “n te aonnaba ni kabutaa.” (Te Kaotioti 16:14; 19:19-21) Ngkana e kakoauaa raoi temanna bwa e na kamaunai aia waaki n tautaeka aomata ni kabane Ana Tautaeka n Uea te Atua, n etina e na bon aki boutokai waaki n tautaeka akanne. Ma ngkana e boutokai aia waaki n tautaeka aomata ake a na kamaunaaki, e a boni karitei iai nakon te Atua.
[Reirei ae kakawaki n iteraniba 6]
A kakorakoraia Ana Tia Kakoaua Iehova ni boutokaa Ana Tautaeka n Uea te Atua ma tiaki te waaki n tautaeka