E Aera Ngkai e Teimatoa n Riki te Babakanikawai?

“E taua aron te aomata temanna te aomata temanna ni karekea oini kaina iai.”—⁠TE MINITA 8:​9, BG.

E TONU raoi kabwarabwaraan te kibuntaeka anne ma rongorongon aia tautaeka aomata. E bukinaki te tautaeka n rikini karawawata aika rangi ni bati, ao te kananokawaki ae korakora. Inanon ririki aika bati, a aki toki aomata aika a taku bwa a buokira ma a bon aki, ake a tia ni kataia ni kanakoraoa ana waaki te botannaomata ma a tutukaki n aroia ae te mwangainrang ao te babakanikawai. Bukin tera bwa e riki anne? E aera ngkai e teimatoa n riki te babakanikawai? Bon ibukini kariri aika buakaka aika tenua aikai.

1. Te kariri man te bure.

E kabwarabwaraaki raoi n te Baibara bwa ti “bane n ituaki n te bure.” (I-Rom 3:⁠9) Te bure are ‘e memena i nanora,’ bon ai aron te aoraki ae akea katokana are ti karekea man ara utu. E “tautaeka” te bure bwa kaanga te uea i aoia aomata i nanoni nga ma nga te ririki. E teimatoa ni mwakuri ana “tua” i nanora. A bati aika kairaki ni kani karaoa te bure bwa a na moanibwai nanoia ke ni kabotoi maiuia i aoni karekeani bwaikorakin te maiu, ke te nakoa ae rietata n te aro are a a kakeai bongaia tabemwaang.​—⁠I-Rom 5:21; 7:​17, 20, 23, 25.

2. Te kariri man te aonnaba ae buakaka ae ti maeka iai.

E kaotiotaki te mwangainrang ao te bangaomata n ara aonnaba aei. Ma a noria tabeman bwa e kangaanga kaokoroaia ma aomata ake i rarikia n te aono anne. A kairaki n tangiran te bangaomata n te aro are e a korakora tangiran te mwaaka n tautaeka. E korakora naba tangiran te mwane ae bati ao bwaikorakin te maiu nakon are a boni kainnanoia. E kananokawaki bwa a kukurei ni maiuakina te aki kakaonimaki n uaiakinan tiia akanne. N oneani mwin are a na rarawa aomata akanne nakoni kariri aika buakaka, a “kakairi iroun te koraki ae bati ni karaoa ae buakaka.”​—⁠Te Otinako 23:​2, BG.

3. Te kariri mairoun Tatan te Riaboro.

E “burebureiia kaain te aonnaba ni kabutaa” Tatan ae te anera are karitei. (Te Kaotioti 12:⁠9) E kakorakoraa ni burebureiia aomata. E kona naba ni kakorakoraa ni mwamwanaa te aomata n te aro are e a anaa nanona nakon tangiran te maiuraoi ao te kaubwai, ni karokoa ae e a karaoa te mwakuri ni babakanikawai.

E nanonaki n anne bwa bon ana taore Tatan ngaira are ti kona n ongeaba irouna ngkana e tua te bwai teuana nakoira? Ti na reiakina kaekaana n te kaongora are imwina.