E na Bon Toki te Babakanikawai!

“Ko na kaantaninga Iehova, ma ni kawakina ana aro . . . Ngkana a teweaki nako akana buakaka, ao ko na noria.”​—⁠TAIAN ARERU 37:​34, BG.

KO RARAOMA n aroia aomata aika bati ake a iangoia bwa e na aki katokaki ao ni kamaunaaki te babakanikawai? Ngkana ngaia anne, e mataata raoi bukin te raraoma anne. Ma ngkekei ni karokoa ngkai, a a tia aomata ni katai waaki ni kairiri n tautaeka nako. Ma a bon aki kona naba ni katoka te babakanikawai. Iai te kantaninga bwa n te tai teuana ao a nang bane aomata ni kakaonimaki i marenaia?

E kakukurei bwa e kaekaaki anne n te Baibara bwa bon iai! Ti tuangaki iai bwa e na waekoa te Atua ni kamauna te babakanikawai n ara aonnaba aei. E na kanga ni karaoa anne? Bon rinanon te tautaeka i karawa are ana Tautaeka n Uea are e nang onea iai ara aonnaba aei. Bon aei te Tautaeka naba are e reireinia taan rimwina Iesu bwa a na tataroia. E taekina ae kangai Iesu n te tataro are e atongaki n tabetai bwa Ana Tataro te Uea ke Tamara are i Karawa: “E na roko ueam. E na tauaki am taeka i aonaba.”​—⁠ Mataio 6:​10, Te Baibara.

E taetae ni burabetinaki ae kangai n te Baibara ibukin te tia Tautaeka ae Iesu Kristo n te Tautaeka n Uea anne: “E na kamaiua ane e kai nanona ngkana e bubuti; Ma ane akea ana bwai, ane akea te tia buokia. Ane E na nanoangaiia akana mamara ma akana a kai nanoia, Ao E na kamaiu tamneiia akana a kai nanoia. E na kamaiu tamneiia man te babakanikawai ma te tiritiri.” (Taian Areru 72:​12-14, BG) Nora aron Iesu n nanoangaiia aomata ake a rotakibuaka n te babakanikawai bwa e na boni karaoa te bwai teuana ibukin te ribuaka anne! E aki ngkanne kabebetenano anne?

E na boni katokaki te babakanikawai n ara aonnaba aei n Ana Tautaeka n Uea te Atua iroun te tia Tautaeka ae mwaaka ao ni mwamwannano. N te aro raa? Bon rinanoni kamaunaakini baika a karika te babakanikawai aika tenua.

Te Kariri Man te Bure

N te tai aei moa, ti riai ni bane ni buakana kani karaoan ae bure i nanora bwa e kairira nakon te bangaomata. (I-Rom 7:​21-23) Ma bon iai naba aomata aika raoiroi aika a kani karaoa ae riai. A kaotiota onimakinani kakawakin ana karea ni kaboomwi Iesu are katutuan raraana ao ni kona ni karekea iai kabwaraan aia bure.a (1 Ioane 1:​7, 9) A na karekei kakabwaiaaia aomata akanne man ana mwakuri n tangira ae korakora te Atua, n aron ae ti warekia n Ioane 3:16 ae kangai: “E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane onimakinna, ma e na reke irouna te maiu are aki toki.”

E na karaoa te bwai ae rangi n tamaroa te Atua ibukia aomata aika kakaonimaki. E na bon taeka mwin te bure ni kabane n rokon te waaki ae boou i aon te aba, e na karikirakea taraaia ae raoiroi ao kororaoia aomata aika kakaonimaki. (Itaia 26:9; 2 Betero 3:13) E na aki manga kaririaki temanna n te bure bwa e na babakanikawai. A na “kainaomataaki baika karikaki [aika aomata aika kakaonimaki] man te tautoronaki i aan te mka,” i aan ana kairiri Ana Tautaeka n Uea te Atua.​—⁠I-Rom 8:​20-22.

Te Kariri Man te Aonnaba ae Buakaka ae Ti Maeka Iai

E kananokawaki bwa a bati aomata ni boong aikai aika a boni karawawataia tabemwaang. A bwainikirinia aomata aika mangori ma ni maiu ni kainnano, ao a kairaraangia tabemwaang bwa a na babakanikawai naba. A kaungaaki koraki akanne n te Baibara ni kangai: “Ke e kaki ana makuri aika a bubuaka ma ana iango n tiritiri te aomata.” E beritanaki n te Baibara bwa e na “kaababaka kabaran” buure te Atua ngkana a rairi nanoia akana babakanikawai.​—⁠Itaia 55:​7, BG.

E ngae n anne, e na aki katikuia aomata akana a rawa ni bitii aroaroia te Atua, ma e na boni kamaunaia. E na karaoa anne Ana Tautaeka n Uea te Atua, ike e a kakoroaki iai nanon te berita n te Baibara aei: “Ko na kaantaninga Iehova, ma ni kawakina ana aro . . . Ngkana a teweaki nako akana buakaka, ao ko na noria.”b (Taian Areru 37:​34, BG) A na aki manga rotakibuaka taan taromauria te Atua aika kakaonimaki n te babakanikawai ngkana a a kamaunaaki aomata aika buakaka.

Te Kariri Mairoun Tatan te Riaboro

Tatan te Riaboro boni karoton te buakaka i buakoia taani bure aika aki raraoma. Ai kakaitaura ngaira ngkai e na waekoa ni kainaki Tatan iroun Iehova bwa e aonga n aki kariria aomata. N tokina, e na boni kamaunaaki n aki toki iroun te Atua. E na aki manga kariria aomata bwa a na babakanikawai te anera ae rangi n iowawa anne.

Ni koauana, e kona n taraaki bwa bon tii te iango ae karioaki are e na kamaunai baika a karika te babakanikawai te Atua. Ko kona n iango ni kangai: ‘E koaua bwa e kona ni karaoi bitaki aikai te Atua? Ngkana ngaia anne, e aera e aki kamani karaoia?’ A rangi ni manena titiraki aikai, ao a tauraoi kaekaaia aika karaunano man te Baibara.c Ti kaungako bwa ko na neneri baika reiakinaki n te Baibara ibukin te tai ae e a kaan roko, are a nang akea iai te babakanikawai.

[Kabwarabwara mai nano]