Kakaitaua Iehova Ibukin Ana Kakaonimaki Ni Koaua Ao Kabwaraani Buure Irouna

1, 2. (a) E aera bwa a kakawaki iroura raoraora aika kakaonimaki ni koaua ao aika a kabwarai buure? (b) Baikara titiraki aika ti na maroroakini?

KO NA kanga ni kabwarabwaraa te rao ni koaua? E taku temanna te tari te aine ae te Kristian ae Ashley: “Irou ngai, te rao ni koaua bon te aomata ae tatauraoi ni buokiko ao e kabwarai am bure ngkana ko kairua.” A rangi ni kakawaki iroura raoraora aika kakaonimaki ao aika a kabwarai buure. A karekea nakoira namakinan ae ti kamanoaki ao n tangiraki.​—Taeka N Rabakau 17:17.

² Iehova bon Raoraora ae te kabanea ni kakaonimaki ni koaua ao e kabwarai buure. Bon aei aroarona are e taekinna te tia areru ni kangai: “Ko raoiroi, te Uea, ao Ko kani kabara buure, Ao e bati am nanoanga [ke te “tangira ae kona n onimakinaki,”] nakoia akana weteiko ni kabaneia.” (Taian Areru 86:​5, BG) Tera ae nanonaki n te kakaonimaki ni koaua ao kabwaraani buure? E kanga Iehova ni kaotiotii aroaro aika anainano aikai? Ao ti na kanga ni kakairi n ana katoto? E na kakorakoraaki tangiran Raoraora ae Iehova mani kaekaan titiraki aikai. A na buokira naba ni kakorakorai ara iraorao i marenara.​—1 Ioane 4:​7, 8.

E KAKAONIMAKI NI KOAUA IEHOVA

3. Tera ae nanonaki n te kakaonimaki ni koaua?

³ Te kakaonimaki ni koaua bon te aroaro ae nako man te nano are irekereke ma te tangira, te kakaonimaki ao te onimakinaki. E nanomatoa te aomata ae kakaonimaki ni koaua. E kaania ao n nimta temanna (ke te bwai teuana) ma te tangira, e ngae naba ngke e aitara ma kangaanga. Eng, Iehova bon ‘Teuare e kakaonimaki ni koaua’ ao moan te kakannato.​—Te Kaotioti 16:5.

4, 5. (a) Tera aron Iehova ni kaotiota te kakaonimaki ni koaua? (b) Ti na kanga ni karekei korakorara man iaiangoan aroaron te Atua ae kakaonimaki ni koaua?

⁴ E kanga Iehova ni kaotiota te kakaonimaki ni koaua? E bon tuai mani kitania taan taromauria aika kakaonimaki. E boni kakoauaa te tia taromauria ae te Uea are Tawita bwa e kakaonimaki ni koaua Iehova. (Wareka 2 Tamuera 22:​26, BK.) N taai ake e kataaki iai Tawita, e boni kakaonimaki ni koaua Iehova ni kairiria, e kamanoa ao e kamaiua. (2 Tamuera 22:1) E ataia Tawita bwa e irekereke ana kakaonimaki ni koaua Iehova ma ae bati riki nakon tii taian taeka. E aera ngke e kaotiota te kakaonimaki ni koaua Iehova nakon Tawita? Ibukina bwa Tawita bon ‘teuare e kakaonimaki.’ E kakawaki iroun Iehova kakaonimakia ni koaua taan taromauria ao e a manga kaotiota naba te kakaonimaki ni koaua nakoia.​—Taeka N Rabakau 2:​6-8.

⁵ Ti kona ni karekei korakorara man iaiangoan aron Iehova ni kaotiota te kakaonimaki ni koaua. E taku temanna te tari te mwaane ae kakaonimaki ae Reed: “I bon rangi ni buokaki ngke I wareka aron Iehova ni buoka Tawita n taai ake e karawawataaki iai. E boni kateimatoaaki n taai nako Tawita iroun Iehova n taai ake e birinako iai, ao ni katei maeka i nanon ao i tinanikuni bwanganimatang. I rangi ni kaungaaki n te rongorongo anne! I kauringaki iai naba bwa n aki ongeia bwa tera ae kona n riki nakoiu, ao e ngae naba ngkana e taraa n rawawata, ma e bon tauraoi Iehova ni buokai tii ngkana I teimatoa ni kakaonimaki ni koaua nakoina.” Akea te nanououa bwa ko namakina naba anne.​—I-Rom 8:​38, 39.

6. E kaotiota riki te kakaonimaki ni koaua Iehova n aaro raa, ao tera kakabwaiaaia iai taan taromauria?

⁶ Aaro raa ake e kaotiota riki iai te kakaonimaki ni koaua Iehova? E kakaonimaki ni koaua nakon ana kaetieti. E karau nanora ni kangai: “Ai aroarou naba anne ni [karokoa] ami tai ni kara.” (Itaia 46:​4, BK) E karaoi ana babaire n taai nako aika boto i aon ana kaetieti aika aki bibitaki ibukin te eti ao te kairua. (Maraki 3:6) Irarikin anne, e kaotiota te kakaonimaki ni koaua Iehova n arona n teimatoa ni kakoroi bukin ana berita. (Itaia 55:11) A bane ni kakabwaiaaki taan taromauria Iehova aika kakaonimaki man ana kakaonimaki ni koaua Iehova. N te aro raa? Ngkana ti nimti ana kaetieti Iehova n aron ara kabanea n tamaroa, ti a kona ni kakoauaa iai bwa e na kakoroa bukin ana berita are e na kakabwaiaira.​—Itaia 48:​17, 18.

KATOTONGA IEHOVA NI KAKAONIMAKI NI KOAUA

7. Tera te anga teuana ae ko kona ni katotonga iai te Atua ni kakaonimaki ni koaua?

⁷ Ti na kanga ni katotonga Iehova ni kakaonimaki ni koaua? Te anga teuana boni waekoara ni buokiia te koraki ake a aitara ma kangaanga. (Taeka N Rabakau 3:27) N te katoto, iai raom n te onimaki ae ko ataia bwa e bwara nanona, tao ibukin aorakina, kaitaraana irouia ana utu, ke baike e kabwaka iai? E aera ko aki biririmoa n taekin tabeua “taeka aika raraoi, aika taeka aika kabebetea te nano” nakoina? (Tekaria 1:​13, BG)a Ni karaoan anne, ko a kaotiko iai bwa bon te rao ni koaua ngkoe ao ko kakaonimaki ni koaua, ao n “nimnim riki nakon te tari.”​—Taeka N Rabakau 18:​24, BG.

8. Ti na kanga ni katotonga Iehova ni kakaonimaki ni koaua n te katoto n te mare?

⁸ Ti kona naba ni katotonga Iehova ni kakaonimaki ni koaua nakoia aika tangiraki iroura. N te katoto, ti ataia ae ti riai n teimatoa ni kakaonimaki nakoia buura ngkana ti a tia ni mare. (Taeka N Rabakau 5:​15-18) Ti bon aki kan toua naba te kawai ae ti na kairaki iai nakon te wene ni kimoa. (Mataio 5:28) Irarikin anne, ti kaotiota te kakaonimaki ni koaua nakoia raora n te onimaki n arora ni katoka te winnanti ae kammaraki ke te uarao, te rarawa ni kabutii nako aeka n taetae aika bubuaka ke ni kakauongo naba iai.​—Taeka N Rabakau 12:18.

9, 10. (a) Antai ae ti kani kateimatoa riki kakaonimakira ni koaua nakoina? (b) E aera bwa e aki bebete n taai nako te ongeaba n ana tua Iehova?

⁹ Te bwai ae moan te kakawaki, ti boni kan teimatoa ni kakaonimaki ni koaua nakon Iehova. N te aro raa? Bon rinanon ara kakorakora n iaiangoi bwaai n aron iangoaia irouna, tangirani baike e tangiri ao ribaakini baike e ribai, ao imwina ai boni kaboraoani maiura ma aaro akanne. (Wareka Taian Areru 97:10.) Ti na kan ongeaba riki n ana tua Iehova ngkana ti kakorakoraira ni kaboraoi ara iango ao ara namakin, n te aro are ai titeboo ma ana iango ao ana namakin.​—Taian Areru 119:104.

¹⁰ Ni koauana, e na bon aki bebete te ongeaba n taai nako n ana tua Iehova. Ti na bae ni kabokorakora bwa ti aonga n teimatoa ni kakaonimaki ni koaua. N te katoto, iai taari tabeman aika Kristian aika akea buuia aika a kani mare, ma a aki kona moa ni karekei buuia aika a tau i buakoia taan taromauria Iehova. (1 I-Korinto 7:39) E kona n noria te tari te aine ae tuai mare bwa a aki toki raona ni mwakuri aika tiaki kaain te onimaki ni kaboboa nakoia mwaane tabeman ake a a tau nakon te mare. Tao e teimatoa te tari te aine aei ni kabokorakora ma namakinan te maroaa. Ma e ngae n anne, e teimatoa ni kamatoaa nanona ae eti i matan Iehova. A aki ngkanne kakawaki iroura aeka ni katoto aika koaua aikai ni kaineti ma te kakaonimaki ni koaua? Ni koauana, a na kakabwaiaaki iroun Iehova aomata nako ake a teimatoa ni kakaonimaki i buakoni kangaanga.​—I-Ebera 11:6.

E KABWARAI BUURE IEHOVA

11. Tera ae nanonaki ni kabwaraani buure?

¹¹ Teuana mai buakon aroaron Iehova ae anainano bon tauraoina ni kabwarai buure. Tera ae nanonaki ni kabwaraani buure? E nanonaki iai kabwaraan ana bure te aomata ae kauniko ngkana e raraoma ni koaua. Tiaki nanon anne bwa e na tarariaoa te bure ke ni kakewea te bwai ane riki, te aomata ae kabwarai buure. Ma e na motinnanoia bwa e na kakeaa unna mai nanona. E taekinaki Iehova n te Baibara bwa e ‘kani kabwarai aia bure’ te koraki ake a kaotiota te rairannano ni koaua.​—Taian Areru 86:​5, BG.

12. (a) E kanga Iehova ni kaotiota kabwaraani buure? (b) Tera ae nanonaki ni ‘kamaunaakin’ ana bure temanna?

¹² Tera aron Iehova ni kaotiota kabwaraani buure? Ngkana e kabwarai buure Iehova, e boni karaoia n te aro ae ‘abwabwaki’ ao e kabwarai ni kabane ao n aki toki. (Itaia 55:​7, BG) Ti kanga n ataia bwa e kabwarai buure ni kabane Iehova? Iangoa te karaunano ae ni Mwakuri 3:19. (Warekia.) E kaumakiia naake a ongora irouna te abotoro Betero bwa a na ‘rairi nanoia ao ni bitii aroia.’ Ngkana e raira nanona ni koaua te tia bure, e rang ni korakora nanona n uringaaba ni maiuna ae bure. E motinnanoia naba bwa e na aki manga karaoa te bure anne. (2 I-Korinto 7:​10, 11) Irarikin anne, e kaungaaki te tia bure ae raira nanona ni koaua bwa e na ‘bitii arona’ ike e a kitana iai maiuna ae bure ao n uaiakina te maiu ae kukurei iai te Atua. Ngke arona bwa a kaotiota te rairannano ni koaua naake a ongora irouni Betero, tera mwina? E taekinna Betero bwa a kona ni “kamaunaaki” aia bure. E reke te taeka anne man te taeka ni Kuriiti ae nanona “kanakoa ke kakeaa matana.” Ngaia are ngkana e kabwarai buure Iehova, e na bon aki uringi buure ake rimoa. E boni kabwarai buure ni kabane.​—I-Ebera 10:22; 1 Ioane 1:7.

13. Tera karauan nanora man taeka aikai: “N na aki manga uring aia bure”?

¹³ Ti kanga n ataia bwa e kabwarai buure n aki toki Iehova? Iangoa ana taetae ni burabeti Ieremia ibukin te berita ae boou are e karaoaki ma Kristian aika kabiraki, ike e a reke iai angani kabwaraan aia bure te koraki ake a kaotiota onimakinan te karea ni kaboomwi. (Wareka Ieremia 31:​34, BG.) E taku Iehova: “N na kabara aia buakaka, ao N na aki manga uring aia bure.” Ai ngaia are e karaunanora Iehova bwa ngkana e kabwarai ara bure, e na bon aki manga karekei kaira ibukini buure akanne n taai aika imwaira. E na aki manga uringi ara bure n te aro are e na kabuakakaira ke n okioki ni katuuaaeira. Ma e boni kabwarai buure akanne Iehova ao e kaaki i akuna n aki toki.​—I-Rom 4:​7, 8.

14. Ti na kanga ni karekei kabebetean nanora man iaiangoani aron Iehova ni kabwarai buure? Taekina te katoto.

¹⁴ A kona ni kabebeteaki nanora n iaiangoan aron Iehova ni kabwarai buure. Iangoa te katoto aei. N ririki aika bati rimoa, ao e kabaneaki man te ekaretia te tari te aine ae ti na aranna bwa Elaine. Tabeua te ririki imwina, e a manga kaokaki. E taku: “E ngae ngke I taekinna i nanou ao nakoia naba tabemwaang ae I kakoauaa bwa e kabwarai au bure Iehova, ma I namakinna n taai nako bwa n itera tabeua e bon raroa nako mairou ke e kaan riki ma tabemwaang ao e kinaaki raoi riki irouia.” Ma e ngae n anne, e reke kabebetean nanon Elaine mani warekan ao iaiangoani kabotau tabeua ake a kamanenaaki n te Baibara ibukini kabwarabwaraan aron Iehova ni kabwarai buure. E taku riki: “I a namakina tangirau ao akoau iroun Iehova n te aro ae I tuai man namakinna mai mwaina.” E rangi ni kaungaaki riki nanona n te iango aei: “Ngkana e kabwarai ara bure Iehova, ti riai n aki iangoia bwa e tiku memean te aeka ni bure anne i aora n ara bong ni maiu ni kabane.”b E taku: “I a ataia ae I tuai kakoauaa ae e kona ni kabwarai au bure ni kabane Iehova, ao I iangoia ngkoa bwa N na uouota te rawawata aei n au bong ni maiu ni kabane. I ataia bwa e kainnanoaki te tai teutana ibukin aei, ma I a moanna n namakinna ae I boni kona ni kaaniai riki ma Iehova, ao I namakinna bwa e a tia n anaaki te rawawata anne mai aou.” Ai boni korakorara ana tangira ao kabwaraani buure iroun Atuara ae ti beku ibukina!​—Taian Areru 103:9.

KATOTONGA IEHOVA NI KABWARAI BUURE

15. Ti na kanga ni katotonga Iehova ni kabwarai buure?

¹⁵ Ti kona ni katotonga Iehova ni kabwarai buure ngkana ti motinnanoia bwa ti na ikabwarabure i marenara ngkana iai bukini karaoana. (Wareka Ruka 17:​3, 4.) Uringnga bwa ngkana e kabwarai buure Iehova, e boni mwanuokin ara bure n te aro are e aki manga kabuakakaira iai. Ngkana ti kabwarai aia bure aomata, ti kona naba ni mwanuokin n te aro are ti kaaki i akura ao n aki manga tataekinna n taai aika imwaira.

16. (a) E koaua ae kabwaraani buure e nanonaki iai tarariaoani buure ke kariaiakani karaoani mwakuri n ribuaka nakoira? Kabwarabwaraa. (b) Tera ae ti riai ni karaoia ngkana ti tangiria bwa a na kabwaraaki ara bure iroun te Atua?

¹⁶ E aki nanonaki ni kabwaraani buure bwa ti na tarariaoi buure ke ti na kariaia tabemwaang bwa a na karaoi mwakuri n ribuaka nakoira. Ma e nanonaki iai motinnanoan ae ti na katoka unra. Ma ni koauana, ti riai ni katotonga Iehova ni kabwarai aia bure aomata bwa a aonga ni kabwaraaki naba ara bure irouna. (Mataio 6: 14, 15) Bwa n etina, e kairaki Iehova n ana nanoanga bwa e na uringira ae “taano ngaira.” (Taian Areru 103:​14, BG) Ao ngkanne, tiaki bwa ti na kairaki naba n te nanoanga bwa ti na kamwaawai nanora ibukin aia bure aomata n te aro are ti a kabwarai aia bure mai nanora?​—I-Ebeto 4:32; I-Korote 3:13.

17. Tera ae kona ni buokira ngkana ti a tia ni kammarakaki iroun raora n te onimaki?

¹⁷ Ni koauana, e bon aki bebete n taai nako kabwaraani buure. E bon taraa ni kangaanga naba irouia tabeman Kristian ake a kabiraki n te moan tienture bwa a na raoiakin aia kangaanga. (I-Biribi 4:2) Tera ae kona ni buokira ngkana ti a tia ni kammarakaki iroun raora n te onimaki temanna? Iangoa Iobi. E rangi ni maraki nanona ngke a tabeki taeka ni bukibuki ni kewe nakoina naake aongkoa raoraona aika Eribati, Biretata, ao Toba. (Iobi 10:1; 19:2) N tokina, a a boaaki taani bukibuki ni kewe akanne iroun Iehova. E kanakoia nakon Iobi bwa a na anga aia karea ibukin aia bure. (Iobi 42:​7-9) Ma iai naba te bwai ae e tangiria Iehova bwa e na karaoia Iobi. Bwa tera? E tuangaki Iobi iroun Iehova bwa e na tataro ibukia naake a bukinna. E karaoa nanon are e tuangaki Iobi iroun Iehova, ao e a kakabwaiaaki ibukin nanona ni kabwarai buure. (Wareka Iobi 42:​10, 12, 16, 17.) Tera reireiara iai? Ti kona ni buokaki n te tataro ae nako mai nanora bwa e na toki unra iroun ae kaunira.

TEIMATOA NI KAKAITAU MA NANOM NI KABANE IBUKIN AROARON IEHOVA

18, 19. Ti na kanga n teimatoa ni kakorakorai nanora ni kakaitau ibukin aroaron Iehova aika anainano?

¹⁸ A rangi ni kaungaaki nanora ni maroroakinan aroaron Iehova ae tatangira aika kakaokoro. Ti a tia n noria bwa e kai kawaraki, e aki inanonano, e tituaraoi, e nanoraoi, e kakaonimaki ni koaua, ao e kabwarai buure. Ni koauana, ti a bon tia n rinanoi tii tabeua mai buakoia. Ti kona ni karekea te kimwareirei man reiakinan riki taekan Iehova n aki toki. (Te Minita 3: 11) Ti inanoi ma are e koreia te abotoro Bauro ni kangai: “Ai batira kaubwain te Atua ma wanawanana ao ana ataibwai!” Ti kona n taekina naba anne ibukin ana tangira te Atua ao aroarona aika onoua ake ti a tia ni maroroakin ni kaongora aikai.​—I-Rom 11:33.

¹⁹ Ti bia bane n teimatoa ni kakorakorai nanora ni kakaitau ibukin aroaron Iehova aika rangi n anainano. Ti kona ni karaoa anne ngkana ti karikirakea ataakin raoi aroarona, iaiangoaia, ao imwina ti na katotongi i nanoni maiura. (I-Ebeto 5:1) Ni karaoan anne, ti na bon ririkirake riki n inanoi ma te tia areru are e anene ni kangai: “E raoiroi i rou te kaania te Atua.”​— Taian Areru 73:​28, BG.