Kaota Kukureim Ae Bati N Ana Kauring Iehova

1. (a) Tera aroia aomata ni butimwaei kauring, ao bukin tera? (b) E na kanga te nanorieta n rota aron temanna n iangoa te reirei ni kairiri?

A ONGEABA aomata nakon te kairiri n aaro aika kakaokoro. Ko kona ni butimwaea te kauring ma te karinerine mairoun te aomata ae iai mwaakana, ma ko kona n aki butimwaea ngkekei naba te reirei ni kairiri mairoun tabonrorom ke ae uarereke riki. A rangi ni kakaokoro naba aia namakin aomata nakon te reirei ni kaetieti ao te kaungaunga. A kona n rotaki n namakin aika aron aikai: te rawawatannano, te nanokawaki, te maamaa, te ungannano, te bwarannano ao tabeman riki a kaungaaki ao ni kani karaoa ae raoiroi riki. Bukin tera bwa e kakaokoro te namakin iai? Bukina teuana bon bwainan te nanorieta. Ni koauana, e kona te aomata ae iai irouna te nano ni kainikatonga ni kamatakia ana babaire temanna, n te aro are e a katinanikua te reirei ni kairiri ao e aikoa ira nanon te kaetieti ae kakawaki.​—Taeka N Rabakau 16:18.

2. E aera ngkai a kakaitau Kristian ni koaua ibukin taeka n reirei man Ana Taeka te Atua?

² N iterana are teuana, a kakaitau Kristian ni koaua ibukin taeka n reirei aika ibuobuoki ao riki ngkana a boto i aon Ana Taeka te Atua. Ti karekea te atatai ae rangi ni kakawaki n ana kauring Iehova, a reireinira ao ni buokira n rarawa nakoni bwaai ni kabwakabwaka n aron te mataai ni kanibwaibwai, te wene ni bure ae kammaira, ao kamanenaan te drug ke te kamanging n te aro ae riao. (Taeka N Rabakau 20:1; 2 I-Korinto 7:1; 1 I-Tetaronike 4:​3-5; 1 Timoteo 6:​6-11) Irarikin anne, ti kukurei ni ‘kakatongan te nano’ ae raoiroi ae reke man te ongeaba n ana kauring te Atua.​—Itaia 65:​14, BG.

3. Tera aroaron te tia areru ae ti riai ni kakairi iai?

³ Ngkana ti kani kawakina ara iraorao ae rangi ni kakawaki ma Tamara are i karawa, ti riai n teimatoa ni maiuakini ana kaetieti Iehova aika manena ni maiura. Ai raoiroira ngkana e kaotiotaki man aroarora ana taeka te tia areru aei: “I tauu am taeka [ke “am kauring,” NW] ba au bwai n aki toki; ba ana bwai ni kukurei nanou baikai”! (Taian Areru 119:​111, BG) Ti katotonga anne ni kaota kukureira n ana tua Iehova, ke ti iangoia n tabetai bwa a karawawata? E ngae ngkana ti un n tabetai n taeka n reirei tabeua, ma ti riai n aki kabwarai nanora. Ti kona ni karikirakea te aki kaingingaki n onimakinan wanawanan te Atua ae rietata ni kaineti ma ana tua! Ti na rinanoi aanga aika tenua.

KARIKIRAKEA ONIMAKINANA RINANON TE TATARO

4. Tera te bwai teuana are e teimatoa ni kaotiotia Tawita ni maiuna?

⁴ A bati bitaki ni kaineti ma kukurein te Uea are Tawita ao nanokawakina ni maiuna, ma iai te bwai teuana are teimatoa ni kaotiotia n taai nako ae onimakinan ana tia Karikiriki ma nanona ni kabane. E taku: “Iehova, I kawaerakea tamneiu nako Im. Atuau, I onimakiniko.” (Taian Areru 25:​1, 2, BG) Tera ae buoka Tawita bwa e na karikirakea onimakinan Tamana are i karawa n aron anne?

5, 6. Tera ae ti tuangaki n Ana Taeka te Atua ibukin ana iraorao Tawita ma Iehova?

⁵ A bati aomata aika tataro nakon te Atua tii ngkana a rangi ni karawawataaki. Tera arom ngkana e kororeta nakoim raoraom ke am koraki tii ngkana e kainnanoa te mwane ke iai te bwai ae tangiria mairoum? Imwin tabeua te tai, ko na moanna n nanououa bwa tao e tangiriko raoi raoraom aei ke e aki. Ma e kaokoro Tawita ma anne. E kaotiotaki ana iraorao ma Iehova ni maiuna bwa e onimakinna ao n tangiria n taai aika bubuaka ao aika raraoi.​—Taian Areru 40:8.

⁶ Nora ana taeka Tawita ngke e kamoamoaa ao ni kaitaua Iehova ni kangai: “Iehova, ae ara Uea, ai raoiroi ra aram i aon aaba ni kabane! Ngkoe ae Ko katokaa mimitongim i aoni karawa.” (Taian Areru 8:​1, BG) Ko aki ngkanne kakoauaa kaanin ana iraorao Tawita ma Tamana are i karawa? E kairaki Tawita man nanona ni kakaitau ibukin raoiroin ao mimitongin te Atua bwa e na karietataa Iehova “ni kabongnga.”​—Taian Areru 35:​28, BG.

7. Ti na kanga ni kakabwaiaaki ni kaanian te Atua n te tataro?

⁷ Ti riai n taetaenikawai naba ma Iehova ni katoatai bwa ti aonga ni karikirakea onimakinana n aron Tawita. E taekinaki ae kangai n te Baibara: “Kaania te Atua, ao ane e na kaaningkami.” (Iakobo 4:8) Te anga riki teuana ae kakawaki ibukini karekean te taamnei ae raoiroi iroura, boni kaanian te Atua n te tataro.​—Wareka 1 Ioane 3:22.

8. E aera ngkai ti riai n rarawa ni kaokiokii ara taeka n ara tataro?

⁸ Ko kaokiokii am taeka ke ni kamanenai taeka aika tii te arona n taai nako ngkana ko tataro? Ngkana ngaia anne, kabanea tabeua te miniti imwain am tataro n iaiangoi taeka aika ko kan atongi. A na kukurei raoraora tabeman ke ara koraki n taai ake ti maroro ma ngaiia ngkana ti kaokiokii ara taeka? Tao e nang moanna n aki kan ongora. Ni koauana, e na bon ongoraei Iehova aia tataro mai nanoia ana toro aika kakaonimaki ni koaua. Ma ti karaoa ae raoiroi ngkana ti rarawa ni kaokiokii ara taeka n ara tataro ngkana ti taetae ma ngaia.

9, 10. (a) Tera ae ti kona n taekinna n ara tataro? (b) Tera ae kona ni buokira bwa ti na taekin tataro aika ringa te nano?

⁹ E mataata bwa ngkana ti kani kaania te Atua, a riai n nako raoi ara tataro mai nanora. Ngkana ti kabatiaa ara tai ni bunran raoi nanora nakon Iehova, ti na rangi ni kaaniaki ma ngaia ao ti na onimakinna riki. Ma tera ngkanne ae ti na taekinna n ara tataro? E kangai kaekaana n Ana Taeka te Atua: “A na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii n raonaki n te katituaraoi.” (I-Biribi 4:6) Ni koauana, a kona ni karinaki n ara tataro bwaai ni kabane ake iai rekerekeia ma aron ara iraorao ma te Atua ke boni maiura ngkai temanna naba ngaira ana toro.

¹⁰ E rangi n ibuobuoki iaiangoan aia taeka n aia tataro mwaane ma aine ake a kakaonimaki aika koreaki n te Baibara. (1 Tamuera 1:​10, 11; Mwakuri 4:​24-31) A rangi ni bati tataro ao anene nakon Iehova n Taian Areru aika ringa te nano. A bane ni kaotaraeaki iai aia namakin aomata ni moa man te rawawata ni karokoa te kimwareirei ni koaua. Ti kona ni buokaki n taekin taeka aika manena n ara tataro nakon Iehova man neneran aia taeka naake a kakaonimaki ni koaua.

KANANOAN TE IANGO NI KAINETI MA ANA KAURING TE ATUA

11. E aera ngkai ti riai ni kananoi ara iango i aon ana kauring te Atua?

¹¹ E taku Tawita: “E boni koaua ana taeka [ke “ana kauring,” NW] Iehova, ao e kawanawana ane e ro nanona.” (Taian Areru 19:​7, BG) Eng, e ngae naba ngkana ti aki mwaatai, ma ti kona n rikirake ni wanawana man ongeabara n ana tua te Atua. Ma e ngae n anne, e kainnanoaki kananoan te iango i aoni kiibu tabeua man te Baibara aika kaungaunga ngkana ti kani karekei kakabwaia aika bati. E kona n taekinaki anne ni kaineti ma kateimatoaan etin arora ngkana ti kaririaki n ara tabo n reirei ke n ara tabo ni mwakuri, ibukini boutokaan ana kaetieti te Atua ni kaineti ma te raraa, kateimatoaan teira i nuka ngkai Kristian ngaira ao maiuakinani booto n reirei man te Baibara ibukini kunnikaira ao katamaroaara. Ngkana ti iangoi baikanne n aron iangoaia iroun te Atua, ti na buokaki iai n tokanikai i aoni kangaanga. Imwin anne, ti kona ni motinnanoa te bwai ae ti na karaoia ngkana ti a manga aitara ma te kangaanga teuana. E kona n totokoaki te uruakinnano man arora ni kaman iaiangoa anne ao te moantaai ni katauraoi.​—Taeka N Rabakau 15:28.

12. Baikara titiraki aika ti riai n iaiangoi ake a na kona ni buokira n taui ana kauring te Atua?

¹² E kaotaki ni maiura bwa ti teimatoa n tantani n te aro n taamnei ngkai ti kariariaa kakororaoan ana berita te Atua? N te katoto, ti boni kakoauaa bwa e na waekoa ni kamaunaaki Baburon ae Kakannato? Ti kakoauai kakabwaia n taai aika imwaira n aron te maiu n aki toki n te bwaretaiti i aon te aba ngkai, n aron naba are ngke ti moan reiakini? Ti a tia ni kateimatoa ingaingan nanora n te mwakuri ni minita ao n aki kariaia baika ti tangiri bwa a na kakawaki riki ni maiura? Tera aron te kantaninga ibukin te mangauti, katabuan aran Iehova ao riaini mwaakana n tautaeka? A teimatoa n riki bwa reirei aika rangi ni kakawaki ibukira? E kona kananoan ara iango i aon titiraki aikai ni buokira bwa ti na kaboraoi maiura ma ana taeka te tia areru ae ti na taui ‘ana kauring te Atua bwa ara bwai n aki toki.’​—Taian Areru 119:​111, BG.

13. E aera ngke e kangaanga mataataia Kristian ake n te moan tienture ni bwaai tabeua? Taekina te katoto.

¹³ A kona n aki mataata raoi bwaai tabeua aika taekinaki n te Baibara ngkai, ibukina bwa e tuai moa boo ana tai Iehova are e namatia ibukini kamataataia. E okioki Iesu n tuangia ana abotoro bwa e bon riai ni kammarakaki ao ni kamateaki. (Wareka Mataio 12:40; 16:21.) Ma a bon aki ota abotoro n te bwai are e nanonna. A a ota iai imwini matena ao mangautina ngke e karika rabwatana n aomata, e kaoti nakoia taan rimwina aika bati, ao e “kauki aia iango bwa a aonga n ota raoi n ae nanonaki n te Koroboki ae Tabu.” (Ruka 24:​44-46; Mwakuri 1:3) N aron naba anne, a aki mataata taan rimwini Kristo ibukin katean Ana Tautaeka n Uea te Atua i karawa ni karokoa rokon te taamnei ae raoiroi i aoia ni Bentekota 33 C.E.​—Mwakuri 1:​6-8.

14. Tera te katoto ae raoiroi are a kaotiotia taari aika bati ni moan te ka-20 n tienture n aki ongei aki mataataia ni kaineti ma kabaneani boong?

¹⁴ N aron naba anne, ni moan te ka-20 n tienture ao iai mai buakoia Kristian ni koaua ake a kariariai baika a kairua ni kaineti ma “kabaneani boong.” (2 Timoteo 3:1) N te katoto, iai tabeman n 1914 ake a iangoia bwa e a rangi ni kaan te tai are a na uotaki rake iai nako karawa. Ngke a aki waekoa ni koro bukini baike a kantaningai, a a manga ukeuke n reirei riki n te Baibara ao a a mataata bwa iai te mwakuri n uarongorongo ae korakora ae okoro ae riai ni karaoaki moa. (Mareko 13:10) Ngaia are n 1922, e a tuangia naake a roko n te bwabwaro ibukin aaba aika kakaokoro i Cedar Point, Ohio i U.S.A, J. F. Rutherford are e kaira te mwakuri n uarongorongo ni kangai: “Noria, e a Uea te Uea! Bon taan tataekina rongorongona ngkami. Mangaia are kaotiota, kaotiota, kaotiota te Uea ao ana tautaeka n uea.” Man te tai anne ni karokoa ngkai, e a tia n riki tataekinan “te rongorongo ae raoiroi ibukin te tautaeka n uea” bwa kanikinaeaia ana toro Iehova ni boong aikai.​—Mataio 4:23; 24:14.

15. Ti na kanga ni kakabwaiaaki ni kananoan ara iango ni kaineti ma aron te Atua nakoia ana aomata?

¹⁵ Rinanoni kananoan ara iango i aon aron Iehova aika kamimi nakoia ana aomata n taai aika nako ao ngkai, ti a karekea iai kakoauaan riki rabakauna ni waakinaanako karaoan nanona ma ana kantaninga ibukin taai aika imwaira. N te tai naba anne, a buokira ana kauring te Atua ni kabooui i nanora ma ara iango ana taetae ni burabeti aika ti kariariai kakororaoaia. Ti kona ni kakoauaa bwa ni karaoan anne, ti a buokaki iai ni karikirakea onimakinan ana berita nako.

KARIKIRAKEA ONIMAKINANA RINANONI WAAKI N TAROMAURI

16. A na roko mai ia kakabwaia ngkana ti teimatoa ni katabetabeira n te mwakuri ni minita?

¹⁶ E rangi ni korakora Atuara ae Iehova, ao bon te Atua ae mwamwakuri. E titiraki ni kangai te tia areru: “Antai ae korakora n ai arom, Iehova?” E reitia riki ni kangai: “E korakora baim, ao e rietata ataim.” (Taian Areru 89:​8, 13, BG) Ni kaboraoan aei ma anne, a kakawaki ao ni kakabwaiaaki iroun Iehova ara kakorakora ibukini karikirakean te Tautaeka n Uea. E noriia ana toro aika mwaane ke aine, ataei ke kaara bwa a aki tekateka n aoaoria ao ni kana “amaraken te taningaroti.” (Taeka N Rabakau 31:​27, BG) Ti kakairi iroun ara tia Karikiriki ngkana ti teimatoa ni katabetabeira ni mwakuri ibukin te Atua. Ti kukurei ni beku ibukin te Atua ma nanora ni kabane, ao e rangi ni kimwareirei Iehova ni kakabwaiaa ara mwakuri ni minita.​—Wareka Taian Areru 62:12.

17, 18. E aera ngkai ti kona n taekinna bwa ti buokaki ni karikirakea onimakinan ana reirei ni kairiri Iehova man ara mwakuri aika irekereke ma te onimaki? Taekina te katoto.

¹⁷ N te aro raa ae ti na buokaki iai ni karikirakea onimakinan Iehova man ara mwakuri aika irekereke ma te onimaki? Iangoa te rongorongo man te Baibara ni kaineti ma rinia tibun Iteraera n te Aba ni Berita. E anga ana kaetieti Iehova nakoia ibonga bwa a na uota te ati ni berita ni karokoa rokoia n te Karaanga ae Ioretan. Ma ni mwanangaia anne, a a noria bwa e a taonako ranin te karaanga man te karau are ni moan iteran te ririki. Tera are a riai ni karaoia tibun Iteraera? A na katei aia kaembwa i etan te karaanga tabeua te wiki ke e nako riki n tataningaa ikinakona? A aki, bwa a onimakina Iehova ma nanoia ni kabane ao n tou mwin ana kaetieti. Tera mwina? E taekinaki n te rongorongo ae kangai: “Ngke a a tibwa toko waeia ibonga n te ran, e a bon toki naba raangan te ran, . . . ao a tei ibonga i nukan te karaanga are e a mwau are i Ieriko ni karokoa a a bane aomata n rinanon te karaanga.” (Iotua 3:​12-17, Contemporary English Version ) Iangoa aroni kaungaan nanoia n noran tein ranin te karaanga bwa kaanga te tabuki! Ni koauana, e a korakora riki onimakinan Iehova irouia tibun Iteraera ibukina bwa a onimakin ana kaetieti.

¹⁸ E a aki karaoi aeka ni kakai akanne Iehova ibukia ana aomata ni boong aikai, ma e boni kakabwaiai aia mwakuri ao aia onimaki. E kakorakoraia mwaakan te Atua ae mwamwakuri bwa a na waakinaanako mwiokoaia ae tataekinan te rongorongo ibukin te Tautaeka n Uea ni katobibia te aonnaba. Ao te tia Kakoaua ibukin Iehova ae te kabanea ni kakannato ae kautaki are Kristo Iesu, e boni karaui nanoia taan rimwina bwa e na boutokaiia n te mwakuri ae kakawaki aei ni kangai: “Mangaia are naako, reireinia aomata mai buakoia botannaomata nako . . . N na memena iroumi ni boongi ni kabane ni karokoa tain tokin te waaki ae ngkai i aon te aba.” (Mataio 28:​19, 20) A bati taani Kakoaua aika tao iai ngkoa kabwakaia bwa a mamaamaa ke ni mamaaku aika a kona ni kakoauaa bwa e a tia te taamnei ae raoiroi mairoun te Atua n angania te ninikoria bwa a na kataetaeia aomata aika a aki kinaia n te mwakuri ni minita.​—Wareka Taian Areru 119:46; 2 I-Korinto 4:7.

19. Tera ae ti kakoauaa e ngae ngke ti aikoa kona ni karaoa ae bati n ara beku ibukin te Atua?

¹⁹ Iai tabeman taari ake a aikoa kona ni karaoa ae bati n aia beku ibukin te Atua n aron ae a tangiria ibukin te aoraki ke te kara. Ma e ngae n anne, a kona ni kakoauaa bwa e atai aroia Kristian ni koaua n tatabemania nako “te Tama ae nananoanga ao te Atua ae te tia anga te kabebetenano.” (2 I-Korinto 1:3) E kakawaki irouna bwaai ni kabane aika ti karaoi ibukini karikirakean te Tautaeka n Uea. Ti riai ni bane n ururingnga bwa e rangi ni kakawaki onimakinan ana karea ni kaboomwi Kristo are e kateimatoai maiura ngkai ti karaoi bwaai ni kabane n aron ara kona.​—I-Ebera 10:39.

20, 21. Baikara aanga tabeua aika ti kaotiota iai onimakinan Iehova?

²⁰ E irekereke ara taromauri ma kabanean ara tai, korakorara ao kaubwaira n aron ara kabanea ni kona n ara beku ibukin te Atua. Eng, ti kani “karaoa ana mwakuri te tia tataekina te euangkerio” ma nanora ni kabane. (2 Timoteo 4:5) Ni koauana, ti kukurei ni karaoa anne bwa a buokaki iai aomata ni “karekea te atatai ae eti ibukin te koaua.” (1 Timoteo 2:4) E teretere bwa mani karinean ao kamoamoaan Iehova, e na bon anganira te kaubwai n taamnei. (Taeka N Rabakau 10:22) Ao e buokira naba ni karikirakea te itoman ae aki kona n uruaki ibukin onimakinan ara tia Karikiriki.​—I-Rom 8:​35-39.

²¹ N aron ae ti a tia n rinanona, e aki reke onimakinan Iehova ibukin ana kairiri ae manena n akea te kakorakora, mangaia are ti riai ni mwakuri korakora ni karekea. Ngaia are onimakina Iehova rinanon te tataro. Kananoa am iango n aron Iehova ni kakororaoi ana berita n taai aika nako ao n taai aika imwaira. Ao teimatoa ni karikirakea onimakinan Iehova n ara taromauri. Eng, a teimatoa n aki toki ana kauring Iehova. Ko kona naba ni maiu n aki toki ngkana ko mutiakini!