Te Koaua Bwa Ko Bati N Tangiri Ana Taeka Ni Kauring Iehova?
“E tauu am taeka tamneiu; ao I bati n tangiri.”—TAIAN ARERU 119:167.
1. E ngaa riki te tabo ae ti kona ni kunea iai kaokiokan ana taeka ni kauring Iehova?
IEHOVA e tangiriia ana aomata bwa a na kukurei. Ngkana ti na namakina te kukurei ni koaua, ao ti riai n nakonako n ana tua te Atua ma ni kawakin ana kaetieti. E anganira taeka ni kauring tabeua, bwa ti aonga ni kona ni karaoa anne. Taeka aikai, a bati okiokiia n taekinaki n te Baibara, ao e a moamoa riki n Taian Areru 119, are tao e oteaki iroun te Nati n Uea i Iuta ae te tei ae Etekia. E moanaki te anene ae tamaroa aei n taeka aikai: “A a kabaia akana a moa n raoiroi aroia, akana nakonako n ana tua Iehova. A a kabaia akana kawakin ana taeka, akana ukoukoria n nanoia ni kabane.”—Taian Areru 119:1, 2.
2. Tera irekereken ana kauring te Atua ma te kukurei?
2 Ti “nakonako n ana tua Iehova” ngkana ti karekea te atatai ae eti man ana Taeka, ao ngkana ti kamanena inanoni maiura. Ma kioina ngkai ti aki kororaoi, ao ti kainnanoi taeka ni kauring. Te taeka n Ebera ae rairaki bwa ‘taeka ni kauring,’ e kaotia bwa te Atua e a manga kauringira taekan ana tua, ana kaetieti, ao ana babaire. (Mataio 10:18-20) Ti na teimatoa ni kukurei tii ngkana ti teimatoa ni mutiakin taeka ni kauring aikai, bwa a buokira ni kararoai bwaai aika a na karika te kangaanga nakoira n te itera n taamnei, aika a karika te kabuanibwai ao te kananokawaki.
Tauu Ana Taeka ni Kauring Iehova
3. Ni kaineti ma ae taekinaki n Taian Areru 119:60, 61, tera ae ti aki nanououa iai?
3 A tatangiraki ana taeka ni kauring te Atua iroun te tia areru are e anene ni kangai: “I kawaetataai, ao I aki waeremwe, n tou mwin am tua. A ninirai aia bwai ni kabaebae aomata aika buakaka; ma I aki manuoka am tua.” (Taian Areru 119:60, 61) Ana taeka ni kauring Iehova a buokira n nanomwaaka i aan te bainikirinaki, ibukina bwa ti onimakinna raoi bwa Tamara are i karawa e kona ni motika aia bwai ni kabaebae taani kairiribai, aika bwaai aika a na tutukira. N te tai ae riai, e kainaaomataira mani bwaai n tutuki aikai, bwa ti aonga ni kona ni waakina tataekinan rongorongon te Tautaeka n Uea.—Mareko 13:10.
4. Tera arora ae ti riai ni butimwaea iai ana taeka ni kauring te Atua?
4 N taai tabetai ti kaetaki n ana taeka ni kauring Iehova. Ti bia butimwaea te kaetaki aei n taai nako, n aron are e karaoia te tia areru. E tataro ni kangai nakon te Atua: “Am taeka nako bon au bwai ni kukurei naba . . . I tangiri am taeka.” (Taian Areru 119:24, 119) A mwaiti riki taeka n reirei mairoun te Atua iroura, nakon are e mena iroun te tia areru. Mwanewean kibun te Baibara n Ebera aika bubua ma bubua mwaitiia n te Baibara n Erene, a aki tii kauringira taekan ana kaetieti Iehova nakoia ana aomata ake a mena i aan te Tua, ma ibukin naba ana kaantaninga ni kaineti ma te ekaretia ni Kristian. Ngkana te Atua e nora riain kauringakira taekan ana tua, ao ti kukurei ni butimwaeia. Ao ngkana ti ‘tauu ana taeka ni kauring Iehova,’ ti kararoai iai kataaki ake a na aki kakukureia nanon ara tia Karikiriki ao aika a na anaa naba kukureira.—Taian Areru 119:31.
5. Ti na kanga ni kona n riki bwa taani kabatiaa tangiran ana taeka ni kauring Iehova?
5 Tera aron riain korakoran tangiran ana taeka ni kauring Iehova iroura? E anene ni kangai te tia areru, “E tauu am taeka tamneiu; ao I bati n tangiri.” (Taian Areru 119:167, ara bwai man reireiti.) Ti na boni bati n tangiri ana taeka ni kauring Iehova ngkana ti tarai ma ni butimwaai bwa kaanga taeka ni kaungaunga mairoun te Tama ae e rangi n tangirira. (1 Betero 5:6, 7) Ti kainnanoa ana taeka ni kauring, ao tangiraia iroura e na rikirake riki ngkai ti a nora aroni manenaia nakoira.
Bukina ae Ti Kainnanoa Iai Ana Taeka ni Kauring te Atua
6. Tera bukina teuana ae ti kainnanoa iai ana taeka ni kauring Iehova, ao tera ae e na buokira ni kaururingira?
6 Bukina teuana ae ti kainnanoa iai ana taeka ni kauring Iehova, bwa ti boni mwamwaninga. E taku te World Book Encyclopedia: “N angiin te tai, e a rikirake mwaitin rongorongo ake a mwanuokinaki irouia aomata ngkai e a tabe ni bwakanako te tai. . . . E a boni bae n tia n riki nakoim ae ko a tii karina naba ni mwaninga te ara ke te rongorongo teuana, ae ko nangi bon taekinna bwa ko boni kuri n uringnga. . . . Te aeka ni mwamwaninga aei ae e okioki, e aranaki bwa te aki konamaki ni manga kaoka te rongorongo teuana. Taan rabakau a kabotaua te kangaanga aei ma te aomata are e kataia ni kakaea te bwai teuana ae bua inanon te ruu teuana ae onrake ni bwaai aika mwaiti. . . . Te anga teuana are e na kanakoraoa uringan te rongorongo teuana, ngkana ko kamatebwaia raoi n te tai ae maan imwin te tai are ko taku iai bwa e a bon tia ni matenikuna iroum.” Te kakaonimaki n ukeuke n reirei ao okiokirana, e na buokira bwa ti na uring ana taeka ni kauring te Atua ma n iri nanoia, bwa ti aonga ni kabwaia iai.
7. Bukin tera bwa e a kainnanoaki riki ngkai ana taeka ni kauring te Atua, nakon taai aika nako?
7 Ti a kainnanoa riki ana taeka ni kauring Iehova ni boong aikai, ibukina bwa e a rangi ni korakora te buakaka ngkai nakon taai aika nako. Ngkana ti mutiakini ana taeka ni kauring te Atua, ti na boni karekea te atatai ae ti kainnanoia ae e na kamanoira man anaakin nanora nakon aroaron te aonnaba aika bubuaka. “I rabakau riki nakoia au tia reirei ni kabaneia,” e taku te tia areru, “ba bon au bwai n iango am taeka. I atatai riki nakoia unimwane, ngkai I tauu am taeka. I tauu waeu mani kawai aika bubuaka ni kabane, ba I aonga n taua am taeka.” (Taian Areru 119:99-101) Ngkana ti mutiakina ana taeka ni kauring te Atua, a na aki roko waera i aon “kawai aika bubuaka ni kabane,” ao ti na aki riki n ai aroia aomata aika mwaiti ake “a ro nanoia, ao a riki n ianena ma te maiu are mairoun te Atua.”—I-Ebeto 4:17-19.
8. Ti na kanga ni kona n tauraoi riki ni kaitara ke n tokanikai ni kataakin ara onimaki?
8 A kainnanoaki naba ana kauring te Atua ibukina bwa a kakorakoraira bwa ti na nanomwaaka i aan kataakira aika bati inanon “tain te toki.” (Taniera 12:4) Ngkana akea kauring aikai ao ti na boni bae n riki bwa ‘taan ongora aika mwamwaninga.’ (Iakobo 1:25) Ma te kakaonimaki n ukeuke n reirei n te Baibara ibon iroura ao n ara tai ni botaki ma te ekaretia, ao kabonganan iai bwaai ni wareware aika a katauraoaki iroun te “toro ae kakaonimaki ae wanawana,” e na buokira n tokanikai ngkana e kataaki ara onimaki. (Mataio 24:45-47) Bwaai n ibuobuoki n taamnei aikai a buokira n ataia bwa tera ae ti riai ni karaoia bwa ti aonga ni kakukureia nanon Iehova ngkana ti rootaki n taian rawawata.
Te Ibuobuoki ae Moan te Kainnanoaki man Ara Bobotaki
9. Antai ‘bwaai n tituaraoi aika mwaane,’ ao tera aroia ni buokiia raoia n onimaki?
9 E buokaki kainnanoan ana taeka ni kauring te Atua iroura ni bobotaki ni Kristian, ike a katauraoaki iai reirei irouia taari ake a rineaki. Te abotoro Bauro e korea taekan Iesu bwa ngke e nang “rierake nakon te tabo ae rietata, ao E kairiia akana a tae aia kai ba ana taenikai, ao E angania aomata [bwa] bwaai n tituaraoi.” E reitia ni kangai Bauro: “[Kristo] E anga temangina ba taan tuatua; ao temangina, ba burabeti; ao temangina, ba taan taekina te euangkerio; ao temangina, ba taani kawakin ekaretia, ao taan reirei; i bukini karaoiroaia ake a itiaki nakoni makurian nakoaia, nakoni katean rabatani Kristo.” (I-Ebeto 4:8, 11, 12) Ai kukureira ngaira bwa ‘bwaai n tituaraoi’ aikai—aika unimwaane ake a rineaki—a kaira ara iango nakon ana taeka ni kauring Iehova ngkana ti bobotaki n taromauri!
10. Tera te reirei ae kakawaki ae reke man Ebera 10:24, 25?
10 Kani kaotan ara kaitau ibukin bwaai n ibuobuoki mairoun te Atua aikai, e na kairira bwa ti na kaei ara botaki aika nimaua ake a karaoaki n te ekaretia ni katoa wiki. E kateretereaki kainnanoakin te kakaonimaki ni bobotaki iroun Bauro. E korea ae kangai: “Ao ti na i taratara n iangoi arora ba ti aonga ni keiakinira ni karika te tangira ma makuri aika raraoi. Ao ti na tai kaki te bobotira, n ai aroia tabemang, ma ti na taetae n i kauungaira i roura; ni kakorakoraira riki iai n te aro ane kam nora te Bong arei ba e a kan roko.”—Ebera 10:24, 25.
11. Tera buokara ae reke man ara botaki aika kakaokoro nako ake ti karaoi ni katoa wiki?
11 Ko bon ataa buokara ae e rereke man ara botaki? Te Reirei n Te Taua-n-Tantani ae kakaraoaki ni katoa wiki e kakorakoraa ara onimaki, e buokira naba bwa ti na kaboraoi aroarora ma ana taeka ni kauring Iehova, ao e kakorakoraira bwa ti na buakana “nanon aon te aba.” (1 I-Korinto 2:12; Mwakuri 15:31) N te Kabwarabwara Ibukia Aomata Nako, taani kabwarabwara iai a kaotii reirei man ana Taeka te Atua, n ikotaki ma taeka ni kauring mairoun Iehova, ao “taekan te maiu are aki toki” ae kamimi are mairoun Iesu. (Ioane 6:68; 7:46; Mataio 5:1–7:29) E katamaroaki riki rabakaura n anga reirei n Ana Kuura ni Minita te Atua. Te Botaki Ibukin te Uarongorongo e rangi ni manena ibukin buokara bwa ti na rabakau riki n tataekina te rongorongo ae raoiroi man te auti teuana nakon te auti teuana, ngkana ti okiokiriia aomata, ngkana ti kairi reirei n te Baibara n te mwenga, ao n itera tabeua riki ake ti kakaraoi iai ara mwakuri ni minita. Te bobotaki ni kurubu aika a uarereke riki mwaitiia ibukin karaoan te Reirei n te Boki n te Ekaretia, e anganira ara tai ae bati riki are ti kona ni kaota iai ara koaua ake a reitaki ma ana taeka ni kauring te Atua.
12, 13. Tera aroia ana aomata te Atua n aban Atia teuana ni kaota aia kaaitau ibukin bobotaki ni Kristian?
12 Te kakaonimaki n roko ni bobotakin te ekaretia e kauringira taekan ana tua te Atua, ao e buokira naba bwa ti na marurung raoi n te itera n taamnei, e ngae ngkana ti kaitara ma te buaka, kangaanga ibukin te mwane, ao kataakin ara onimaki tabeua riki. E namakinaki kakawakin ara botaki irouia Kristian ake 70 mwaitiia ake a mena n aban Atia teuana, ake a kanakoaki mani mwengaia ao a maeka i buakonikai. A matoatoa nanoia ni kani kateimatoa aroia ni bobotaki, mangaia are a okira aia kaawa are e a tia n uruaki imwin te buaka arei, ao a kamaenako bwain aia Maneaba n Uea are e uruaki naba, ao a manga kateia i buakonikai.
13 N aonon te aba arei teuana, a teimatoa n ingainga n aia beku, ana aomata Iehova ake a mena iai, e ngae ngkai e waakinako te buaka iai inanon ririki aika mwaiti. E titirakinaki te unimwaane temanna n te aono arei ni kangai: “Tera te bwai ae rangi n ibuobuoki are a katiteuanaki iai taari?” Tera ana kaeka? “Ti tuai mani kakeaa te botaki teuana inanon ririki aika 19. N taai tabetai a aikoa roko taari tabeman ibukina bwa iai boom aika a bwaka ke iai kangaanga tabeua riki iai, ma ti tuai ma ni kamauna te botaki teuana.” Taari aika tangiraki aikai aika mwaane ma aine, a ataa kakawakin ‘aki kakeaan bobotakiia.’
14. Tera reireiara man ana katei te unaine ae Nei Ana?
14 Nei Ana, ae te aine are e a tia ni mate buna, ae 84 ana ririki ni maiu, “e aki nanako mani maneaban te Atua.” Anne bukina are e a mena naba ikekei ngke e kairaki te merimeri are Iesu nako iai, teutana te tai imwin bungiakina. (Ruka 2:36-38) E matoatoa naba nanom n aki kan titiku man taiani bobotaki? Ko karaoa am kabanea n raoiroi ni kaei reirei ni kabane ake a karaoaki n ruunga ao bwabwaro? Reirei aika manena ibukin karikirakean tangiran bwaai n taamnei ake a karaoaki ni botaki aikai, a kaotii raoi nakoira bwaai aika a kakoaua bwa Tamara are i karawa e bon mwamwannanoia ana aomata. (Itaia 40:11) Botaki aikai a karikirakea naba te kimwareirei, ao rokora iai e kaota ara kaitau ibukin ana taeka ni kauring Iehova.—Neemia 8:5-8, 12.
Kaokoroaki n Ana Taeka ni Kauring Iehova
15, 16. E a kanga mutiakinan ana taeka ni kauring Iehova n roota aroaroni maiura?
15 Mutiakinan ana taeka ni kauring te Atua e buokira n te aro ae e kaokoroira ma te aba ae buakaka aei. N aron anne, mutiakinan ana taeka ni kauring te Atua e tukira man karaoan te wene ni bure. (Te Tua-Kaua 5:18; Taeka N Rabakau 6:29-35; Ebera 13:4) E kona n reke te tokanikai i aon kariri nakon te kewe, te babakanikawai, ao te ira, ngkana ti ira nanon ana taeka ni kauring te Atua. (Te Otinako 20:15, 16; Nakoaia Ibonga 19:11; Taeka N Rabakau 30:7-9; I-Ebeto 4:25, 28; Ebera 13:18) Mutiakinan ana taeka ni kauring Iehova e tukira naba man karaoan te ira-n-taanga, kaboan mwin te riribai, ke uaraoakinan te aomata temanna.—Nakoaia Ibonga 19:16, 18; Taian Areru 15:1, 3.
16 Ngkana ti mutiakina ana taeka ni kauring te Atua, ti teimatoa ni kaokoroaki ke ni katabuaki iai, ibukin karaoan te beku irouna. Ao ai kakawakira ae ti na teimatoa ni kaokoro ma te aba aei! N ana kabanea n tairiki Iesu ni maiuna n aomata i aon te aonnaba, e tataro nakon Iehova ma ni bubutii ni kangai ibukia taan rimwina: “I a tia n angania am taeka; ao e ribaiia te aba, ba tiaki ana bwai te aba ngaiia; n ai arou ngkai tiaki ana bwai te aba Ngai. I aki tataro ba Ko na uotiia nako mai aon te aba, ma I tataro ba Ko na kawakinia mairoun teuare buakaka. Tiaki ana bwai te aba ngaiia, n ai arou ngkai tiaki ana bwai te aba Ngai. Ko na tabuiia n te koaua: am taeka te koaua.” (Ioane 17:14-17) Ti bia teimatoa n tatangira ana Taeka te Atua, ae e katabuira ibukin te beku ibukin te Atua.
17. Tera ae e na kona n riki ngkana ti aki-mutiakina ana taeka ni kauring te Atua, mangaia are tera ae ti riai ni karaoia?
17 Ibukina bwa ti toro iroun Iehova, ti tangiria n teimatoa n tau ni beku irouna. Ngke arona bwa ti aki mutiakina ana taeka ni kauring te Atua, n te aro anne are ti na kona iai n taonaki n nanon aon te aba aei, ae e nonoraki n aia taetae nikawai aomata, aia boki, aia aro ni kaki botu, ao ai aroaroia. Ao ti aki naba tangiria n riki bwa taan tangira te mwane, taani kamoamoa, taan nanorieta, taan aki-kakaitau, taan aki kakaonimaki, taan iowawa, taan tautau aroia, taani kainikatonga, ke taan tangira riki te takaakaro nakon tangiran te Atua—aika aroaro tabeua ake a kaotaki irouia aomata aika a ianena mairoun te Atua. (2 Timoteo 3:1-5) Kioina ngkai ti a maan ni mena inanon kabanean bongin te waaki ae buakaka ae ngkai, ti na teimatoa n tataro ni bubutii buokara mairoun te Atua, bwa ti aonga ni kakaonimaki ni mutiakina ana taeka ni kauring Iehova ma n ‘taratara ni kakairi n ana taeka.’—Taian Areru 119:9.
18. Mutiakinan ana taeka ni kauring te Atua e na kairira bwa ti na tou mwaneka raa iai ake a raraoi?
18 E bati riki buokara man ana taeka ni kauring Iehova, nakon ae tii kauringakira taekan bwaai ake ti aki riai ni karaoi. Mutiakinan ana taeka ni kauring e na kairira bwa ti na mwamwakuri naba ni karaoa ae riai, n onimakina raoi Iehova, ao n tangiria ma nanora, taamneira, ara iango, ao korakorara, ni kabane. (Te Tua-Kaua 6:5; Taian Areru 4:5; Taeka N Rabakau 3:5, 6; Mataio 22:37; Mareko 12:30) Ana taeka ni kauring te Atua a kairira naba bwa ti na tangiriia raoraora n aomata. (Nakoaia Ibonga 19:18; Mataio 22:39) Ti kaota tangiran te Atua ao raora, n arora ni kabatiaa kakaraoan nanon te Atua iroura, ao n tibwatibwakin te ‘atatai ibukin te Atua,’ ae te mwakuri ni kakamaiu.—Taeka N Rabakau 2:1-5.
Mutiakinan Ana Taeka ni Kauring Iehova e Nanona te Maiu!
19. Ti na kanga ni kaotia nakoia aomata tabeman bwa e manena mutiakinan ana taeka ni kauring Iehova?
19 Ngkana ti mutiakin ana taeka ni kauring Iehova ma ni buokiia aomata tabemwaang bwa a na karaoa naba anne, ti na kamaiuira ao aomata ake a ongora naba iroura. (1 Timoteo 4:16) Ti na kanga ni kaotia nakoia aomata tabemwaang bwa mutiakinan ana taeka ni kauring Iehova bon te bwai ae manena ma n uaana? Ngkana ti kamanenai reirei man te Baibara aikai inanoni maiura. Akana a ‘raoiroi nanoia ibukin te maiu are aki toki,’ a na noria bwa te kawai ae kaotaki inanon ana Taeka te Atua bon te kawai ae te kabanea n raoiroi ibukia. (Mwakuri 13:48) A na noria naba bwa ‘e boni mena ibuakora te Atua,’ ao a na kairaki nanoia bwa a na kan reitaki ma ngaira n taromaurian te Uea ae Moan te Rietata ae Iehova.—1 I-Korinto 14:24, 25.
20, 21. Tera ae ti na buokaki bwa ti na karaoia, n ana taeka ni kauring te Atua ao taamneina?
20 Ngkana ti teimatoa n nenera te Baibara, ni kamanena are ti reireiaki mai iai, ma ni kabonganai raoi bwaai n ibuobuoki mairoun Iehova ibukin karikirakean tangiran bwaai n taamnei, ao ti na riki bwa aomata aika a bati n tangiri ana taeka ni kauring. Ngkana ti mutiakin kauring aikai, a na buokira bwa ti na karina “te aomata nabangkai, are karaoaki ba aron te Atua n te raoiroi ao n te itiaki are riki man te koaua.” (I-Ebeto 4:20-24) Ana taeka ni kauring Iehova ao taamneina ae raoiroi, a na buokira ni kaotiota te tangira, te kimwareirei, te rau, te taotaonaki n nano, te atataiaomata, te raoiroi, te kakaonimaki, te nimamannei, ao te taubaang—aika aroaro aika a rangi ni kaokoro ma aroaroia kaain te aonnaba aei ae mena i aan mwaakan Tatan! (I-Karatia 5:22, 23; 1 Ioane 5:19) Mangaia are ti kona ni kukurei ngkana ti kauringaki taekan bwaai ake e tangiri Iehova mairoura, ngkana ti karaoa ara ukeuke n reirei n te Baibara ibon iroura, irouia unimwaane ake a rineaki, ao n ara botaki, ruunga, ao bwabwaro.
21 Ibukina bwa ti mutiakina ana taeka ni kauring Iehova, ti kona ni kimwareirei iai, e ngae naba ngkana ti bainikirinaki ibukin te raoiroi. (Ruka 6:22, 23) Ti onimakina te Atua bwa e na kamaiuira mani kangaanga aika a rangi ni kakaiaki. Moan te kakawaki aei ngkai botannaomata ni kabane a tabe n ikotaki nakon “te buaka n te bong are kakanato are ana bongi te Atua, ae Moan te Mwaka,” are n Aremaketon.—Te Kaotioti 16:14-16.
22. Tera ae ti riai ni kamatoai nanora iai ni kaineti ma ana taeka ni kauring Iehova?
22 Ngkana ti na anganaki te bwai n tituaraoi ae te maiu are aki toki, ao ti riai ni kabatiaa tangiran ana taeka ni kauring Iehova, ma n tou mwiia ma nanora ni koaua. Ti bia bwaina nanon te tia areru are e anene ni kangai: “Akea tokin raoiroin am taeka: kawanawanaai, ao I a maiu.” (Taian Areru 119:144) Ao ti bia kaotiota te nanomatoa ae oti n ana taeka te tia areru aikai: “I weteiko [Iehova]; Ko na kamaiuai, ao N na tauu am taeka.” (Taian Areru 119:146) Eng, n ara taeka ao n ara mwakuri, ti bia kakoauaa ae ti boni bati n tangiri ana taeka ni kauring Iehova.
Tera Am Kaeka?
• Tera ana kaantaninga te tia areru ibukin ana taeka ni kauring Iehova?
• Bukin tera ngkai ti kainnanoa ana taeka ni kauring te Atua?
• Tera manenan ara botaki ni kaineti ma ana taeka ni kauring te Atua?
• A kanga ana taeka ni kauring Iehova ni kaokoroira man te aba aei?
[Taamnei n iteraniba 15]
Te tia areru e rangi n tatangiri ana taeka ni kauring Iehova
[Taamnei n iteraniba 17]
Ko kakairi n ana katoto Nei Ana ma ni motika raoi nanom bwa ko na aki titiku n taiani botaki?
[Taamnei n iteraniba 18]
Mutiakinan ana taeka ni kauring Iehova e kaokoroira bwa aomata aika itiaki ma n tau ni beku irouna