A Onimakinaki Ana Kauring Iehova
“E boni koaua ana taeka [ke “ana kauring,” NW] Iehova, ao e kawanawana ane e ro nanona.” —TAIAN ARERU 19:7.
1. Baikara reirei aika aki toki ni maroroakinaki irouia ana aomata te Atua, ao ti na kanga ni kakabwaiaaki ni manga rinanoaia?
IAI te tai teuana ae ko katauraoa iai te Reirei n Te Taua-n-Tantani ibukin te wiki ae imwaim, ao ko iango ni kangai: ‘Ti bon tuai mani maroroakina te reirei aei mai mwaina?’ Ngkana ko a tia n iriri bobotaki ni Kristian n te ekaretia i nanon tabeua te tai, ko bae n ataia ae a okioki maroroakinan reirei tabeua. Kanoan te amwarake n taamnei n taai nako bon reiakinan Ana Tautaeka n Uea te Atua, te karea ni kaboomwi, te mwakuri ni kairiia aomata bwa a na riki bwa taan rimwini Kristo, ao ai aroaro n aron te tangira ao te onimaki. Ti buokaki ni manga rinanoan reirei aikai bwa ti aonga n teimatoa ni korakora n ara onimaki ao n “[riki] bwa taan toua mwin te taeka, ao tiaki tii taan ongora.”—Iakobo 1:22.
2. (a) A kaineti ma tera ana kauring te Atua n angiin te tai? (b) Tera kaokoron ana kauring te Atua ma aia tua aomata?
2 Te taetae n Ebera ae te nauna are rairaki bwa “taeka [ke ‘kauring,’ NW]” n angiin te tai, e nanonaki iai tuua, kaetieti ao booto n reirei ake e angania ana aomata te Atua. N angiin te tai, a riai ni kaetaki ke ni kaboouaki aia tua aomata, ma a kaokoro ana tua ma ana boto n reirei Iehova bwa a onimakinaki n taai nako. E ngae ngke a anganaki aomata ni kaineti ma te tai teuana ke ibukin te bwai ae riki, ma a tuai mani kairua. E taku te tia areru: “Akea tokin raoiroin am taeka [ke “am kauring,” NW].”—Taian Areru 119:144, BG.
3, 4. (a) A irekereke ma tera ana kauring Iehova? (b) A na kanga ni kakabwaiaaki tibun Iteraera ngkana a mutiakini?
3 Ko bae n tia n ataia ae a irekereke ana kauring Iehova ma rongorongo ibukin te kauring n tabetai. A katoatai n anganaki kauring te natannaomata ae Iteraera rinanoia ana burabeti te Atua. N te katoto, a kauringaki tibun Iteraera irouni Mote teutana te tai imwain rinia n te Aba ni Berita ni kangai: “Kam na tarataraingkami, ba a kawa nanomi ni mamanaki, ao kam kawa n rairaki nako, ma n toro irouia anti tabeman, ma n taromauriia; ao e kawa unin Iehova n ura nako imi.” (Te Tua-Kaua 11:16, 17, BG) E kaotaki n te Baibara bwa e angania ana aomata te Atua kauring aika rangi ni bati ake a buokaki iai.
4 E kaumakia tibun Iteraera Iehova n taai riki aika bati bwa a na maakua, a na kakauongo nakoni bwanaana ao ni katabua arana. (Te Tua-Kaua 4:29-31; 5:28, 29) Ngkana a mutiakini kauring aikai, a a kakoauaa iai bwa a na reke kakabwaiaaia aika bati.—Nakoaia Ibonga 26:3-6; Te Tua-Kaua 28:1-4.
AROIA TIBUN ITERAERA NAKON ANA KAURING TE ATUA
5. Bukin tera bwa e buaka Iehova ibukin te Uea are Etekia?
5 E boni kakoroi bukin ana berita te Atua nakoia tibun Iteraera n taai ni kabane ake a aitara iai ma kangaanga aika kakaiaki. N te katoto, ngke e ninia Iuta Uean Aturia are Tennakeriba bwa e na kataenikaia te Uea are Etekia, ao e ibuobuoki Iehova ni kanakoa ana anera temanna. A tiringaki “aomata ake a korakora ake a ninikoria” man ana taanga Aturia iroun ana anera te Atua i nanon tii teuana te tairiki, ngaia are e a riai n okira abana ma te kamaamaeaki Tennakeriba. (2 Rongorongo 32:21, BG; 2 Uea 19:35) Bukin tera bwa e buaka te Atua ibukin te Uea are Etekia? Ibukina bwa “e nimnimta Iehova, e aki nako man iran nanona, ma e kakawakin ana tua.”—2 Uea 18:1, 5, 6, BG.
6. Tera aron te Uea are Iotia ni kaotiota onimakinan Iehova?
6 Te katoto riki teuana ni kaineti ma temanna are e ongeaba nakon ana tua Iehova bon te Uea are Iotia. Ngke e rangi n ataei bwa ai tibwa wanua ana ririki, ao e a moanna ni “kakaraoa ae riai i matan Iehova . . . ao e aki rairaki nakon te angaatai ke nakon te angamaing.” (2 Rongorongo 34:1, 2, BG) E boni kaotiota onimakinan Iehova Iotia n arona ni kaitiaka te aba ni kaaki bouannanti ao ni kaoka te taromauri ae koaua. Ni karaoan anne, e a karokoi iai kakabwaia tiaki tii nakoina ma nakoia naba natannaomata ni kabane.—Wareka 2 Rongorongo 34:31-33.
7. Tera ae na riki nakoia tibun Iteraera ngkana a kakeai bongan ana kauring Iehova?
7 Ma e kananokawaki bwa a aki onimakini raoi ana kauring Iehova ana aomata n taai nako. Inanon tienture aika bati, a tiotio i marenan te ongeaba ao te aki ongeaba. Ngkana e kekerikaaki aia onimaki, a riai ni kamanenai ana taeka te abotoro Bauro n angiin te tai ngkai a “katiotioaki n reirei aika ai aron taian ang.” (I-Ebeto 4:13, 14) Ao n aron are e taetae ni burabetinaki, a na bon taia te bwai ae mao ngkana a aki onimakini raoi ana kauring te Atua.—Nakoaia Ibonga 26:23-25; Ieremia 5:23-25.
8. Ti na kanga ni karekei reireiara man aia katoto tibun Iteraera?
8 N te aro raa ae ti kona iai ni kakabwaiaaki man aia katoto tibun Iteraera? N aron are e riki nakoia, a anganaki naba ana toro te Atua ni boong aikai te reirei ni kairiri ao te reirei ni kaetieti. (2 Betero 1:12) E kona n riki Ana Taeka te Atua ae kaira koreana bwa te bwai ni kauring nakoira n taai ni kabane ake ti wareware iai. Ibukina bwa ti karikaki bwa aomata aika inaomata ni karaoa ae ti tangiria, ti a kona ngkanne n rineia bwa ti na ongeaba nakon ana kairiri Iehova ke ti kona n uaiakini baika a eti n ara iango. (Taeka N Rabakau 14:12) Ti na rinanoi bukina tabeua ngkai ti kona n onimakini raoi ana kauring Iehova ao arora ni kakabwaiaaki mani mutiakinaia.
ONGEABA IROUN TE ATUA AO KO NA MAIU
9. E kanga Iehova ni kakoauaa raoi bwa e boutokaiia tibun Iteraera ngke a mena n te rereua?
9 Ni mwanangaia tibun Iteraera are a a ririanna iai n te maan ae 40 te ririki n “te rereua are ababaki are kakamaku,” e bon aki angania Iehova kabwarabwaraani mwanangaia aika mataata ibukin arona ni kairiia, ni kamanoia, ao ni kawakinia imwaini mwanangaia. Ma e ngae n anne, e okioki ni kamataataa nakoia bwa a kona n onimakinna ma ana kaetieti. Ni kamanenaan te boua are te nang n te ngaina ao te ai n te tairiki iroun Iehova, e a kauringia iai tibun Iteraera bwa e boni boutokaiia ngkai e kairiia rinanoni mwanangaia ae kangaanga anne. (Te Tua-Kaua 1:19, BG; Te Otinako 40:36-38) E bon angania naba baike a kainnanoi ibukini maiuia. “A aki riki ni mane kunnikaiia, ao a aki tibu waeia.” Ni koauana, “a aki kai nanoia n te bwai teuana.”—Neemia 9:19-21, BG.
10. Tera aron Iehova ni kairiia ana aomata ni boong aikai?
10 A a uakaan ngkai ana toro te Atua ni boong aikai ma te waaki ae boou i aon te aba ae mena iai te raoiroi. Ti onimakina Iehova bwa e na katauraoi baika ti kainnanoi bwa ti aonga ni kamaiuaki man “te rawawata ae korakora” ae e a kaan roko? (Mataio 24:21, 22; Taian Areru 119:40, 41) Ni koauana, e aki anganira te boua ae te nang Iehova ao e aki naba kairirira n te ai nakon te waaki ae boou i aon te aba. Ma e kamanena ana botaki ibukini buokara n teimatoa n taratara raoi. N te katoto, e a korakora riki katuruturuani kakawakin teimatoan ara onimaki rinanon te ukeuke n reirei i bon iroura ni warekan te Baibara, kakaraoan te Taromauri n Utu n te tairiki, ao ai uana naba ma te katoatai n iriri ni bobotaki ao te mwakuri ni minita. Ti a tia ni bitii arora bwa ti aonga n iri nanoni kaetieti aikai? Ngkana ti karaoa aei, ti na boni buokaki iai ni karikirakea te aeka n onimaki ae korakora are ti kainnanoia bwa ti aonga ni kamaiuaki n te waaki ae boou i aon te aba.
11. Baikara aaro ake e kaotia iai te Atua bwa e tabeakinira?
11 Irarikini buokara bwa ti na teimatoa n tantani n te aro n taamnei, ti buokaki naba ni kaetieti aika ti karerekei ibukini baika riiriki ni maiura ni katoabong. A irekereke katoto aikai ma kateimatoaan te iango ae riai ni kaineti ma bwaikorakin te maiu aei ao kateimatoaan taraan te bwai ae tii teuana bwa e aonga ni karako tabeaiangara. Ti a tia naba ni kakabwaiaaki mani kairiri ni kaineti ma arora ni kunnikainira ao katamaroaara, rineani kaakibotu aika manena ao motinnanoan ara reirei ae tau. Ao iangoi kauring ibukini kamanoakira ake ti anganaki ni kaineti ma mwengara, ara kaa, Taabo n Taromauri ao arora ni katauraoira imwain kabuanibwai aika karina. E kaotaki man reirei ni kairiri akanne bwa e bon tabeakini marurungira te Atua.
A BUOKAKI KRISTIAN AKE RIMOA N TEIMATOA NI KAKAONIMAKI MAN TAIANI KAURING
12. (a) Tera te reirei teuana are e okioki n taekinna Iesu nakoia taan rimwina? (b) Tera te mwakuri n nanorinano are e ururingaki i nanon te tai ae maan irouni Betero, ao tera aron rotakira iai?
12 N te moan tienture, a katoatai ana aomata te Atua ni karerekei kauring. E bon okioki Iesu n taetae nakoia ana abotoro ibukin riaia ni karikirakea te nanorinano. Ma e boni karaoa ae bati riki nakon are e na tii tuangia taan rimwina te bwai ae nanonaki n te nanorinano, bwa e kaota aroni maiuakinana. N ana kabanea ni bong Iesu i aon te aba, e botiia ana abotoro ibukin te Toa ae te Riao. Ngke a a kume n amwarake ana abotoro, e teirake Iesu ao e teboki waeia ae te mwakuri ae taneiai ni karaoaki iroun te toro. (Ioane 13:1-17) A bon ururinga te mwakuri n nanorinano aei i nanon te tai ae maan. Tao 30 te ririki imwina, ao e angania raao n te onimaki te abotoro Betero, are e mena naba n te kabanea ni katairiki anne, te reirei ni kairiri ibukin te nanorinano. (1 Betero 5:5) Ti riai ni bane ni kaungaaki n ana katoto Iesu bwa ti na kaotiota te nanorinano i marenara.—I-Biribi 2:5-8.
13. Tera te aroaro ae rangi ni kakawaki are e kauringia taan rimwina Iesu bwa a riai ni karikirakea?
13 Te reirei riki teuana are e aki toki ni maroroakinna Iesu ma taan rimwina, bon riaia ni kakorakorai aia onimaki. Imwini kabwakaia taan rimwin Iesu ni kanakoa te taimonio mairoun te teinimwaane ae taniaki iai, a a titirakina Iesu ni kangai: “E aera ngkai ti aki kona ni kaotinakoa?” E taku Iesu: “Ibukina bwa e karako ami onimaki. I tuangingkami te koaua bwa ngkana iai ami onimaki ae uarerekeni koraan te matitati, . . . akea te bwai ae kam na aki kona ni karaoia.” (Mataio 17:14-20) E reireinia taan rimwina Iesu n ana tai ni mwakuri ni minita ni kabane bwa te onimaki bon te aroaro ae rangi ni kakawaki. (Wareka Mataio 21:18-22.) Ti kamanenai raoi ara tai aika reke ibukini kakorakoraan ara onimaki n iri nanoni kaetieti aika kateimatoaira ake ti anganganaki n taiani bwabwaro, ruunga, ao bobotaki ni Kristian? Bon taai akanne ake ti riai ni kaotiota iai onimakinan Iehova bwa a rangi ni kakawaki riki nakon taai ni bobotaki ni kakukurei.
14. E aera bwa e kakawaki ni boong aikai karikirakean te tangira are kaotiotia Kristo?
14 E onrake te Koroboki ni Kristian ae Tabu n te Taetae ni Kuriiti n taiani kauring ibukin arora ni kaotiota te tangira i marenara. E taekinna Iesu bwa te kauoua n tua ae kakawaki bon ‘tangiraia raora n aomata n aron tangirara i bon iroura.’ (Mataio 22:39) N aron naba anne, e atonga te tangira bwa “te tua n uea” ai tarin Iesu are Iakobo. (Iakobo 2:8) E korea ae kangai te abotoro Ioane: “Ngkami aika kam tangiraki, I aki korea te tua ae boou nakoimi, ma I korea te tua nikawai are mena iroumi man te moantai.” (1 Ioane 2:7, 8) Tera ae nanonna Ioane ngke e taekina “te tua ni kawai”? E bon nanona iai te tua ibukin te tangira. N iangoana, bon te tua “nikawai” bwa e a kaman anga Iesu “man te moantai” tatabebwi te ririki n nako. Ma e “boou” naba ibukina bwa e kainnanoaki iai te tangira ae ko anga iai boni ngkoe, are a kona ni kainnanoia taan rimwini Kristo ngkana a aitara ma baika boou. Ngkai taan rimwini Kristo ngaira, tiaki ngkanne kakaitau n taiani kauring aika buokira ni kawakinira bwa ti na aki karikirakea te nano ae bangaomata ae aroaroia kaain te aonnaba aei, are e kona n uruana tangiraia raora n aomata iroura?
15. Tera mwiokoan Iesu ae moan te kakawaki i aon te aba?
15 E kaotiota tabeakinaia aomata Iesu. Ti nora ana mwamwannano ngke e kamarurungia aoraki, mwauku ao e kautiia maate. Ma e ngae n anne, mwiokoan Iesu ae moan te kakawaki bon tiaki kamarurungan rabwataia aomata. E rangi ni korakora ao n teimaan riki rotakini maiuia aomata man ana uarongorongo ao ana angareirei. N te aro raa? N te katoto, ti ataia bwa te koraki ake e kamarurungia Iesu ao ni kautiia man te mate n te moan tienture, a a manga rikirake ni kara teutana imwin teutana ao ni mate, ma a na karekea naba te maiu n aki toki te koraki ake a kukurei ni butimwaea te rongorongo are e tataekinna.—Ioane 11:25, 26.
16. Tera aron raababan uarongorongoan te Tautaeka n Uea ao te mwakuri ibukini karekeaia taan rimwini Kristo ni boong aikai?
16 Ni boong aikai, e a tia ni karaoaki te mwakuri n uarongorongo are e moanna Iesu n te moan tienture n te aro ae rangi n raababa nako riki. Eng, e tua ae kangai Iesu nakoia taan rimwina: “Mangaia are naako, reireinia aomata mai buakoia botannaomata nako bwa a na riki bwa taan rimwiu.” (Mataio 28:19) Ni koauana, a a tia ni karaoa anne ao ti kona ni kangai, eng ti a bon tia naba! E raka i aon itua te mirion mwaitiia taani Kakoaua ibukin Iehova aika taningamarau ao n ingainga n tataekina Ana Tautaeka n Uea te Atua n aaba aika raka i aon 230, ao a katoatai naba n reirei ma aomata n te Baibara aika mirion ma mirion mwaitiia. E kakoauaaki man te uarongorongo aei bwa ti a mena ngkai ni kabaneani boong.
ONIMAKINAN IEHOVA N TAAI AIKAI
17. Tera te reirei ni kairiri are e anga Bauro ao Betero?
17 E teretere bwa a buokaki Kristian ake rimoa bwa a na teimatoa n nene n te onimaki man taiani kauring. Iangoa te kaungaunga are e anganaki Timoteo ngke e tuangaki ni kangai iroun te abotoro Bauro n te tai are e kabureaki i Rom: “Ko na teimatoa n taui taeka aika koaua ake ko ongo irou.” (2 Timoteo 1:13) Imwini kaungaaia raao ni Kristian bwa a na karikirakei aroaro n aron te nanomwaaka, tangiraia taari ma te taotaonakinnano iroun te abotoro Betero, ao e a taekina ae kangai: “N na tauraoi n taai nako ni kauringingkami taekani baikai, e ngae ngke kam bon atai ao kam teimatoa n te koaua.”—2 Betero 1:5-8, 12.
18. Tera aroia Kristian ake n te moan tienture n iaiangoi kauring?
18 Eng, iai i nanon aia reta Bauro ma Betero “taeka ake a a kaman taekinaki irouia burabeti ake a itiaki.” (2 Betero 3:2) E koaua bwa a rawa tarira ake n te moan tienture ni butimwaei kaetieti akanne? A bon aki, bwa anne kaotan ana tangira te Atua are a a buokaki iai n “ririkirake n te akoi ae rianako, ao n te atatai ibukin ara Uea ae Iesu Kristo.”—2 Betero 3:18.
19, 20. E aera bwa ti riai n onimakini ana kauring Iehova, ao ti na kanga ni kakabwaiaaki iai?
19 Ni boong aikai, a bati bukina ngkai ti onimakini ana kauring Iehova aika n ana Taeka aika koaua ae te Baibara. (Wareka Iotua 23:14.) Ti kona n nori i nanona baike e karaoi te Atua nakoia aomata aika aki kororaoi i nanoni nga ma nga te ririki. E koreaki rongorongon rimoa aei ibukini kakabwaiaakira. (I-Rom 15:4; 1 I-Korinto 10:11) Ti a tia noria bwa e koro bukin te taetae ni burabeti man te Baibara anne. E kona ni kabotauaki te taetae ni burabeti ma kauring aika a a kaman taekinaki. N te katoto, a a tia n ikoikotaki mirion ma mirion aomata nakon taromaurian Iehova ae itiaki n aron are e taetae ni burabetinaki bwa e na riki ni “boong aika kaitira.” (Itaia 2:2, 3, BG) E kakororaoaki naba te taetae ni burabeti ae n te Baibara n rikini baika rangi ni bubuaka n te aonnaba. Ao n aron ae e a tia n taekinaki, boni kaotan raoi kakororaoan ana taeka Iesu teimatoani karababaan nako te mwakuri n uarongorongo ae okoro ni katobibia te aonnaba.—Mataio 24:14.
20 E a tia ara tia Karikiriki ni kawakin rongorongona ake ti kona n onimakini. Ti kakabwaiaaki mai iai? Ti riai n onimakini ana kauring. E boni karaoa anne Rosellen. E taku neiei: “Ngke I a moanna n onimakina Iehova ma nanou ni kabane, I a mataata riki n ana mwakuri n tangira are kateimatoaai ao ni kakorakoraai.” Ti bia kakabwaiaaki naba mani kawakinan ana kauring nako Iehova.