Aia Titiraki Taani Wareware . . .

Bukin tera bwa te Atua e aki katoka karawawataaia aika mangori irouia aika kakannato?

A koreaki n te Baibara rongorongo tabeua ibukini karawawataaia aika mangori irouia aika kakannato. Ti a uringa iai rongorongon Nabota.a E uea Aaba i aoia tibun Iteraera n te katebwina n tienture B.C.E., ao e kariaia buuna are Ietebera bwa e na kamatea Nabota ma natina mwaane bwa e aonga n taua ana tawaana ni kureebe. (1 Uea 21:1-16; 2 Uea 9:26) E aera bwa te Atua e aki katoka kamanenaan te mwaaka ni kariri n te aro ae rangi ni buakaka anne?

Ti na katuuaa iangoani bukina teuana ae kakawaki: E aki kona ni kewe te Atua. (Tito 1:2) Tera irekereken anne ma karaoani mwakuri aika bubuaka ao ni karawawata? Ni moani karikaia aomata iroun te Atua, e kauringia botannaomata bwa ane e karitei nakoina e na boni karekea mwin ana mwakuri ae kananokawaki ae te mate. E boni koaua ana taeka te Atua bwa a bane n rinanon te mate aomata ni moa man te karitei n te onnaroka i Eten. Ni koauana, e riki te moani mate man te mwakuri ni karawawata ngke e tiringa tarina Kain are Abera.—Karikani Bwaai 2:16, 17; 4:8.

E kakimototoaki n Ana Taeka te Atua ni kangai ibukin rongorongoia aomata mangkekei ni karokoa ngkai: “E taua aron te aomata temanna te aomata temanna ni karekea oini kaina iai.” (Te Minita 8:9, BG) A a tia ni koro nanon taeka aikai? E kauring Iehova nakoia te natannaomata ae tibun Iteraera ake ana aomata bwa a na karawawataaki irouia aia uea ao a na tang ni bubutii buokaia mairoun te Atua. (1 Tamuera 8:11-18) E boni karawawataia naba ana aomata n te aro ae riao te Uea are wanawana ae Toromon. (1 Uea 11:43; 12:3, 4) E korakora riki aia mwakuri ni karawawata ueea aika buakaka n aron Aaba. Iangoia: Ngkana e totokoi aeka ni mwakuri n iowawa ni kabane te Atua, tiaki ngkanne bwa a na kakeweaki baike e taekin?

Uringnga naba bwa e taekinna Tatan ae a beku aomata ibukin te Atua tii ibukini kakabwaiaaia. (Iobi 1:9, 10; 2:4) Ngkana e kamanoia ana toro ni kabane te Atua man aeka n tautaeka aika korakora, e aki ngkanne koaua ana taeka Tatan? Ao ngkana e totokoi aeka ni karawawata nako te Atua ibukia aomata ni kabane, tiaki bwa e nang bukinaki ngkanne n te kewe ae korakora riki? Ngkana e kamanoia n aron anne, a a kona n iangoia aomata aika bati bwa a kona n tautaekania n te aro ae nakoraoi ao a aki kainnanoa te Atua. Ma boni kaitaraan anne ae taekinaki n Ana Taeka te Atua bwa e aki kona te aomata ni kaetieta eueutakina i bon irouna. (Ieremia 10:23) Ti kainnanoa rokon Ana Tautaeka n Uea te Atua bwa tii anne ae na toki iai te mwakuri n ribuaka.

E nanonaki n anne ngkanne bwa akea te bwai ae karaoia te Atua ibukin te karawawataaki? Tiaki ngaia anne. Iangoi baika uoua ake e karaoi: Te moan, e kaotaraea bwa tera raoi te karawawataaki. N te katoto, e kaotaraeaki n ana Taeka iteran nako ana mwakuri ni kamwane Ietebera nakon Nabota. E kaotaraeaki naba n te Baibara bwa a kaungaaki aeka ni mwakuri aika bubuaka akanne iroun te tia kairiri ae korakora are e aki kan ataaki. (Ioane 14:30; 2 I-Korinto 11:14) E kaotaki teuanne n te Baibara bwa bon Tatan te Riaboro. E buokira te Atua bwa ti na kainaomataaki mani mwakuri aika bubuaka ni kaotaraeani baika bubuaka, taiani karawawataa ao teuare e karikii. Mangaia are e boni kamanoi ara kantaninga ibukin taai aika a na roko.

Te kauoua, e anga te kantaninga ae boni koaua raoi te Atua ibukin tokin te karawawataaki. Ti kakoauai ana berita nako bwa e na boni katuuaaeia aomata aika buakaka ni kabane n te bong teuana, n arona ni kaotaraea aroia Aaba ma Ietebera, ni motiki taekaia ao ni katuuaaeaia n ikotaki naba ma aomata riki tabeman aika bati ake ai aroia. (Taian Areru 52:1-5) E anga naba te kantaninga ae onimakinaki te Atua bwa e na waekoa ni kabooa mwin nako te buakaka nakoia te koraki ake a tangiria.b Mangaia are n te tai ae imwaira, e na bon noria Nabota are kakaonimaki bwa e na maiu ma natina n aki toki n te bwaretaiti i aon te aba are ai akea iai te ribuaka.—Taian Areru 37:34.

[Kabwarabwara ae nano]

[Kabwarabwaraan n iteraniba 11]

“E taua aron te aomata temanna te aomata temanna ni karekea oini kaina iai.”—Te Minita 8:9, BG

‘E aki kona ni kewe te Atua.’—Tito 1:2