Kabongana Ana Taeka te Atua Bwa E Maiu!

1, 2. Tera mwiokoani Mote iroun Iehova, ao tera te karaunano are E anganna?

KO KONA n iangoia bwa tera arom ngkana ko a tei i matan te tia tautaeka ae rangi ni mwaaka i aon te aonnaba ao n taetae nakoina ibukia ana aomata Iehova? Ko na bae n namakina te nakonnano, ko aki ataa te bwai ae ko na taekinna ao ko maaku. Ko na kanga ni katauraoa am taeka? Tera ae ko na karaoia bwa ko aonga ni kona ni maroro ao n aki maaku ngkai te tia tei ngkoe ibukin te Atua ae moan te mwaaka?

² Anne raoi te bwai are e rinanona Mote. E a tia n tuangnga Iehova ae e “nimamanei riki nakoia aomata ni kabaneia aika mena i aonaba,” ao e kanakoaki naba nakoni Barao bwa e na kainaomataia ana aomata te Atua mani karawawataaia ao tautoronakia i Aikubita. (Warekaia Iteraera 12:3, BG) N aron ae e kakoauaaki ni baika a riki, bon te aomata ae aki karinerine Barao ao e kamoamoa. (Te Otinako 5:1, 2) E ngae n anne, e tangiraki Mote iroun Iehova bwa e na tua nakoni Barao bwa e na kainaomataia ana toro aika tao tenua te mirion man te aba anne! Ti kona n ataia bwa e aera Mote ngke e titirakina Iehova ni kangai: “Kanga antai ngai, ae N na nako ni Barao iai, ma ni kaotinakoia tibun Iteraera mai Aikubita?” E boni bae n namakinna Mote bwa e aki tau ao akea ana konabwai. Ma e karaua nanona te Atua bwa tiaki tii ngaia ni karaoa anne. E taku Iehova: “N na boni memena i roum.”—Te Otinako 3:9-12, BG.

3, 4. (a) Baikara baike e maakui Mote? (b) E aera ngkai e na bae n titeboo am namakin ma Mote ngkana ko kaaitara ma te kangaanga?

³ Baikara baike e maakui Mote? E teretere raoi bwa e maaka are e na aki butimwaea ke ni mutiakina te tia tei ibukin Iehova ae te Atua Barao. E maaka naba are e na aki kakoauaaki irouia ana botannaomata are e a tia ni mwiokoia Iehova bwa e na kaotinakoia mai Aikubita. Ngaia are e taku Mote nakon Iehova: “Ma noria, ane a na aki ira nanon au taeka, ao a na aki kan ongo bwanau: ba ane a na kangai, E tuai ni kaoti Iehova nako im.”—Te Otinako 3:15-18; 4:1, BG.

⁴ E kona n reke reireiara ae ringi nanora n tatabemanira nako man ana taeka Iehova nakoni Mote ao ni baike a riki rimwi riki. Ni koauana, tao ko tuai man tei i matan te tia kairiri ae rietata nakoana n te tautaeka. Ma ko a tia n rinanon te kataaki ngkana ko taekina te Atua ma ana Tautaeka n Uea nakoia naba kaain am aono ao aomata nako ake ko kaitiboo ma ngaiia ni katoabong? Ngkana ngaia anne, iangoa reireiam ae kona n reke n te baere e rinanona Mote.

“TERA ANE I NANONI BAIM?”

5. Tera te bwai are e kaaki Iehova i nanoni baini Mote, ao e kanga ni buokaki bwa e na aki maaku? (Nora te taamnei ni moan te kaongora aei.)

⁵ Ngke e kabwarabwaraa raoi bukini maakuna Mote are a na aki kakoauaa ana taeka aomata, e a kataubobongaaki iroun te Atua nakoni baike imwaina. E taekinaki n te rongorongo ae n Te Otinako ni kangai: “E taku Iehova [nakoni Mote], Tera ane i nanoni baim? Ao e taku, Te kai ae irariki. Ao E taku, Kaki i aontano. Ao e kaki i aontano, ao e riki ba te naeta; ao e biri nako Mote mai mwaina. Ao E taku Iehova nakoni Mote, Arora baim ao taua bukina: (ao e arora baina, ao e tauua, ao e riki ba te kai i nanoni baina:) ba a aonga n taku ba [I] boni kaoti nako im.” (Te Otinako 4:2-5, BG) Eng, e katukaki te bwai i nanoni baini Mote iroun te Atua are e a kakoauaaki raoi iai bwa bon te rongorongo mairoun Iehova. E taraaki irouia tabeman bwa e rangi ni kamimi karikan te kai ae irariki nakon te bwai ae maiu ni mwaakan te Atua! E kakoauaaki n te kakai aei bwa e a ninikoria riki Mote n taetae ao e boutokaaki iroun Iehova. Mangaia are, e a tuangnga Iehova ni kangai: “Ko na uouota te kai aei i nanoni baim, ae ko na karaoi kanikina iai.” (Te Otinako 4:17, BG) Man te bwai ni kakoaua ae iai mwaakan te Atua i nanoni baini Mote, e a kona ni waaki ao n tei ibukin te Atua ae koaua n aki nanokokoraki i mataia ana botannaomata ao i matan naba Barao.—Te Otinako 4:29-31; 7:8-13.

6. (a) Tera ae riai ni mena i nanoni baira ngkana ti uarongorongo, ao bukin tera? (b) Kabwarabwaraa bwa e kanga ni “maiu ana taeka te Atua” ao ni “mwaaka.”

⁶ E kona n tabekaki te titiraki naba anne ibukira ngkana ti tataekina te rongorongo man te Baibara nakoia tabemwaang ae kangai: “Tera ane i nanoni baim?” N taai aika bati ao e na bae ni mena te Baibara i nanoni baira ao ti tauraoi ni kabongana. E ngae ngke a kona tabeman n iangoa te Baibara bwa bon tii te boki ae raoiroi ma e boni kataetaeira Iehova rinanon ana Taeka ae kairaki koreana n te taamnei. (2 Betero 1:21) Iai i nanona ana berita te Atua ibukini baika a na riki i aan ana kairiri ana Tautaeka n Uea. Anne bukina are e a kona ni korea iai ae kangai te abotoro Bauro: “E maiu ana taeka te Atua ao e mwaaka.” (Wareka Ebera 4:12.) A bane ana berita Iehova n teimatoa ni waaki nakoni kakoroani bukia, a aki bibitaki ao a na boni bane ni koro bukia. (Itaia 46:10; 55:11) N te tai are e a ataa iai aei temanna ibukin Ana Taeka Iehova, e a kona n rangi n rota maiuna te bwai are e warekia n te Baibara.

7. Ti na kanga ni kona “ni kabwarabwaraa taekan te koaua n te aro ae eti”?

⁷ Eng, e a tia Iehova ni kaaki i nanoni baira ana Taeka ae maiu ae e a tia ni koreaki are ti kona ni kakoauaa iai bwa e bon nako mairouna ara rongorongo ao e kona n onimakinaki. Maroaka are imwin ana koroboki Bauro nakoia kaain te baronga ae Ebera, e a kaumaka iai ana aomata are e kataneia ni bwaai n taamnei are Timoteo bwa e na ‘kakorakoraa ni kabwarabwaraa taekan te koaua n te aro ae eti’! (2 Timoteo 2:15) Ti na kanga ni maiuakina ana reirei ni kairiri Bauro? Boni man arora ni wareki ni kabaibati kiibu aika a a tia n rineaki raoi ike a a kona n ringaki iai nanoia ake a na ongora iroura. Ti bon anganaki turaeki n 2013 ake a a tia ni karaoaki ibukini buokara ni karaoan anne.

WAREKA TE KIBU ARE E A TIA N RINEAKI RAOI!

8. Tera are e taekinna temanna te mataniwi ibukin te mwakuri ni kaineti ma turaeki?

⁸ A bane turaeki aika boou aikai n tii te tikina teia. Ngaia are ngkana ti a tia n reiakina kabonganaan teuana mai iai, ti a rabakau ngkanne ni kabonganai ni kabane. A bebete kamanenaaia? E korea ae kangai temanna te mataniwi ibukin te mwakuri i Hawaii, i U.S.A: “Ti aki ataia n te tai anne bwa e na rangi n nakoraoi aroni kabonganaani bwaai ni mwakuri aika boou aikai n te uarongorongo man te auti teuana ma teuana ao n aia tabo botannaomata.” E kunea teuanne bwa a a tia turaeki aikai ni koreaki n te aro are a a kaungaaki iai aomata bwa a na kukurei ni butimwaei ao mani karaoan aei, e a kairiri n taai nako nakoni maroro aika a anainano. E namakinna teuanne bwa e riki aei man te titiraki ma kaekaana aika bati akana n te moan iteraniba i aon turaeki. E aki riai n tabeaianga kaain te auti ngkana e bure ana kaeka.

9, 10. (a) A kanga ni kaungaaki nanora n ara turaeki bwa ti na kabongana te Baibara? (b) A nga mai buakon turaeki aikai ake ko a tia ni kabonganai n te aro ae rangi n uaana, ao bukin tera?

⁹ Ti kaungaaki n turaeki aikai ni kabane bwa ti na wareka te kibu are e a tia n rineaki raoi. N te katoto, nora te turaeki ae Iai te Tai ae E na Akea Iai te Rawawata? N aki ongeia bwa tao e rinea ana kaeka nakon te titiraki anne kaain te auti ae “eng,” “akea” ke “tao,” raira te turaeki ao tai manga taetae ma tii kangai: “Aio te bae e taekinaki n te Baibara.” Imwina, wareka Te Kaotioti 21:3, 4. 

¹⁰ Tii te arona naba ma kabonganaan te turaeki ae Tera Aron Iangoan te Baibara Iroum? E aki akaka bwa e nga ae e na rineia mai buakoni kaeka aika tenua ake ni moan iteranibaan te turaeki. Tii rairia ao kangai: “E taekinaki n te Baibara bwa ‘e kairaki korean te Koroboki ae Tabu ni kabane iroun te Atua.’” Ko kona naba ni kangai: “Ni koauana, e bati riki ae taekinaki n te kibu anne.” Imwina, kauka am Baibara ao wareka 2 Timoteo 3:16, 17 ni kabane.

11, 12. (a) Tera raun nanom ae reke man te mwakuri ni minita? (b) Ko na kanga ni buokaki n taian turaeki ibukini katauraoam ni manga okiraia aomata?

¹¹ Ko kona n ataia bwa mwaitira riki ae ko na warekia ao ni maroroakinna man te turaeki, man aroni kaain te auti ni butimwaeiko. N aki ongeia bwa tao tera aroia aomata ni butimwaea te turaeki, ma e rau nanom bwa ko a tia ni wareki tabeua Ana Taeka te Atua nakoia ao n angania te turaeki, e ngae naba ngkana ko tii wareka teuana te kibu ke uoua ni moan rokom. Rimwi riki, ko a kona n reitaanako te maroro.

¹² E katauraoaki i tinanikun turaeki ni kabane te titiraki ae mena i aan te atu ae “Te Bae Ti Na Iangoia” ao kiibu ake a kona ni maroroakinaki ni manga okiran te aomata. Bon iai te titiraki n te turaeki ae Tera Am Iango Ibukin Taai Aika A na Roko? ibukini manga okiran te aomata ae kangai: “E na kanga te Atua ni bita ara aonnaba nakon ae nakoraoi riki?” ao a kaotaki iai kiibu aika Mataio 6:9, 10 ao Taniera 2:44. Bon iai te titiraki n te turaeki ae A Kona ni Manga Maiu Maate? ae kangai: “Bukin tera bwa ti rikirake ni kara ao ni mate?” ao a kaotaki iai kiibu aika Karikani Bwaai 3:17-19 ao I-Rom 5:12.

13. Kabwarabwaraa aroni kabonganaan turaeki ibukini moanakin reirei man te Baibara.

¹³ Kabonganai turaeki bwa kaanga atibu aika mwaneka ibukini moanakin reirei man te Baibara. Ngkana e kabonganaaki te QR code ane i akun te turaeki iroun temanna, e na kairaki iai nakon ara atureti ae kakawaraki n te Internet ao e bae ni kaungaaki bwa e na reirei n te Baibara. E taekinaki naba n turaeki akanne te boroutia ae Te Rongorongo ae Raoiroi Mairoun te Atua! ao e katereaki iai te reirei teuana i nanona. N te katoto, e kairiri te turaeki ae Antai Raoi ae E Taua Taekan te Aonnaba? nakon reirei 5 n te boroutia anne. E kairiri te turaeki ae Tera Kiingin te Maiu ae Kakukurei n te Utu? nakon reirei 9. Ni kabonganaan turaeki aikai n aron ae kantaningaaki, ko a kakairi iai n te babaire ae tamaroa ibukini kabonganaan te Baibara ni moan rokom irouia kaain te auti ao manga okiraia. Ibukin anne, a a kona ni moanaki reirei n te Baibara aika bati riki. Tera riki ae ko kona ni karaoia ni kabongana iai Ana Taeka te Atua n te aro ae uaana n am mwakuri ni minita?

MAROROAKINA TE REIREI AE A IAIANGOIA AOMATA

14, 15. Ko na kanga ni kakairi n aroni Bauro n am mwakuri ni minita?

¹⁴ E rangi ni kan atai aia iango “aomata aika bati” Bauro n ana tai ni mwakuri ni minita. (Wareka 1 I-Korinto 9:19-23.) Noria, e boni kantaningaia Bauro ‘bwa e aonga n anai nanoia I-Iutaia, bwa e aonga n anai nanoia ake a mena i aan te tua, bwa e aonga n anai nanoia ake akea te tua irouia, bwa e aonga n anai nanoia ake a mamaara.’ Eng, e tangiria bwa e na roko irouia “aomata n aekaia nako, bwa [e] aonga ni kabonganai aanga nako ni kamaiuia tabeman iai.” (Mwakuri 20:21) Ti na kanga ni kakairi n aroni Bauro ngkai ti katauraoira ibukin uataboan tibwaan te koaua nakoia “aeka n aomata nako” n ara aono?—1 Timoteo 2:3, 4. 

¹⁵ Iai ni katoa namwakaina n Ara Mwakuri ni Minita reirei ibukin arora n uarongorongo n te mwakuri ni minita. Kataia ni kabonganai. Ma ngkana iai reirei riki tabeua aika a iaiangoi aomata akana n am aono, katauraoa te reirei ae na kauekea kan ongoraeia ae e kaineti raoi ma baike a kani maroroakin. Iangoa te tabo ae ko mena iai, aomata riki tabeman ake a maeka iai ao baike a rangi n tabeaianga iai. Imwina, iangoa te kibu teuana ae kaineti raoi ma baika a kani maroroakin. E taekina ae kangai temanna te mataniwi n te aono ae uarereke ma buuna ibukin aroia ni kaatuua kabonganaan te Baibara: “A kariaia angiia kaain te auti bwa ti na wareka te kibu teuana ngkana ti na taekina te bwai ae kakawaki ao ni kakimototoa. Imwin te kamauri n aron ae bwabwainaki ma ara Baibara ae uki i nanoni baira, ti boni wareka te kibu.” Iangoi tabeua katoto ake a a tia n noraki bwa a uaana ibukin reirei, titiraki ao kiibu riki tabeua n te mwakuri n minita ake ko kona ni manga katai n am aono.

16. Kabwarabwaraa bwa e na kanga ni kabonganaaki Itaia 14:7 n te mwakuri ni minita?

¹⁶ Ngkana ko maeka n te tabo ae e aki toki n uruanaki iai te rau, ko bae n titirakina temanna ni kangai: “Ko kona n iangoa te kaongora ni moan iteranibaan te nuutibeeba ibukin te bong aei ae kangai: ‘A bane ni motirawa ma te rau kaain aonaba, ao a takarua ni kukurei’? Bon anne ae taekinaki n te Baibara n Itaia 14:7, (BK). Ni koauana, a bati n te Baibara ana berita te Atua ibukin taai aika na roko ake ti na kantaningaa iai te rau.” Imwin anne, tauraoi ni wareka teuana mai buakoni berita akanne man te Baibara.

17. Ko na kanga ni kabongana Mataio 5:3 n am maroro?

¹⁷ E kangaanga katauraoani baike a kainnanoaki n te utu irouia mwaane aika bati n am aono? Ngkana ngaia anne, ko kona ni moana am maroro ni kangai: “A na mwaitira te mwane ae e kona temanna ni karekea ibukia ana utu bwa a aonga ni kukurei?” Imwin ana kaeka, manga reitia ni kangai: “A bati mwaane ake a rawata riki aia mwane nakon anne ma a teimatoa naba aia utu n aki rauaki. Ngaia are tera raoi ae kainnanoaki?” Imwina, wareka Mataio 5:3 ao kaira te reirei man te Baibara.

18. Ko na kanga ni kabebetei nanoia aomata ni kabonganaan Ieremia 29:11?

¹⁸ A rotakibuaka kaain am aono n te kabuanibwai are e a tibwa tia n riki? Ko kona ni moana am maroro ni kangai: “I roko ma te rongorongo ibukini kabebetean nanom. (Wareka Ieremia 29:11, BK.) Ko nori baika tenua ake e tangiri te Atua ibukira? Bon ‘te rau,’ ‘bwaai aika raoiroi n taai aika a na roko’ ao ‘te kantaninga.’ E aki kakukurei ngkanne ataan ae e tangirira bwa a na nakoraoi maiura? Ma e na kanga n reke anne?” Imwin anne, kaira ana iango nakon te reirei ae kaineti raoi ma am maroro n te boroutia ae Te Rongorongo ae Raoiroi.

19. Kabwarabwaraa bwa e na kanga ni kabonganaaki Te Kaotioti 14:6, 7 n te maroro ma aomata aika taua te Aro.

¹⁹ Ko maeka n te tabo ae butimwaeaki iai te maroro ibukin te Aro? Ngkana ngaia anne, ko kona ni moana te maroro ni kangai: “Ngkana arona bwa e taetae te anera nakoim, ko na ongora n te baere e na taekinna? (Wareka Te Kaotioti 14:6, 7.) Ngkai e kangai te anera aei ‘maaka te Atua,’ e aki ngkanne kakawaki kinaakin ae antai te Atua are e iangoia? E taekina te bwai ae na kauki ara iango ngke e taku te anera bwa bon ‘Teuare karaoa karawa ma aonnaba ma marawa ma koburaken raan.’ Antai ngkanne teuanne?” Imwina, wareka Taian Areru 124:8 (BG) ae kangai: “E mena buokara n aran Iehova, Are karaoa karawa ma aonaba.” Manga okiria ni kabwarabwaraa ae bati riki ibukin Iehova ae te Atua.

20. (a) N te aro raa ae e kona ni kabonganaaki iai Taeka N Rabakau 30:4 ibukin reireian temanna aran te Atua? (b) Iai te kibu riki teuana ae ko kabongana ma uaana aika tamaroa?

²⁰ Ko kona ni moana te maroro ma te roro n rikirake n taekinan aei: “I kukurei ni wareka te kibu teuana are e na tabekaki iai te titiraki ae rangi ni kakawaki. (Wareka Taeka N Rabakau 30:4.) Akea te aomata n te aonnaba aei ae e tonu raoi ibukin te kabwarabwara aei, ngaia are e boni bae ni kabwarabwaraaki iai ara tia Karikiriki.a Ti na kanga n ataa arana? I kukurei ni kaotia nakoim man te Baibara.”

E BIA KAKORAKORAAKI AM MWAKURI NI MINITA N ANA TAEKA TE ATUA

21, 22. (a) E na kanga ni kona ni bitaki maiun temanna n te kibu ae e a tia n rineaki raoi? (b) Tera ae ko motinnanoia bwa ko na karaoia n am mwakuri ni minita?

²¹ Ko aki ataa aroia aomata nako ni butimwaea te kibu ae e a tia n rineaki raoi. N te katoto, a karebwerebwe uoman taani Kakoaua i Aotiteria n ana mataroa temanna te ateiaine. E titirakina neiei temanna mai buakoia ni kangai: “Ko ataa aran te Atua?” ao imwina e wareka Taian Areru 83:18. E taku te ateiaine aei: “I bon rangi ni mimi! Ngke a kitanai, I buti n te raroa ae 56 te kiromita nakon te titooa ni boki ni kakaaei tabeua riki rairai n te Baibara ao imwina I a manga kakaaea te ara anne i nanon te rikitinare. Ngke I a kakoauaa bwa aran te Atua bon Iehova, I a titirakinai i bon irou bwa tera riki ae I aki ataia.” Ma imwin tabeua te tai, e a moana reiakinan te Baibara neiei ma teuare e nang riki bwa buuna ao a kaai ni bwabetitoaki rimwi riki.

²² A bitaki maiuia akana a wareka Ana Taeka te Atua ao ni karikirakea onimakinan ana berita nako Iehova. A na kaungaaki n te onimaki aei bwa a na maiuakina are a reiakinna. (Wareka 1 I-Tetaronike 2:13.) E rangi ni mwaaka riki te rongorongo ae n te Baibara nakon te bwai ae ti kona n taekinna ni kataia n rota iai nanon te aomata temanna. Anne bukina ae ti riai ni kabongana Ana Taeka te Atua ni katoaa te tai ae ti konaa iai bwa e boni maiu!