E Kakukurei Aroni Katauraoan Turaeki Aika Boou!

¹ N te Bwabwaro ae “Te Koaua Ana Taeka te Atua” n 2013 ao a a kaotinakoaki iai nimaua turaeki aika boou. Irarikin anne, e a tia n ikotaki te turaeki ae Rongorongon te Tautaeka n Uea Na. 38 ae “A Kona ni Manga Maiu Mate?” bwa raon turaeki aika kakaokoro. A bane turaeki aika onoua aika boou aikai ni kakukurei aroni katauraoaia. Baikara bukina ngkai e boou aroni katauraoaia? Ngkana ti tibwainako taian turaeki man te auti teuana ma teuana, tera arora ni kamanenai taamneia?

2. Tera te kantaninga ibukini katauraoana ae boou?

² Bukin Tera Bwa E Boou Aroni Katauraoana?: N angiin te tai ao a irekereke mwaneka aika aua aikai ma kawaran te auti teuana ma teuana n te aro ae uaana: (1) Tabeka te titiraki ae kauekea te iango ibukini moanakin te maroro. (2) maroro i aon te iango teuana man te Baibara. (3) Aanga te boki ae na warekia kaain te auti. (4) Katuka te titiraki teuana are ko na kaekaa n okim are imwina, ao bairea am tai ni manga okiria. Ti buokaki n aroni katauraoan te turaeki ae boou aei bwa e na bebete iroura touani mwini mwaneka ni kabane aika aua akanne.

3. Tera arora n anganako teuana mai buakon turaeki aika boou n ara mwakuri ni minita?

³ Arora ni Kamanenai: (1) Ngkana ko a tia ni kamaura kaain te auti, kaota nakoina taian titiraki aika kakaokoro aika kakannongora ao tuangnga bwa e na rinea te titiraki teuana ae mena ni moan te turaeki, ao titirakinna ana iango. (2) Kauka te turaeki ao rinanoa “Te Bae E Taekinaki n te Baibara.” Wareka te kibu teuana man te Baibara ngkana e angaraoi. Ngkana e mwaawa ana tai kaain te auti ao maroroakina te iango ae “Manenana Ibukim.” (3) Anganna te turaeki ao kaungaa bwa e na wareka kanoana ni kabane ni mwaawan ana tai. (4) Imwaini kitanakina, kaota nakoina te titiraki ane i akun te turaeki ae mena i aan te taeka ae “Te Bae Ti na Iangoia” ao bairea am tai ni maroroakina te kaeka man te Baibara ni manga okim are imwina.

4. Ti na kanga ni kamanenai turaeki aika boou ibukini manga okiraia aomata?

⁴ E bebete naba aroni manga okiraia aomata. Kabonganai tii kiibu aika kaotaki i akun te turaeki ni kaekaa te titiraki are ko tabekia n tokin am maroro, n rokom n te tai ae nako. Imwain nakom, kaota taamnein te boroutia ae Te Rongorongo ae Raoiroi Mairoun te Atua, kaota nakoina te boroutia ao te reirei ae kabwarabwaraaki riki iai taekan te boto n iango anne ao anganna. Ngkana e butimaea te boroutia, bairea am tai ni maroroakina kanoan te boroutia n okim are imwina. Ko a bae n tia ni moana te reirei n te Baibara! Ke ko kona n anganako te turaeki teuana n oneani mwin are ko na anganako te boroutia ao bairea am tai ni manga okira kaain te auti ibukini maroroakinana.

5. Baikara manenan turaeki n ara mwakuri ni minita?

⁵ A a tia ni kamanenaaki turaeki n ara mwakuri ni minita i nanon130 tabun te ririki. E ngae ngke a kaokoro buburaia ao teia, ma a a riki bwa bwaai n ibuobuoki aika rangi ni manena n te uarongorongo. Ti bia kamanena raoi aroni katauraoana ae boou, ibukini kateimatoaani kabutanakoan te atatai man te Baibara ni katobibia te aonnaba.​—TaeRab. 15:7a.