Aroni Moanakin te Maroro ma Taian Turaeki

Man Tianuare 2018, e kaotaki aron te maroro i tinanikun Ara Boki n Reirei ae Maiura ao Ara Mwakuri ni Minita. Ti kaungaaki bwa ti na kaatuua ara iango i aon te maroro ma aomata nakon ae ti na tii anga te boki nakoia. Ibukini buokaia taan uarongorongo ni bita aia anga n uarongorongo, a kaotaki taamnei ni kaineti ma aroni moanakin te maroro ae kabonganaaki iai tii te Baibara. E nanonaki n aei bwa ti a aki riai ni kabonganai booki ngkana ti uarongorongo man te auti teuana ma teuana? Tiaki ngaia anne! N te katoto, a kona n uaana taian turaeki ibukini moanakin te maroro. Ti kona ni kabongana te anga aei ngkana ti kabonganai taian turaeki:

1. Tabeka te titiraki ae bati kaekaana are mai moa.

2. Kaota ana kaeka te Baibara n te kibu are mai eta n te kauoua n iteraniba. Ngkana e angaraoi, wareka kanoana ao maroroakinna.

3. Angani kaain te auti te turaeki, ao kaungaa bwa e na wareka kanoana ni mwawan ana tai.

4. Imwain nakom, kaota te titiraki i aan te atu ae “Te Bae Ti na Iangoia” ao baireia bwa ko na maroroakina kaekaana man te Baibara n okim are imwina.

Maroroakina te kaeka n okim, ao katuka te titiraki are kam na manga maroroakinna imwina. Ko kona n rinea te titiraki teuana man ara atureti n te intanete ke man te boki are kaotaki i tinanikun te turaeki. N taina ae angaraoi, kaota te boroutia ae Te Rongorongo ae Raoiroi Mairoun te Atua! ke te boki n reirei teuana man Ara Bwai ni Mwakuri Ibukin te Angareirei.