Titiraki Aika Kaekaaki Man Te Baibara

A na kangaa ataei n reiakina tangiran te Atua?

A kona natimi n reiakina tangiran te Atua tii ngkana a nora te bwai ni kakoaua bwa boni iai ngaia ao e tangiriia. A riai ni kinaa te Atua ngkana a na tangiria. (1 Ioane 4:8) N te katoto, a riai n ataia bwa: Tera ana kantaninga te Atua ngke e karikiia aomata? E aera ngkai e aki katoka te rawawata te Atua? Tera ae na karaoia te Atua ibukia aomata n taai aika a na roko?—Wareka I-Biribi 1:9.

Ngkana ko na buokiia natim bwa a na tangira te Atua, ko riai ni kaotia moa bwa ko tangiria. Ngkana a nora anne, a na manga kakairi n am katoto.—Wareka Te Tua-Kaua 6:5-7; Taeka N Rabakau 22:6.

Ko na kangaa n rotii nanoia natim?

E mwaaka ana taeka te Atua. (Ebera 4:12) Mangaia are buokiia natimi bwa a na reiakini moan reirei aika n te Baibara. E tabeki titiraki Iesu, e kakauongo ao e kabwarabwarai kiibu man te Baibara bwa e aonga n rotii nanoia aomata. Ngkana ko na ringi nanoia natim, ko kona n kakairi n aron Iesu n anga reirei.—Wareka Ruka 24:15-19, 27, 32.

Irarikin anne, a kona ni buokaki ataei bwa a na kinaa ao n tangira te Atua n rongorongona man te Baibara ngke e buokiia aomata. A tauraoi booki ake a karaoaki ibukin te kantaninga aei, n te intanete ae www.pr418.com.—Wareka 2 Timoteo 3:16.