Karuanikain te Tautaeka ae Babakanikawai

E kabwarabwaraaki te tautaeka ae babakanikawai bwa boni kabonganaani mwaakaia aomata n te aro n iowawa ibukini kakabwaiaaia. E a kamani waakinaki i nanon te tai ae maan te aeka ni mwakuri aei. N te katoto, e karinaki n te Baibara te tua ibukini katabuakan kabonganaan te bwai n anainano n taai ni boowi. E kaotaki iai bwa e a kamani kakaraoaki te mwakuri aei 3,500 tabun te ririki n nako. (Te Otinako 23:8) Ni koauana, e bati riki ae irekereke ma te babakanikawai nakon tii butimwaeani bwaai n anainano. N tabetai, a iraei bwaai ake a na kaboonakoaki bwakuakun te tautaeka, a taui mwakuri ake a aki riai n reke irouia ke a boni kimoai naba mwaane. A kona naba ni kabonganai nakoaia n inanonano, n rineia raoraoia ao aia koraki n te aro ae aki riai.

E ngae ngke e kona n reke te babakanikawai n aia botaki aomata nako, ma e taraa n ae te tautaeka boni karoton te babakanikawai. Ni boreetian te boki ae 2013 Global Corruption Barometer n te botaki ae te Transparency International, e a ribootinaki iai ae a iangoia aomata ni katobibia te aonnaba bwa botaki aika nimaua ake karoton te babakanikawai bon te bwaatei n te tautaeka, bureitiman, bwakuakun te tautaeka, kaain te auti n tei ao taani karao tua. Iangoi tii tabeua ribooti aika a katuruturua te kangaanga aei.

• ABERIKA: N 2013, a a tia n tiatinaki n aia bure bwakuakun te tautaeka aika 22,000 i Aberika Maiaki, ni karaoan aroaro aika bubuaka ibukin te babakanikawai.

• AMERIKA MAIAKI: N 2012, a kabureaki aomata aika 25 i Brazil imwini kabonganaan ana mwane te botannaomata ibukini boutokaan te tautaeka. Temanna mai buakoia nakanne bon te mataniwi irouia ana tia mwakuri te Beretitenti are mai mwaina, ae te kauoman ni mwaaka i aon te aba.

• ATIA: A mate 502 aomata i Seoul i Korea Maiaki imwini bwakarakia n te titooa ae rangi ni bubura n 1995. A kunea taani kakaae bwa a anga bwaai n anainano nakoia taani kateitei bwakuaku n te kaawa anne, bwa a na kabonganai buriki aika maraurau ike a urui tuua ibukin mauria aomata.

• EUROBE: “E rangi ni kamimi butanakon te kangaanga [ae te babakanikawai i Eurobe]” n aron are e taekinna Cecilia Malmström ae te Kamitina n te European Commission Home Affairs. E reitia n taekinna neiei bwa “akea nanon te tautaeka ni kakaaea bukin rikin te babakanikawai ao katokana.”

E rangi ni kangaanga irouia aomata katokan te tautaeka ae babakanikawai. E koreia te Burobetia ae Susan Rose-Ackerman ae mwaatai ibukin totokoan te babakanikawai, bwa a tangiraki “bitaki aika kakawaki ibukin aron te tautaeka ni kaineti ma bitineti ibukini kanakoraoan anne.” E ngae ngke e taraa n akea katokana, ma e kaotaki n te Baibara bwa a aki tii kona n riki ma a na boni korobukia.