N Aanga Raa ae Tangirira Iai Iehova?

1. Tera ae e kaungaia Kristian te abotoro Ioane bwa a na iaiangoia, ao bukin tera?

E KAUNGAIRA te abotoro Ioane bwa e kakawaki iroura iaiangoan raoi te baere e taekinaki n 1 Ioane 3:1. N taekinan taeka aika “taraa aron ana tangira te Tama ae e kaotia nakoira” iroun Ioane, e kaungaia Kristian bwa a na iaiangoa raababan ao korakoran ana tangira te Atua ibukia, ao arona n tangiriia. N ataakin ana tangira Iehova n itera akanne, e a kakorakoraaki tangirana iroura ao ti a kaaniaki riki nakoina.

2. E aera bwa e kangaanga irouia tabeman iangoan ae e tangiriia te Atua?

² Ma, e kangaanga irouia tabeman iangoan ae e tangiriia te Atua. A iangoia bwa e riai ni maakaki te Atua ao n ongeaba te aba irouna. Ke tao ibukin reireiaia tabeua aika aki eti ao akea koauaia, a a iangoia bwa e ribuaka te Atua ao e aki tatangira. N te itera are teuana, iai ake a kakoauaa ae akea tian ana tangira te Atua, n aki ongeia bwa tera kabwakaia ke te bwai ae a karaoia. Ngke ko reiakina te Baibara, ko a ataia ae e moanibwai aroaron Iehova ae te tangira, are e a anga iai Natina bwa te karea ni kaboomwi ibukira. (Ioa. 3:16; 1 Ioa. 4:8) Ma e na bae ni kangaanga iroum namakinan ae e tangiriko Iehova mani kaikawaam ao baike ko rinanoi.

3. Tera te koaua ae kakawaki ae na buokira n ataia ae e tangirira te Atua?

³ N aanga raa ngkanne ae e tangirira iai Iehova? Ni kaekaan te titiraki anne, ti riai n iaiangoa reitakira ae kakawaki ma Iehova ae te Atua. Ni koauana, bon ngaia ae e Karikiia botannaomata. (Wareka Taian Areru 100:3-5.) Anne bukina ae e aranaki Atam n te Baibara bwa “natin te Atua,” ao e reireinia Iesu taan rimwina bwa ana wetea te Atua bwa “Tamara are i karawa.” (Ruka 3:38; Mat. 6:9) Kioina ngkai te tia Anga te Maiu Tamara ae Iehova, ngkanne irekerekera ma ngaia kaanga aron irekereken te tama nakon natina. E teretere iai bwa e tangirira Iehova n aron te karo ae tangiriia natina.

4. (a) E kangaa ni kaokoro Iehova ma taama aika i aon te aba? (b) Tera ae ti na rinanona n te reirei aei ao are imwina?

⁴ Ni koauana, a aki kororaoi taama aika i aon te aba. A bae ni kataia ni katotonga raoi aron Iehova are e kaotia bwa te karo ngaia ae tatangira, ma a aki kona. E ngae n anne, iai tabeman ake e titiku i nanoia ururingan aroni kaikawaaia n utu aika a aki raoiroi, ike e a riki bwa karawawataaia ae korakora ke manekan nanoia. E rangi ni kammaraki ma ni kananokawaki ao e karuanikai. Ni koauana, tiaki te karo ae aron anne Iehova. (TaiAre. 27:10) Ti na boni kaaniaki riki ma Iehova, n ataan ae e tangirira ao n tabeakinira. (Iak. 4:8) N te reirei aei, ti na neneri aanga aika aua ake e kaotii iai ana tangira ibukira. Ti na rinanoi riki aanga aika aua n are imwina, are ti a kona iai ni kaota tangirana.

TE TIA KATAURAOI BWAAI IBUKIRA IEHOVA AE TATANGIRA

5. Tera ae tuangia kaain Atenai te abotoro Bauro ibukin te Atua?

⁵ Ni menan te abotoro Bauro i Atenai, i Kuriiti, e nora te kaawa bwa e onrake n atua aika bouannanti ake a kakoauai aomata bwa a angania maiuia ao baika a kainnanoi. E kairaki Bauro bwa e na taekina ae: “Te Atua are e karaoa te aonnaba ma bwaai ni kabane ake iai, . . . boni ngaia ae anga te maiu ma te ikeike ao bwaai ni kabane nakoia aomata nako. . . . Ti maiu irouna ao ti kakammwakuri, ao iai ngaira.” (Mwa. 17:24, 25, 28) Eng, ibukin ana tangira Iehova, e a katauraoi “bwaai ni kabane” aika ti kainnanoi ibukini kateimatoaani maiura. Iangoa aron te bwai ae kataaki n taekinaki anne ae kai ota te aba iai.

6. E kangaa ni kaota tangirara te Atua ni karikan te aonnaba? (Nora te taamnei ni moan te kaongora aei.)

⁶ Iangoa aron te aonnaba are a ‘anganaki natiia aomata’ iroun te tia Karaoia ae Iehova. (TaiAre. 115:15, 16, BG) A kabanea te mwane ae rangi bati taan rabakau ni bwain te aonnaba n ukeuke i tinanikun ara buraneti, ni kakaaei aeka ni buraneti riki tabeua, ae ai aron ara aonnaba. E ngae ngke bubua ma bubua buraneti ake a kuneaki, ma a bwara nanoia taan rabakau bwa akea teuana mai iai ae e boraoi aron te maiu ae a na kona aomata ni maiu i aona, n aron ara aonnaba aei. E taraa n ae e onoti te aonnaba mai buakon ana karikibwai te Atua. Karaua iangoia, mai buakoni buraneti aika aki kona ni warekaki ake a noraki i buakon te nna n itoi ae Naiabu ao e nako riki, e karaoa te aonnaba Iehova tiaki tii ibukini maekanakina ma e kamwengaraoi, e tamaroa ao a mano iai aomata ake e karikiia! (Ita. 45:18) E oti n aei bwa e rangi n tangirira Iehova.—Wareka Iobi 38:4, 7; Taian Areru 8:3-5.

7. E kangaa aroni karikara iroun te Atua ni kaotia iai bwa e bon tangirira?

⁷ E ngae ngke e karika mwengara ae tamaroa Iehova, e ataia ae iai riki ae ti kainnanoia irarikini bwaai n rabwata ngkana ti na kukurei ao n rauaki. E kakoauaa raoi te ataei bwa e mano ngkana e nora aia tangira ao aia mwamwannano ni koaua ana karo. E karikiia aomata Iehova bwa katotongana, n anganakia te kona n iango n ai arona ao ni kakaitau n ana tangira ao ana mwamwannano. (KBwaai 1:27) N reitaki ma anne, e taku Iesu: “A a kukurei akana ataia bwa a kainnanoa te Atua.” (Mat. 5:3) Ngkai bon te Tama ae tatangira Iehova, e “anganganira bwaai ni kabane ni kabatiai ibukini kakukureiara,” n te aro n rabwata ao n taamnei.—1 Tim. 6:17; TaiAre. 145:16.

E REIREINIRA IEHOVA AE TATANGIRA

8. Tera bukina ngkai ti na reireiaki iroun “te Atua ae koaua” ae tatangira?

⁸ A tangira natiia taama ao ni kani kamanoia mani burebureakia ke mwamwanaakia. Ma a bati ake a aki kona n angania natiia te kaetieti ae eti, ibukina bwa a rawa ngaiia ni butimwaei kaetieti man Ana Taeka te Atua. E noraki mwina ae kamangaongao ao te aki kukurei. (TaeRab. 14:12) N te itera are teuana, Iehova bon “te Atua ae koaua.” (TaiAre. 31:5, BG) E tangiriia natina ao e kukurei ni kaota ana oota ae koaua ibukini kairaia n iteran nako maiuia, moarara riki ni baike a kaineti ma te taromauri. (Wareka Taian Areru 43:3.) Tera te koaua ae kaotia Iehova, ao e kangaa ni kaotia iai bwa e tangirira?

9, 10. E kangaa ni kaota tangirara Iehova n arona n reireinira te koaua (a) i bukina? (b) i bukira?

⁹ Te moan, e boni kaota Iehova te koaua ibukina. E kaota arana ae bati n taekinaki n te Baibara nakon aara riki tabeua. Ikai are e a kaanira iai Iehova, bwa ti aonga ni kinaa. (Iak. 4:8) E kaotioti naba aroarona, bwa te aeka n Atua raa ngaia. Ngkai e kakoauaaki mwaakana ao wanawanana ni bwaai ni kabane aika karikaki, e kaota naba arona ni kaetitaeka ao riki ana tangira ae akea tiana, n te Baibara. (IRom 1:20) Titeboo ngaia ma te tama ae e aki tii korakora ao ni wanawana, ma e kaetitaeka n ae riai ao e tatangira, are e bebete irouia natina bwa a na karekea aia iraorao ae kaan ma ngaia.

¹⁰ E kaota naba te koaua Iehova nakoira ibukini kakabwaiaara, ae bon ana babaire i aoni bwaai ni kabane ibukira. E boutokaaki iai te rau ao te aki mangaongao irouia kaain ana utu aika aomata ao anera. Ti reiakinna n te Baibara bwa a aki karikaki aomata ma te kona n tautaekania i bon irouia ao n inaomata mairoun te Atua. Ngaia are, e na boni iai mwia aika kananokawaki ngkana e kakeaaki kakawakin te koaua aei. (Ier. 10:23) E rangi ni kakawaki aei nakoni maiura. Ti kona ni kukurei ao ni boonnano, tii mani butimwaean ana kairiri te Atua. Ai batira ana tangira Iehova, ngkai e kaota kakawakin te koaua aei!

11. Tera ae beritanna Iehova, are kaota iai tangirara ao tabeakinara?

¹¹ E rangi n tabeaianga te tama ae tatangira ibukia natina ibukin taai aika imwaia. E tangiria bwa e na manena ao ni kakukurei maiuia. Ma e kananokawaki bwa a tabeaianga angiina aomata ibukin taai aika imwaia, ke a kakorakoraia ni moanibwai tiia aika aki teimaani kakabwaia iai. (TaiAre. 90:10) Ngkai natin te Atua ngaira, ti namakinna ae ti rangi n tangiraki ibukina bwa e beritana Iehova maiura ae kakukurei n te tai ae imwaira. Anne are e oti iai bonganan ao bukini maiura.

E REIREINIA NATINA IEHOVA AO E KAETIA

12. E kangaa ana reirei ni kairiri Iehova ao ana kaetieti nakoni Kain ao Baruka, ni kaota tangiraia ao tabeakinaia irouna?

¹² “Ko aera ngkai ko un? Ao e aera ngkai ko moa noku? Ngkana tao ko karaoa ae raoiroi, ao tiaki ko na mutiakinaki? . . . Ma ko riai n tokanikai i [aon te bure].” (KBwaai 4:6, 7, BG) E roko raoi n taina te reirei ni kairiri anne, ae irianaki ma te kaetieti ae mataata. E kauringaki Kain iroun Iehova ngke e nang karaoa te mwakuri ae rangi ni karuanikai. E kananokawaki bwa e aki mutiakina te kauring anne, ao e rotakibuaka iai. (KBwaai 4:11-13) Ngke e namakina te bwarannano ao te rawawata Baruka ae ana tia koroboki Ieremia, e buokaki n anganaki te reirei ni kairiri iroun Iehova bwa e na ataa oin ana kangaanga. E butimwaea ana reirei ni kairiri Iehova ao tiaki n aroni Kain, ao aio are e a kamaiuaki iai Baruka.—Ier. 45:2-5.

13. E aera Iehova ngke e aki tuki kataakia ana toro aika kakaonimaki?

¹³ E korea aei Bauro: “Ane e tangiria Iehova ao e reireinna ni kaetietia, bwa ni koauana, e kataereia aomata nako ake e natinia.” (Ebera 12:6) E ngae n anne, akea tian te reirei ni kaetieti ibukin te katuuaa. A kakaokoro aekana nako. A bati katoto n te Baibara ibukia ana toro aika kakaonimaki ake a aitara ma kataaki aika kakaiaki, ake a bae n anganaki reirei ni kaetieti ao ni kataneiaaki iai. Iangoi aia katoto Ioteba, Mote ao Tawita. Iai naba rongorongoia i buakoia naake a rangi n ataaki ao ni mataata karakinaia n te Baibara. Ti namakinna mani warekan rongorongoia ngke e raonia Iehova n aia tai ni kataaki ao n angania mwakuri aika kokorakora, bwa e rangi n tabeakinia ao n tangiriia.—Wareka Taeka N Rabakau 3:11, 12.

14. Ti na kangaa n ataa ana tangira Iehova ngkana ti reireiaki irouna?

¹⁴ Ti buokaki n ana reirei ni kaetieti Iehova n ataa riki aekan ana tangira teuana. Ngkana a tia ni karaoa ae bure aomata ake a kaetietaki iroun Iehova ao a butimwaeia man rairi nanoia, ‘e na kaabwabwaka kabwaraan aia bure.’ (Ita. 55:7, BG) Tera ae nanonaki n anne? E taekina Tawita ana kabwarabure Iehova ae ringa te nano n taeka aikai: ‘E kabwaraa am bure ni kabane; ae katoki aorakim ni kabane; ae kaboa maium man te mate; ae bauniko n te atataiaomata ma te nanoanga; ai aron raroani mainiku mai maeao kararoaan ara bure irouna mai iroura.’ (TaiAre. 103:3, 4, 12, BG) Ti bia tatauraoi n taai nako ni butimwaea ana reirei ni kairiri Iehova, ana kaetieti ao ni waekoa ni mutiakin are oti iai bwa akea tian tangirara irouna.—TaiAre. 30:5.

E KAMANOIRA IEHOVA AO E KAWAKINIRA

15. Tera ae oti iai bwa a kakawaki ana aomata Iehova irouna?

¹⁵ Ni koauana, te bwai ae moanibwai iroun te tama ae tatangira boni kamanoan ao kawakinan ana utu, mani karawawata nako ke kangaanga aika kakaiaki. Anne naba ae karaoia ibukira Iehova ae Tamara are i karawa. E taku te tia areru ibukin Iehova: “E kakawakin tamneiia ana aomata aika itiaki; e kamaiuia mai nanoni baiia akana buakaka.” (TaiAre. 97:10, BG) Iangoa te katoto teuana. A rangi ni kakawaki iroum matam. Anne naba ae namakinna Iehova ibukia ana aomata. (Wareka Tekaria 2:8.) A rangi ni kakawaki naba iroun te Atua ana aomata.

16, 17. Kabwarabwarai aanga ake e kamanoia iai ana aomata Iehova ao ni kawakinia, ao ara bong aikai naba.

¹⁶ Te anga teuana ae kamanoia iai ana aomata Iehova, bon rinanoia ana anera. (TaiAre. 91:11) A kamaiuaki iroun te anera kaain Ierutarem ngke a niniaki irouia ana taanga ni buaka I-Aturia, ao e tiringia 185,000 n tii teuana te tairiki. (2Uea 19:35) A kaotinakoaki man te karabuuti, abotoro aika Betero ao Bauro ma tabeman riki iroun te anera. (Mwa. 5:18-20; 12:6-11) E aki naba kororo bain Iehova n ara bong aikai. E ribootinna temanna te tia tei ibukini kautun ara botaki are e kawara te aobiti n tararua i Aberika, bwa e rotakibuaka te aba anne man aia aki boonnano kaain te tautaeka ao Aaro iai. E riki te mangaongao ao te kakeru iai man te mwakuri n iowawa, te ira, te tautau ao te tiritiri. Ma akea tarira ao mwaanera aika ruanikai maiuia iai, e ngae ngke a bati i buakoia aika a bua aia bwai ao aia mwakuri ni kareketianti. N titirakinaia bwa tera aroia iai, a kaeka ma te mata ni kukurei ni kangai: “A bane n nakoraoi bwaai ao ti kaitaua Iehova!” A namakinna ae e tangiriia te Atua.

¹⁷ E aki tukiia kairiribai Iehova mani kamatean ana toro temanna ae kakaonimaki, n aron Tetebano. Ma, e kamanoia ana aomata ni kabane te Atua n anganakia kauring aika roko n taia, ibukini kaitaraan ana mwakuri n nanowanawana Tatan. (IEbe. 6:10-12) Ti buokaki rinanon ana Taeka ao booki aika boto man te Baibara n ana botaki, bwa ti na ataa koauan ae e karuanikai tangiran te kaubwai, te kaakibotu ae boutokaa te wene ni bure ao te tiritiri, kabonganaan te intanete n te aro ae aki riai ao a bati riki. E mataata bwa ngkai te Tama ae tatangira Iehova, e kawakina raoi marurungia ana aomata ao e kamanoia.

TE MWIOKO AE RIANAKO TAMAROANA

18. Tera am namakin n ana tangira Iehova ibukim?

¹⁸ Imwin rinanoan tabeua ana anga aika nakoraoi Iehova ibukini kaotan tangirara irouna, ti na bon namakina are e namakinna Mote. E taku n iaiangoan arona ni beku iroun Iehova n te tai ae maan: “Kanuaira n am nanoanga n te ingabong; ba ti aonga ni kakatonga ma ni kimareirei n ara bong ni bane.” (TaiAre. 90:14, BG) Ti kona ni karekea ngkai te mwioko ao te kakabwaia ae rangi n rianako tamaroana, n iaiangoan ao rinanoan ana tangira Iehova ibukira. N aron ae e namakinna te abotoro Ioane, ti kairaki naba bwa ti na taekina aei: “Taraa aron ana tangira te Tama ae e kaotia nakoira!”—1 Ioane 3:1.