Ko Kabongana Am Konabwai n Iango ma te Wanawana?

TERA te bwai ae tii tenua te bwauna rawawatana (1.4 te kirokuraem) ao e taekinaki bwa “te bwai ae te kabanea ni kangaanga arona i nanon ara iuniweeti ae ti a tia ni kunea ni karokoa te tai aei”? Bon ana kaburoro te aomata. E bon rangi ni kamimi. Ngkana ti kabatiaa riki reiakinana, e na rikirake riki iai ara kakaitau n ana mwakuri Iehova aika “kamimi.” (TaiAre. 139:14) Iangoa teuana ana mwakuri te kaburoro mai buakon aika bati ae te konabwai n iango.

Ti na kangaa ni kabongana ara konabwai n iango? Te anga teuana boni mani kataamneian ke iaiangoani baika boou ao ni kakukurei, ke baike ti tuai mani kakaraoi. Ngkana ko iangoa anne, ko aki ngkanne kakoauaa ae ko aki toki ni kabongana am konabwai n iango? N te katoto, ko a tia ni wareka ke n ongo taekan te tabo teuana ae ko tuai n roko iai? E na tukiko anne mani kataamneiana n am iango? Ni koauana, ngkana ti iangoa te bwai teuana ae ti aki kona n noria, n ongo, ni katoonga, n ringnga ke n arokia, ti a kabongana iai ara konabwai n iango.

Ti buokaki n te Baibara bwa ti na ota ae a karaoaki ao ni karikaki aomata ni katotongan te Atua. (KBwaai 1:26, 27) E aki teretere ngkanne ae e boni mena iroun Iehova te konabwai n iango? Kioina ngkai e karikira ma te konabwai aei, e boni kantaningaira bwa ti na kabongana n ataa iai nanona. (TeMin. 3:11) Ti na kangaa ni kabongana ara konabwai n iango ma te wanawana ni karaoa iai anne, ao baikara kabonganaan te konabwai n iango ma te aki wanawana aika ti riai n rarawa iai?

KABONGANAAN TE KONABWAI N IANGO MA TE AKI WANAWANA

(1) Te iaiango n te tai ae aki riai ke iaiangoani bwaai aika bure.

E aki bure te iaiango. Ni koauana, e kakoauaaki bwa e kona ni bongana. Ma e buokira Te Minita 3:1 bwa ti na ataia ae ti boni kona ni karaoi bwaai tabeua n te tai ae aki riai, ngkai iai “te tai ae baireaki ibukini bwaai nako.” N te katoto, ngkana ti kariaia bwa a na rerenako ara iango n taini bobotaki n te ekaretia ke n ara reirei n te Baibara i bon iroura, e riki ngkanne ara konabwai n iango bwa te bwai n ibuobuoki ke te bwai n tutuki? E bon anga te kauring ae matoatoa Iesu ibukini karuanikain iangoani baika bure, n aron iaiangoani baika kammaira. (Mat. 5:28) A kona tabeua mai iai ni kairira bwa ti na aki kakukureia nanon Iehova. A kona iaiangoani baika kammaira ni kairiko nakoni karaoan te bwai ae aki riai. Motinnanoia bwa ko na aki kariaia am konabwai n iango bwa e na karaurenakoko ma Iehova!

(2) Iangoan ae e kona te kaubwai ni karekea te mweraoi ae teimatoa.

A kainnanoaki bwaikoraki ao a bongana naba. Ma ti na bon rawawata ngkana ti a moanna n iangoia bwa e kona n reke te mweraoi ni koaua ao te kakukurei mai iai. E korea aei te mwaane ae wanawana ae Toromon: “Kaubwain te aomata ae kaubwai bon ana kaawa ae nonoaki, ao e iangoia bwa kaanga te oo ni kamanomano.” (TaeRab. 18:11) Iangoa te katoto n te baere riki ngke e iekaki 80 tabun te katebubua aoni Manila i Biribin, ni bwakan te karau ae korakora n Tebetembwa 2009. A birinako aomata ma aia bwai aika bati? E taku te mwaane ae kaubwai are a bua angiin ana bwai: “A kaboraoaki aroia aika kaubwai ao aika maiu ni kainnano n te ieka are karikii kangaanga ao rawawata.” E kona ni bebete iangoan ae e reke te mweraoi ao te kamanomano ni koaua man te kaubwai. Ma ni koauana a bon aki.

(3) Te tabeaianga ae aki riai ibukini baika boni kona n aki riki.

E anga te reirei ni kariri Iesu nakoira bwa ti na aki kabatiaa te “raraoma.” (Mat. 6:34) E kabatiaa te iaiango te aomata ae tabeaianga n taai nako. Ti kai kabanei korakorara ngkana ti tabeaianga n iaiangoi kangaanga, aika tuai n riki ke a boni kona n aki riki. E kamatataaki n te Koroboki ae Tabu bwa e kona te raraoma anne ni kabwaranano ao ni karawawata naba. (TaeRab. 12:25, te kabwarabwara mai nano) E kakawaki maiuakinan ana reirei ni kairiri Iesu ae ti na aki kabatiaa te raraoma ao ni kaitaraa kangaangan te bong teuana ma teuana.

KABONGANAAN TE KONABWAI N IANGO MA TE WANAWANA

(1) Kaman atai aaro aika karuanikai ao totokoi.

Ti kaungaaki n te Koroboki ae Tabu bwa ti na ataibwai ao ni kaman iaiango. (TaeRab. 22:3) Mani kabonganaan ara konabwai n iango, ti kona n iangoia bwa tera mwin ara babaire imwaini karaoaia. N te katoto, ngkana ko kaoaki nakon te botaki teuana, e na kangaa am konabwai n iango ni buokiko ni karaoa am babaire ma te wanawana bwa ko na kaea ke ko na aki? Imwin iaiangoani bwaai tabeua tao n aron ae antai riki ae kaoaki, mwaitiia kaain te botaki, e na boo ia ao n ningai, iangoa aei: ‘Tera ae e na kona n riki n te botaki anne?’ Ko kona n iaiangoa te botaki ae kakukurei ae e na boraoi ma booto n reirei man te Baibara? E kona karaoan aei ni buokiko ni kataamneia te botaki anne n am iango. Kabonganaan am konabwai n iango ni karaoi babaire ma te wanawana, e na buokiko n totokoi aaro aika karuanikaia te onimaki.

(2) Kataamneian aroni kanakoraoani kangaanga.

E irekereke naba te konabwai n iango ma te “konabwai ni kaitaraa te kangaanga ao n tokanikai iai.” Iangoia bwa aongkoa iai am kangaanga ma temanna n te ekaretia. Ko na kangaa ni kawara te tari anne ni kataia ni manga karekea te rau? A bati aanga aika a na iangoaki. Tera aron te reitaki ae e tatangiria? N ningai te tai ae riai ibukini maroroakinan te kangaanga? Baikara taeka ao tein te bwanaa ae riai ni kabonganaaki? Mani kabonganaan am konabwai n iango, ko a kona ni kataamnei aanga ibukini kanakoraoan te kangaanga, ao rinea are ko taku bwa e uaana riki ao ni kai butimwaeaki. (TaeRab. 15:28, te kabwarabwara mai nano) E kona ni boutokaaki te rau n te ekaretia ngkana e iaiangoaki te anga anne ibukini kanakoraoan te kangaanga. Aei raoi kabonganaan te konabwai n iango n te aro ae raoiroi.

(3) Kanakoraoan riki am wareware ao am ukeuke n reirei i bon iroum n te Baibara.

E rangi ni kakawaki warekan te Baibara ni katoabong. Ma e bati riki ae kainnanoaki nakon tii warekani baana aika bati. Ti riai n atai reirei aika manena ni baan nako te Baibara ao ni kaungaaki bwa ti na maiuakin. E riai n ririkirake ara kakaitau ibukin aron Iehova rinanon ara wareware n te Baibara. E kona kabonganaan ara konabwai n iango ni buokira ni karaoa aei. N te aro raa? Iangoa te boki ae Imitate Their Faith. E kona n rikirake ara konabwai n iango mani warekan taian rongorongo n te boki aei, ao ti buokaki iai ni kataamneia te bwai ae riki ma aroia n tatabemania nako aomata aika taekinaki n te Baibara. Ti buokaki bwa ti na nori bwaai, ti na ongo taiani bwanaa, ti na aroboi, ao n atai aia namakin naake n te karaki. Ti a kona n atai iai reirei aika tamaroa ao iango aika kaunganano man rongorongo ake n te Baibara ake titeboo bwa ti a kaman atai. Mani kabonganaan ara konabwai n iango n te aro aei, e a kanakoraoaki riki iai ara wareware ao ara ukeuke n reirei i bon iroura n te Baibara.

(4) Karikirakean ao kaotiotan te atataiaomata.

Te atataiaomata bon te aroaro ae tamaroa ae kabwarabwaraaki iai namakinani marakin temanna i nanora. Kioina ngkai a kaotiota te atataiaomata Iehova ao Iesu, ti bon riai ni kakairi irouia. (TeOti. 3:7; TaiAre. 72:13) Ti na kangaa ni karikirakea te aroaro aei? Te anga teuana ae moan te ibuobuoki ibukini karikirakean te atataiaomata, boni kabonganaan ara konabwai n iango. Ti kona n aki ataa te baere e rinanona tarira temanna n te onimaki. Ma ko kona n titirakiniko ni kangai: ‘Tera arou ngke arona bwa e riki aei nakoiu? Tera ae N na kainnanoia?’ Ngkana ti kabongana ara konabwai n iango ni kaekai titiraki aikai, ti a buokaki iai bwa ti na kaotiota riki te atataiaomata. Ni koauana, ngkana ti kaotiota te atataiaomata a na nakoraoi riki iai iterani maiura ni Kristian ni kabane, n ikotaki naba ma ara mwakuri ni minita ao reitakira ma tarira n te onimaki.

(5) Kataamneian aron te maiu n te aonnaba ae boou.

A rangi ni bati rongorongo aika kakukurei n te Koroboki ae Tabu ae a kabwarabwaraa te maiu n ana aonnaba te Atua are beritanna. (Ita. 35:5-7; 65:21-25; TeKao. 21:3, 4) A koreaki n ara boki baika kabwarabwaraaki aikai ma taamnei aika bati ma n tamaroa. Bukin tera? E na karikirakeaki ara konabwai n iango man taian taamnei ao ti buokaki iai bwa ti na nori kakabwaia aika beritanaki aikai. Ngkai bon te tia Karika te konabwai n iango Iehova, bon tii ngaia ae ataa korakoran te konabwai aei. Ngkana ti kabongana n iaiangoi iai ana berita, ti na aki nanokokoraki ni kakoroani bukia ao ti na buokaki iai n teimatoa ni kakaonimaki, e ngae naba ngkai ti nanomwaaka i aani kangaanga n te maiu aei.

E a tia Iehova ae tatangira n anganira te bwai ae kamimi ae te konabwai n iango. Ti boni kona ni buokaki iai bwa ti na toro irouna ni katoabong. Ti bia kaotiota ara kakaitau nakon te tia Anga te bwaintituaraoi ae tamaroa aei, n arora ni kabongana ma te wanawana ni katoabong.