Ioteba ae Kaain Arimataia E Kaota Ana Onimaki

E IANGOIA Ioteba are kaain Arimataia bwa akea ninikoriana ni kawara te kowana n Rom. E ataaki Bontio Birato bwa e riao imanonona. Ma ngkana e na taunaki Iesu n te aro ae rine, e riai temanna ni butiia Birato anaakin rabwatana. Ma e bon aki rangi ni kangaanga te maroro ma Birato n aron are e iangoia Ioteba. Ngke e a ataia Birato mairoun te tautia temanna bwa e a boni mate Iesu, e a kariaia te bubutii anne. E ngae ngke e rangi n rawawata Ioteba ma e waekoa n okira te tabo are kamateaki iai Iesu.​—Mareko 15:​42-45.

• Antai Ioteba are kaain Arimataia?

• Tera irekerekena ma Iesu?

• Ao e aera ngkai e kakawaki ataakin rongorongona?

BONI KAAIN TE TANIRIM

N te Euangkerio ae Mareko are kairaki koreana rinanon te taamnei, e aranaki Ioteba bwa “te aomata ae kakannato ae e kaaina ana boowi te Aro.” Ana boowi te Aro bon tii te Tanirim ae aia boowi ni motikitaeka ae moan te rietata I-Iutaia, ao te rabwata ae tabe ma karaoani babaire. (Mareko 15:​1, 43) Ngaia are Ioteba bon te tia kairiri temanna irouia aomata, ike e a kona iai n tei i matan te kowana n Rom. Bon te mwaane naba ae kaubwai.​—Mat. 27:57.

A rangi n riribaa Iesu kaain te Tanirim ae bwanin ao a baireia bwa a na kamatea. Ma e taekinaki Ioteba bwa “te aomata ae raoiroi ma n eti.” (Ruka 23:50) E aki kakairi irouia angia raona n te Tanirim, bwa e bwabwaina te koaua ao te aroaro ni maiu ae riai, ao e kabanea ana konaa n ongeaba n ana tua te Atua. E “kakantaningaa naba ana Tautaeka n Uea te Atua,” ao tao anne bukin rikina bwa te tia rimwin Iesu. (Mareko 15:43; Mat. 27:57) Ibukin tangiran te koaua irouna ao te kaetitaeka ae riai, e bae n anaaki nanona n ana rongorongo Iesu.

E KARABAA AE TE TIA RIMWIN IESU NGAIA

E taekinaki n Ioane 19:38 bwa Ioteba “bon te tia rimwin Iesu . . . ma e karabaa bwa e maakuia I-Iutaia.” Tera ae e maakua? E ataa aia kairiribai I-Iutaia nakon Iesu ao korakoran nanoia ni kani kabaneia man te tinakoka naake a onimakina Iesu. (Ioa. 7:​45-49; 9:22) Ngkana ko kabaneaki man te tinakoka, ko kamaamaeaki iai, ko ribaaki, ao ko katinanikuaki irouia raom n I-Iutaia. Anne bukina ae e maaku iai Ioteba ni kaota onimakinan Iesu i mataia aomata. E kona ni bua nakoana ao karineana ni karaoan anne.

Tiaki tii Ioteba n aitara ma te kangaanga aei. Ni kaineti ma Ioane 12:​42, “iai naba taani kairiri aika bati ake a a [onimakina Iesu], ma a aki kaota ae a onimakinna ibukina bwa a maakuia Baritaio, ao a kaawa ni kabaneaki man te tinakoka.” E aitara naba ma anne Nikotemo ae kaain te Tanirim.​—Ioa. 3:​1-10; 7:​50-52.

E ngae ngke Ioteba bon te tia rimwin Iesu temanna, ma e aki kona ni kaotia i mataia aomata. Anne bon te kangaanga ae kakaiaki, moarara riki ni kaineti ma ana taeka Iesu aei: “Ane e kaota tauani bukiu i mataia aomata, ao N na kaota naba tauani bukina i matan Tamau are i karawa. Ma ane e kakeaai i mataia aomata ao N na manga kakeaa naba i matan Tamau are i karawa.” (Mat. 10:​32, 33) E aki kakeaa raoi Iesu Ioteba, ma akea naba ninikoriana ni kaotia ae e onimakinna. Anne naba arom?

Ma e kaotaki n te Baibara bwa e karaoa te bwai ae raoiroi Ioteba, bwa e aki boutokai aia babaire kaain te Tanirim ni kamwanea Iesu. (Ruka 23:51) N aron ae a taku tabeman, tao e aki ira Ioteba kaboowian Iesu. N aki ongea te bwai ae riki, ma e bae n uruaki nanona n te motikitaeka ae aki riai aei, ao akea ana anga ni katokia!

E A KARAOA ANA MOTINNANO

N te tai are e mate iai Iesu, e a tokanikai Ioteba i aoni maakuna ao e a motinnanoia bwa e nang boutokaiia taan rimwin Iesu. E kaotaki raoi te motinnano anne ni Mareko 15:​43, ae kangai: “E ninikoria n rin i matani Birato, ao e bubutii rabwatan Iesu.”

N taraana ao e mena Ioteba i rarikin Iesu ngke e mate. E ataia ae e a mate Iesu imwain ataakina irouni Birato. Ngaia are ngke e bubutii rabwatan Iesu, e “kan ataia [te kowana] bwa e a boni mate [Iesu]” ke e tuai. (Mareko 15:44) Ngkana arona bwa Ioteba e nora korakain Iesu ni maraki i aon te kai ni kammaraki, e a kairaki iai bwa e na tuoa mataniwin nanona ao ni motikia bwa e nang tei ibukin te koaua? E boni kona n riki anne. Ma e ngae n anne, e a kairaki ngkai Ioteba bwa e na karaoa te bwai teuana. E nang aki manga karabaa ae tia rimwin Iesu ngaia.

E TAUNA IESU

Ni kaineti ma aia tua I-Iutaia, a riai n taunaki imwaini bungintaai naake a katuuaaeaki n te mate. (TuaKau. 21:​22, 23) Ma irouia kaain Rom, naake a kamateaki bwa taani kamwarua, a katukaki i aon te kai ni kammaraki bwa a na mka rabwataia iai, ke a a karenakoaki naba n te ruanimate teuana. Bon tiaki anne ae e iangoia Ioteba ibukin Iesu. N uakaan ma te tabo are kamateaki iai, ao iai ana ruanimate Ioteba ae e a tibwa ekeaki n te bwaa. Ngkai e tuai ni kabonganaaki te ruanimate aei, e kaotaki iai bwa tao e a tibwa mwaing Ioteba mai Arimataiaa nako Ierutarem, ao e kantaningaia bwa e na kabongana te bwanganimatang aei bwa ruanimateia ana utu. (Ruka 23:53; Ioa. 19:41) Kaiiakin Iesu n ruanimaten Ioteba nakon taai rimwi, boni kaotan ana tituaraoi Ioteba ao e kakoroaki naba iai bukin te taetae ni burabeti are e na taunaki te Mesia “ma akana kaubwai.”​—Ita. 53:​5, 8, 9.

A kaotaki n Euangkerio ake aua bwa ngke e karuoaki rabwatan Iesu man te kai, e niria Ioteba n te rinen ae itiaki ae raoiroi ao e kawenea n ana ruanimate. (Mat. 27:​59-61; Mareko 15:​46, 47; Ruka 23:​53, 55; Ioa. 19:​38-40) Bon tii Nikotemo ae taekinaki bwa e buokia, ao e uotii baika boiarara ibukin te taunimate. Ibukini buburan nakoaia naakai, a na boni bae n aki karuoa rabwatan te mate. A na bae ni kamanenaia aia toro bwa a na uouota rabwatan Iesu ao ni kaiia naba. E ngae ngkana a karaoa anne, ma e bon rangi ni kakawaki te bwai ae a karaoia mwaane aika uoman aikai. Ane e boo ma rabwatan te mate, e na kamwara i nanon itiua te bong, ao a na bane ni kamwara bwaai nako ake e taui. (WarIte. 19:11; Akai 2:13) Ngkana e riki anne, a aki riai n ira wikin te Toa ae te Riao ao a na aki naba bukamarui kanoana nako. (WarIte. 9:6) E boni kona ni bwainingareaki Ioteba irouia raona ngke e bairea taunakin Iesu. Ma n te tai aei, e a kukurei ni butimwaei baike a kona n riki imwin taunakin Iesu n te aro ae rine, ao kaotakina ae bon temanna ngaia te tia rimwini Kristo.

MOTIKAN RONGORONGON IOTEBA

Imwin rongorongon taunakin Iesu n te Euangkerio, e a aki manga taekinaki n te Baibara taekan Ioteba are kaain Arimataia, ike e a ueke iai te titiraki aei: Tera aron teuaei imwina? Ti bon aki ataia. Ma ni kaineti ma te rongorongo ae e a tia n taekinaki, e boni bae n ae e a kaotia raoi teuaei bwa bon te Kristian temanna ngaia. Bwa ni koauana, n tain te kataaki ao te kangaanga n aron aei, e korakora iai ninikoriana ao ana onimaki, ao e aki kekerikaaki, ao anne bon te kanikina ae raoiroi.

E ueke te titiraki man te karaki aei ae ti wanawana ngkana ti bane n iaiangoia raoi: Iai te bwai teuana n aron nakoara, ara mwakuri, ara bwai, reitakira n ara utu, ke inaomatara, ae e moanibwai riki iroura nakon ara iraorao ma Iehova?