“Naako, Reireinia Aomata . . . Bwa A na Riki Bwa Taan Rimwiu”

1-2. (a) Ni kaineti ma ana tua Iesu are ni Mataio 28:​18-20, tera mwiokoan te ekaretia ni Kristian ae kakawaki? (b) Baikara titiraki aika a na rinanoaki n te kaongora aei?

A BAE n ingainga ni kariaria abotoro ngke a ikotaki n rabeen te maunga. Imwini kautakin Iesu, e baireia bwa a na kaitiboo n te tabo anne. (Mat. 28:16) Tao bon te tai aei are “e kaoti [iai] nakoia taari aika 500 tabun n tii te taina.” (1Kor. 15:6) E aera Iesu ngke e tuangia taan rimwina bwa a na kaitiboo ikai? Bwa e na angania mwiokoaia ae kakawaki aei: “Mangaia are naako, reireinia aomata mai buakoia botannaomata nako bwa a na riki bwa taan rimwiu.”​—Wareka Mataio 28:​18-20.

² Taan rimwin Iesu ake a ongo ana taeka aikai, boni ngaiia ake a moani kaaina te ekaretia ni Kristian n te moan tienture. Ao mwiokoaia ae kakawaki bwa a na karekeia riki taan rimwini Kristo.b Ni boong aikai, iai tatabebwi te nga ekaretia ni Kristian ni kabutaa te aonnaba, ao bon anne naba mwiokoaia ae kakawaki. N te kaongora aei, ti na rinanon titiraki aika aua aikai: E aera ngkai e rangi ni kakawaki karekeaia taan rimwini Kristo? Tera ae irekereke ma te mwakuri aei? A bane n uataboa te mwakuri aei Kristian? Ao e aera ngkai ti kainnanoa te taotaonakinnano n te mwakuri aei?

E AERA NGKAI E RANGI NI KAKAWAKI KAREKEAIA TAAN RIMWINI KRISTO?

3. Ni kaineti ma Ioane 14:6 ao 17:​3, e aera ngkai bon te mwakuri ae rangi ni kakawaki karekeaia taan rimwini Kristo?

³ E aera ngkai e rangi ni kakawaki te mwakuri ae karekeaia taan rimwini Kristo? Ibukina bwa bon tii taan rimwini Kristo aika kona n riki bwa raoraon te Atua. Irarikin anne, a nakoraoi riki ngkai maiuia taan rimwini Kristo ao a kantaningaa te maiu ae akea tokina n te tai ae imwaia. (Wareka Ioane 14:6; 17:3.) E anganira te mwioko ae kakawaki Iesu, ma tiaki nanona bwa akea ae e na buokira. E korea aei te abotoro Bauro ibukina ma raoraona ni kaan tabeman: “Raon te Atua ni mwakuri ngaira.” (1Kor. 3:9) Ai kakawakira te tibwanga ae e anga Iehova ao Kristo nakoia aomata aika aki kororaoi!

4. Tera reireiara man aia katoto Ivan ao Matilde?

⁴ E kona ni karekea te kukurei ae bati karekeaia taan rimwini Kristo. Iangoa ana katoto Ivan ma buuna ae Matilde, i Colombia. A uarongorongo nakon te rorobuaka n ataei ae Davier are tuangia ni kangai: “I kani karaoi bitaki ni maiuu, ma I aki konaa.” Bon te tia itau Davier ae kakabongana te drug, e kokoro ni manging, ao e maeka ma raona ae Nei Erika. E taku Ivan: “Ti kakawara Davier n ana kaawa ae tionako, ae nanona bwa ti riai ni bwatika i nanon aoa aika bati ni kawai aika bokaboka. Imwin norakin te bitaki ni maiun teuaei ao n aroarona, e a irira naba te reirei n te Baibara Erika.” Imwina riki ao Davier e a katoka kamanenaan te drug, te kamanging, ao te itau, ao e a mare naba ma Erika. E taku Matilde: “Ngke a bwabetitoaki Davier ma Erika n 2016, ti uringa ana taeka Davier aei, ‘I kani bitaki ma I aki konaa.’ A rotaki nanora ao ti bon tang.” Akea te nanououa bwa ti namakina te kimwareirei ae bati ngkana ti buokiia aomata bwa a na riki bwa taan rimwini Kristo.

TERA AE IREKEREKE MA KAREKEAIA TAAN RIMWINI KRISTO?

5. Tera te moani mwaneka ibukini karekeaia taan rimwini Kristo?

⁵ Te moanibwai ae ti riai ni karaoia boni ‘kakaaeaia’ aomata aika raoiroi nanoia. (Mat. 10:11) Ti kaotiira raoi bwa Ana Tia Kakoaua Iehova ngaira ngkana ti uarongorongo nakoia aomata nako ake ti kaitiboo ma ngaiia. Ti kaotia bwa Kristian ni koaua ngaira ngkana ti ongeaba n ana tua Kristo are ti na uarongorongo.

6. Tera ae kona ni buokira bwa e na uaana ara mwakuri ni minita?

⁶ A ingainga tabeman ni kan reiakini koaua man te Baibara, ma a bati aika taraa n aki bwerengaki n te moantai. Ngaia are tao ti riai ni kauekea kan ongoraeia. Ngkana e na uaana ara mwakuri ni minita, ti riai ni katauraoi raoi. Rinei reirei ake a na bae ni kan ongora riki iai aomata. Imwina, iangoia bwa tera arom n taekinna.

7. Ko na kangaa ni moana te maroro ma te aomata, ao e aera ngkai e kakawaki te kakauongo raoi ao te karinerine?

⁷ N te katoto, ko kona ni kangai nakon te aomata: “I kan ongora am iango ni kaineti ma te bwai teuana. A bati kangaanga aika ti kaaitarai ngkai aika rotaki naba iai aomata ni kabutaa te aonnaba. N am iango ti kainnanoa te tautaeka n aomata bwa e na katoki kangaanga n te aonnaba?” Imwina ko kona ni maroroakina Taniera 2:44. Ke ko kona ni kangai nakon te aomata: “Ko na kangaa ni kaikawaiia natim bwa a na ongeaba? Tera am iango iai?” Imwina maroroakina Te Tua-Kaua 6:​6, 7. N aki ongeia bwa tera te reirei ae ko rineia bwa ko na maroroakinna, ma iaiangoiia aomata ake a na ongora iroum. Iangoia bwa tera kakabwaiaaia man reiakinan ana reirei ni koaua te Baibara. Ngkana ko maroro ma ngaiia, e kakawaki bwa ko na kakauongo raoi irouia ao ni karinei aia iango. N te aro anne, ko na ota riki n aroia ao a na bae ni kan ongora riki iroum.

8. E aera bwa e kainnanoaki te botumwaaka n okiokiriia aomata?

⁸ Imwain ae e motikia te aomata bwa e na reirei n te Baibara, ko riai n anga am tai ao korakoram ibukin okiokirana. Bukin tera? Ibukina bwa a kona n akea ngaiia ngkana ti a manga okiriia. Irarikin anne, tao ko riai n okioki tabeua te tai, imwain ae e a tauraoi ni butimwaea te reirei n te Baibara. Uringnga are e na rikirake te aroka ngkana e katoatai n tebokaki. N aron anne, e na bae n rikirake tangiran Iehova ao Kristo iroun te aomata ae kan ongora ngkana ti katoatai ni maroroakina Ana taeka te Atua ma ngaia.

A KONA KRISTIAN NI KABANE N UATABOA KAREKEAIA TAAN RIMWINI KRISTO?

9-10. E aera ngkai ti kona n taekinna bwa a bane taan uarongorongo n uataboa kakaaeaia aomata aika raoiroi nanoia?

⁹ A bane Kristian n uataboa kakaaeaia aomata aika raoiroi nanoia. Ti kona ni kabotaua te mwakuri aei ma kakaaean te teei ae bua. N te aro raa? Iangoa te bwai ae bon riki iroun te teei ae te mwaane ae tenua ana ririki are bua mani mwengana. A ibuobuoki ni kakaaea te teei aei aomata aika tao 500. N tokina, tao 20 te aoa imwini buana ao e a kuneaki iroun te tia ibuobuoki temanna n te tawaana teuana. E rawa te tia ibuobuoki aei ni kamoamoaaki ngkai e kunea te teei aei, ao e taku: “E kuneaki man aia kakaae aomata aika bubua ma bubua.”

¹⁰ A bati aomata aika ai aron te teei anne, aika namakinna naba bwa a bua. Akea aia kantaninga ao a kainnanoa te ibuobuoki. (IEbe. 2:12) E raka i aon wanua te mirion mwaitira ngaira aika ti kataia ni kakaaeia aomata aika raoiroi nanoia. Tao e aki reke iroum te aomata ae kan reirei n te Baibara. Ma raom n uarongorongo ake tabeman tao a kunea te aomata ae kan reiakina te koaua man Ana Taeka te Atua. Ngkana iai te tari ae kunea te aomata ae e a riki imwina bwa te tia rimwini Kristo, a bane naba ni kimwareirei naake a uataboa te mwakuri ni kakaae.

11. E ngae ngkana akea ae ko reirei ma ngaia n te Baibara, ma baikara riki aanga ake ko kona n uataboa iai karekeaia taan rimwini Kristo?

¹¹ E ngae ngkana akea ae ko reirei ma ngaia n te Baibara, ma ko kona n ibuobuoki ni karekeia taan rimwini Kristo n aanga tabeua. N te katoto, ko kona ni butimwaeiia aika boou ake a roko n te Tabo n Taromauri ao n ikikina ma ngaiia. N te aro anne, ko a buokiia iai bwa a na kakoauaa ae boni Kristian ni koaua ngaira bwa ti itangitangiri. (Ioa. 13:​34, 35) E ngae ngke e kimototo am kaeka are ko anganga n tain te taromauri ma e kona ni buokiia aika boou bwa a na atai aroia ni kaota aia onimaki ma te karinerine. Ko kona naba n toa ma te tia uarongorongo ae boou n te mwakuri ni minita ao ni buokia ni kamanenai kiibu n reireinia iai aomata. Ngkana ko karaoa anne, ko a buokia iai bwa e na kakairi irouni Kristo.​—Ruka 10:​25-28.

12. Ti kainnanoa te konabwai ae raka ibukini karekeaia taan rimwini Kristo? Kabwarabwaraa.

¹² Akea i buakora ae e riai n iangoia bwa e kainnanoa te konabwai ae raka bwa e aonga ni kona ni karekeia taan rimwin Iesu. Bukin tera? Iangoa ana katoto Faustina ae maeka i Bolivia. E babanga ni wareware neiei ngke e moani kaitiboo ma Ana Tia Kakoaua Iehova. Ni moa man te tai anne, e a rabakau ni wareware teutana. E a tia ngkai ni bwabetitoaki ao e kan rereireinia aomata. E kairi reirei n te Baibara ma aomata aika niman ni katoa wiki. E ngae ngke e aki rangi n rabakau ni wareware Faustina ni kabotauaki ma naake e reirei ma ngaiia, ma e a tia ni buokiia aomata aika onoman bwa a na bwabetitoaki.​—Ruka 10:21.

13. E ngae ngkana ti tatabetabe, ma baikara kakabwaia tabeua aika ti kona ni karekei man te mwakuri ae karekeaia taan rimwini Kristo?

¹³ A bati Kristian aika tatabetabe ibukin tabeia aika kakawaki. Ma e bon reke naba aia tai ni kairi reirei man te Baibara ao a karekea kukureia ae bati mai iai. Nora ana katoto Melanie. Bon akea buun neiei ao e kaikawaa natina te aine ae wanua ana ririki i Alaska. E mwakuri ni kareketianti ni kabwanina ana tai ao e buoka naba tararuaan tamana ae kaentia. Bon tii Melanie te tia Kakoaua n ana kaawa ae tionako. E aki toki n tataroakina kakorakoraana bwa e na uarongorongo e ngae ngke e mwaitorotoro, bwa e rangi ni kani karekea te aomata ae e na reirei n te Baibara ma ngaia. N tokina, e a kaitiboo ma Sara are rangi ni kukurei ngke e a ataia bwa iai aran te Atua. Imwin tabeua te tai, e a butimwaea te reirei n te Baibara Sara. E taku Melanie: “I rangi ni kukua n tairikin te Kanimabong, ma I teimatoa n nanako ma natiu n reirei ma Sara ao ti kakabwaiaaki iai. Ti rangi n unga ni kakaaei kaekaan ana titiraki Sara, ao ti kukurei n noria ngkai e a riki bwa raoraon Iehova.” E nanomwaaka Sara i aan te kakaaitara, e kitana ana Aro, ao e a bwabetitoaki.

E AERA BWA E KAINNANOAKI TE TAOTAONAKINNANO NI KAREKEAIA TAAN RIMWINI KRISTO?

14. (a) E kangaa ni kabotauaki karekeaia taan rimwini Kristo ma te akawa? (b) Tera reireiam n ana taeka Bauro are 2 Timoteo 4:​1, 2?

¹⁴ E ngae ngke e taraa n aki uaana am mwakuri ni minita, ma tai kabwaraa nanom. Uringnga are e kabotaua Iesu te mwakuri aei ma te akawa. A kona taan akawa ni kabanei aoa aika bati ao e a tibwa teke konaia. N angiin te tai a akawa n te nukanibong ke n te karangaina, ao n tabetai a riai ni kaei taabo aika raroa. (Ruka 5:5) N aron anne, tabeman taan uarongorongo a kabanei aoa aika bati ma te taotaonakinnano n uarongorongo n taai ao n taabo aika kakaokoro. Bukin tera? Bwa a aonga ni kaitiboo ma aomata aika bati riki. N angiin te tai, e kakabwaiaaki aia kakorakora ae aron anne bwa a kaitiboo ma aomata aika kan ongora n ara rongorongo. Ko kona ni kataia n uarongorongo n te tai ae ko na kaitiboo riki iai ma aomata, ke n te tabo ae ko na kuneia riki iai aomata?​—Wareka 2 Timoteo 4:​1, 2.

15. E aera ngkai e kainnanoaki te taotaonakinnano ni kairan te reirei n te Baibara?

¹⁵ E aera ngkai e kainnanoa te taotaonakinnano kairan te reirei n te Baibara? Teuana bukina bwa e bati riki ae ti riai ni karaoia irarikini buokan te aomata bwa e na atai koaua man te Baibara ao n tangiri. Ti riai ni buoka te aomata are ti reirei ma ngaia bwa e na kinaa ao n tangira te tia Korea te Baibara ae Iehova. Irarikin are ti na buokia n ataia bwa tera ae e tangiria Iesu mairouia taan rimwina, ti riai naba ni buokia bwa e na ataia bwa e na kangaa ni maiuakini. Ti riai n taotaona nanora ni buokia ngkana e a kekeiaki ni maiuakini booto n reirei man te Baibara. A kona tabeman ni bitii aia iango ao aroaroia i nanon tii tabeua te namwakaina. Ake tabeman a kainnanoa te tai ae maan riki.

16. Tera reireiam n ana katoto Raúl?

¹⁶ E nora uaan ana mwakuri te mitinare temanna i Peru ae kaota kakawakin te taotaonakinnano. E taku: “I a tia n reirei ma Raúl ni booki ake uoua. Ma e teimatoa ni kaaitarai kangaanga ni maiuna. E bati ana kangaanga n ana mare, e kamanenai taeka aika buakaka, ao a aki karinea natina ibukin arona ae buakaka. E katoatai ni kaei bobotaki, ngaia are I teimatoa ni kawaria ni buokia ma ana utu. Tenua tabun te ririki imwini moani kaitiboou ma ngaia, ao e a katauaki nakon te bwabetito.”

17. Tera ae ti na maroroakinna n te kaongora are imwina?

¹⁷ E tuangira Iesu bwa ti na ‘nako n reireinia aomata bwa a na riki bwa taan rimwina.’ Ibukini kakororaoani mwiokoara aei, ti mamaroro ma aomata aika rangi ni kaokoro aia iango ma ngaira, n ikotaki ma naake akea aia Aro ke a taku bwa a aki kakoauaa te Atua. E na maroroakinaki n te kaongora are imwina arora ae ti kona iai n taekina te rongorongo ae raoiroi nakoia aeka n aomata aikai.