Karekea Kimwareireim N Te Mwakuri Ae Kairaia Aomata Bwa A Na Riki Bwa Taan Rimwini Kristo
“Ma ngaia ae kam na nako ni kakiritiania botanaomata ni kabaneia.”—MATAIO 28:19.
1-3. (a) Tera ae a namakinna taan uarongorongo aika mwaiti ni kaineti ma kairan reirei n te Baibara? (b) Baikara titiraki aika ti nang rinanoi?
E KOREA ae kangai temanna te tari te aine are e mwamwakuri n uarongorongo ma te kurubu n te taetae n Hindi i aon te United States: “I a tia n reirei ma te utu teuana ae kaaini Pakistan i nanon 11 te wiki n nako.” E a manga reitia riki n taku: “Ao ni koauana ti a bon rangi ni kinaira raoi naba. A aki toki ni waanako rannimatau n iaiangoan ae ai tii teutana riki te tai mangkai ao a nang okirikaki te utu aei nako Pakistan. Ma ni koauana a aki bwaro rannimatau tii ibukin ae a nang akea mai i rarikiu, ma ibukin naba te kimwareirei are I a tia n namakinna rinanon reiakinaia taekan Iehova.”
2 Ko a tia naba ngkoe n namakina te kimwareirei n ai aron are e karekea te tari te aine aei, n reiakinan te Baibara ma temanna? A karekea naba te kimwareirei ae takaburinako Iesu ao taan rimwina ake n te moan tienture man te mwakuri ni kairiia aomata bwa a na riki bwa taan rimwini Kristo. N okirikaakia ngkoa taan rimwin Iesu ake 70 ake a tia ni kataneiaaki raoi irouna ma mwin aia mwakuri ae kakimwareirei, ao e taekinaki bwa e “kimareirei Iesu iroun te Tamnei are Raoiroi.” (Ruka 10:17-21) N aron naba anne a bati ake a karekea kimwareireia n te mwakuri ae kairaia aomata bwa a na riki bwa taan rimwini Kristo. Maroaka ae n 2007 ao a a tia taan uarongorongo aika mwakuri korakora ao mani kukukurei, ni kairii reirei n te Baibara aika onoua ao te iterana te mirion mwaitiia ni katoa namwakaina!
3 Ma bon iai naba taan uarongorongo tabeman aika a tuai ni moana kairan te reirei n te Baibara. Tabeman riki a bon tuai mani kaira te reirei teuana i nanon ririki aika tibwa nako. Baikara kangaanga aika ti kona ni kaaitara ma ngaai ngkai ti tabe ni kekeiaki ni kaira te reirei n te Baibara? Ti na kanga ni kona n tokanikai i aoni kangaanga aikai? Ao baikara kakabwaia aika ti kona ni karekei n ongeabara nakon ana tua Iesu are e kangai: “Ma ngaia ae kam na nako ni kakiritiania botanaomata ni kabaneia”?—Mataio 28:19.
Kangaanga Aika Kona n Iraea Kimwareireira
4, 5. (a) Tera aroia aomata aika bati n taabo tabeua aika kakaokoro n te aonnaba aei ni butimwaea te reirei? (b) Baikara kangaanga ake a kaaitara ma ngaai taan uarongorongo tabeman n aaba tabeua?
4 N taabo tabeua aika kakaokoro n te aonnaba, ao iai aika a rangi n ingainga ni butimwaei ara boki ao ni kan reirei n te Baibara ma ngaira. A taku te taanga teuana mai Aotiteria ake a mwakuri i Zambia i nanon teutana te tai: “Ngaia a boni koaua karaki. Zambia bon te tabo n uarongorongo ae tikauarerei kaanga ai aron te oo n aroka ae kakariki uaa kain aona. Ao te uarongorongo i tutani kawai, e a bon rangi ni kamimi aroni karaoana! A roko aomata iroura ao ni bubutii tabeua ara maekatin ake a bon tangiri.” N ririki aika nako ao a a tia taari mwaane ao aine i aon Zambia ni waakina kairan reirei n te Baibara ma aomata aika raka i aon 200,000 mwaitiia, are nanona bwa e raka i aon temanna ana reirei temanna te tia uarongorongo.
5 Ma n aaba tabeua ao iai taan uarongorongo ake a noria bwa e kangaanga irouia tibwaakin nako booki ao kairakin reirei n te Baibara ni katoa tai. Bukin tera? Ibukina bwa n angiin te tai ao a aki rangi ni memena n aia auti aomata ake a kawaraki irouia taan uarongorongo, ke tao ngkana iai ma a manga aki kani bwerengaki n taekan te Aro. Tao a a tia ni kaikawairakeaki koraki aikai bwa beekan ke tao a koro n ribai waaki ni mwamwanaa te aba ake a kaotaraeaki n Aaro aika kewe. A bati aomata ake a rotaki n te maraki ibukin aia onimaki, n te aro are a rawawata ao ni maenako n ai aroia tiibu ake a aki tararuaki raoi irouia taani kawakin tiibu aika kewe. (Mataio 9:36) Are e teretere raoi ngkanne man aei bwa aeka n aomata aikai, a a bae n aki kani kareketaatia ni maroroakinan te Baibara.
6. Baikara baika a kona n tiatiana aia konabwai tabeman?
6 Tabeman taan uarongorongo aika kakaonimaki a kaaitara ma te kangaanga teuana are e a kona n iraea kimwareireia. E ngae ngke tao a rangi ni mwakuri korakora ngkoa ni kairiia aomata bwa a na riki bwa taan rimwini Kristo ma ngkai a tinewaangaki n te aoraki ke tao kangaangan te kara. Iangoi bwaai tabeua aika a kona n tiatiana ara konabwai ake ti boni kariki i bon iroura. N aron teuana, ko a tia namakinna ae ko a aki tau ni kaira te reirei n te Baibara? E boni bae naba n iai iroum aekan ana namakin Mote ngkoa ngke e mwiokoaki iroun Iehova bwa e na taetae nakoni Barao. E taku Mote: “I a boni bubutiko, te Uea, bon arou mangkoa ba I babanga n taetae i mataia aomata, ao ngkai ko tataetae nakoiu ao I tuai n rabakau naba.” (Te Otinako 4:10, BK) E kuri n titeboo namakinan te aki tau ni karaoa te bwai teuana ma maakakin ae ko na kabwaka ni karaoia. Ti kona n raraoma ao n taku bwa e a aki kona n riki bwa te tia rimwini Kristo te aomata are ti reirei ma ngaia n te Baibara kioina ngkai taan reirei ngaira aika ti aki kororaoi. Ibukin anne ti a rawa ni kaira te reirei n te Baibara bwa ti aonga ni kona n aki namakina te raraoma anne. Ti na kanga ni kaaitarai aeka ni kangaanga aika a a tibwa taekinaki aikai?
Katauraoa Nanom
7. Tera are e kaira nanon Iesu n ana mwakuri ni minita?
7 Te moani mwaneka boni katauraoan nanora. E taku Iesu: “E taetae te wi man onraken te nano.” (Ruka 6:45) E a kairaki Iesu n tabeakinaia aomata are e nako raoi mai nanona n ana mwakuri ni minita. N te katoto, ngke e noriia I-Iutaia Iesu bwa e a moanna ni mamaara aia onimaki ao “E nanoangaiia.” E taku nakoia ana reirei: “E boni karuonako te tai . . . Ma ngaia ae kam na butia Uean te tai ba E na kanakoia taani makuri nakon ana tai.”—Mataio 9:36-38.
8. (a) Tera ae ti riai n iaiangoia raoi? (b) Tera ae ti kona n reiakinna man ana taeka temanna te aine are e reirei n te Baibara?
8 Ngkai ti uataboa te mwakuri ae kairaia aomata bwa a na riki bwa taan rimwini Kristo, ti riai ni kananoi raoi ara iango ni kakabwaia ake ti karekei n noran temanna ae kukurei ni kabanea ana tai ni kaira te reirei n te Baibara ma ngaira. Iangoia naba aomata ake ti na kaitiboo ma ngaiia n te mwakuri ni minita ao kabwaiaia ake a kona ni karekei n ongoraeia n te rongorongo ae ti tataekinna. E taekina ae kangai temanna te aine are e kororeta nakon te aobiti n tararua n ana tabo: “I rangi ni kani kaota au kakaitau ae bati nakoia taani Kakoaua ake a rereirei ma ngai ni mwengau. I ataia ae n taai tabetai a nang bon riai n ebu irou n au titiraki aika rangi ni mwaiti, ao a aki toki ni maan riki tikuia nakon are a a tia ni baireia. Ma a taotaona nanoia nakoiu ao n ingainga n reireiai baike a a tia n reiakin. I kaitaua Iehova ao Iesu ni kaitiboou ma aomata aikai i nanoni maiu.”
9. Tera are e a kaatuua iai ana iango Iesu, ao ti na kanga ni kona ni kakairi irouna?
9 Ni bon arona, a na aki bane aomata n riki bwa taan irira Iesu. (Mataio 23:37) E ngae ngke iai tabeman aika a iriria i nanon teutana te tai ma a manga rawa nakon ana reirei ao rimwi “a aikoa manga airiri ma Ngaia.” (Ioane 6:66) Ma e aki kariaia Iesu bwa e na kamangoraki kakawakin ana rongorongo n aroia aomata tabeman n aki kani bwerengaki n ana rongorongo. E ngae ngke angiina mai buakoni koraa ake e uniki Iesu a aki kariki uaa, ma e kaatuua riki ana iango i aoni baike e karaoi aika raoiroi. E nori tawaana bwa a mainaina n tawaa nakon te taiaki ao e namakina naba te kimwareirei ae korakora ni buokan te mwakuri n tai anne. (Wareka Ioane 4:35, 36.) Ti kona ni kaatuui ara iango i aoni kakawakini manenan te mwakuri n tai n ara aono ake a katauaki nakoira, n oneani mwin ae ti na taratarai taano tabeua ake aki kariki uaa? Ti na neneria ngkai bwa ti na kanga ni kona ni karikirakea kantaningaan ae raoiroi.
Ununiki ma Kantaningaan Taiakin Uaana
10, 11. Tera ae ko kona ni karaoia bwa e aonga n teimatoa kimwareireim?
10 E uniki koraa te tia ununiki ma kantaningaan ae e na taia uaana. N aron anne, ti riai n uarongorongo naba ngaira ma kantaningaani kairan reirei n te Baibara. Tera arom ngkana ko kabanea te tai ae bati n taai nako n te mwakuri ni minita, ma ai tii tabeman aomata ni mwengaia ke tao e a taraa ni kangaanga manga okiraia? E kona ni kabwaranano aei. Ma e koaua bwa ko a riai ngkanne ni katoka am mwakuri ni minita? Ni koauana ko bon aki riai! Bwa a mwaiti aomata ake a a tia ni buokaki rinanon te anga n uarongorongo aei are e a kamanenaaki i nanon te tai ae maan.
11 Ni kateimatoaan kimwareireim, ko kona ni karababaa riki am anga n uarongorongo ae tao a kona naba n irekereke iai aanga riki tabeua ibukini ukoukoraia aomata? Tao n te katoto, ko a tia ni kataia n uarongorongo nakoia aomata i tutani kawai ke tao n aia taabo ni mwakuri? Ko a tia ni kataia n reitaki ma aomata rinanon te tarebon ke tao n taui aia nambwa te koraki ake ko a tia n taekina rongorongon te Tautaeka n Uea nakoia bwa ko aonga ni kona n okiokiriia? Ngkana ko botumwaaka ao n rabakau ni kangaraoa arom n am mwakuri ni minita, ko na boni karekea te kimwareirei n ukoukoraia ake a butimwaea rongorongon te Tautaeka n Uea.
Kekeiaki n Tokanikai i Aon te Aki Kani Bwerengaki
12. Tera ae ti kona ni karaoia ngkana iai aika aki kani bwerengaki n ara aono?
12 Ma tera arom ngkana a aki kani bwerengaki n taekan te Aro aomata aika bati ake n am tabo? Ko kona ni kangaraoa am moan tabeka n te aro ae e na rangi n taraa ni kakaongora irouia? E korea ae kangai te abotoro Bauro nakoia raao n te onimaki ake i Korinto: “I riki n ai aron te I-Iutaia nakoia I-Iutaia . . . I riki n ai aron ae akea te tua I rou nakoia akana akea te tua i rouia.” Tera ae kaira nanoni Bauro? “I riki ni bwaai ni bane nakoia aomata ni kabaneia, ba N na boni kamaiuia tabemang.” (1 I-Korinto 9:20-22) Ti kona ni karekei maroro aika a na kakanrongora nakoia kaain ara aono? A mwaiti aomata aika beekan aika a tangiria ni katamaroaa riki aia reitaki n aia utu. A bae naba n ukera te kantaninga ae raoiroi ni maiuia. Ti kona n uota nakoia te koraki aikai rongorongon te Tautaeka n Uea n te aro ae e na rangi ni kakan ongo riki nakoia?
13, 14. Ti na kanga ni kona ni karikirakea te kimwareirei ae ti karekea n te mwakuri ae kairaia aomata bwa a na riki bwa taan rimwini Kristo?
13 E rikirake mwaitiia taan uarongorongo ake a a tia ni karekea te kimwareirei man te mwakuri ae kairaia aomata bwa a na riki bwa taan rimwini Kristo, n taabo naba ake a angi iai aomata aika aki kani bwerengaki. E kanga n riki anne? Man reiakinan te taetae ae boou. Iai te taanga teuana ae ai 60 tabun aia ririki ake a a tia n noria bwa n aia tabo are a nanakonako iai ao nga ma nga mwaitiia ataein te reirei ake a maeka iai ma aia utu aika I-Tiaina. E taku teuare te buu te mwaane: “Aei bukina are ti a kaungaaki iai bwa ti na reiakina te taetae n Tiaina.” E a manga reitia riki n taku: “E ngae ngke e rangi ni kana te tai ae bati ni katoa bong reiakinan te taetae aei, ma e taia uaana ae ti a kairi reirei n te Baibara aika bati ma I-Tiaina ake n ara tabo.”
14 E ngae ngkana ko aki kona n reiakina te taetae teuana ae boou, ko kona ni kabongana te boki teuana ae uarereke ae te Good News for People of All Nations n am tai ni kaitiboo ma aomata aika kaokoro aia taetae ma ngkoe. Ko kona naba n ootani booki n oin aia taetae te koraki ake ko boo ma ngaiia. Ni koauana e boni kainnanoaki te tai ao te kakorakora ae bati n te maroro ma aomata aika e kaokoro aia taetae ao aia katei ma ngkoe. Ma bon tai mwamwaninga naba te boto n reirei are n Ana Taeka te Atua are e kangai: “Ane kamae n ununiki ni kabatia, ao e na tai ni kabatia.”—2 I-Korinto 9:6.
E Irekereke Naba Iai te Ekaretia ae Bwanin
15, 16. (a) Bukin tera bwa te mwakuri ae kairaia aomata bwa a na riki bwa taan rimwini Kristo e bon irekereke naba iai ana ibuobuoki te ekaretia? (b) Tera aia mwakuri kaara ake a karaoia?
15 Mangaia are te mwakuri ae kairaia aomata bwa a na riki bwa taan rimwini Kristo e bon aki tii boto i aon ana kakorakora temanna. Ma e bon irekereke naba iai ana ibuobuoki te ekaretia ae bwanin. Bukin tera? E taku Iesu: “Ane a na ataingkami aomata ni kabaneia ba au reirei ngkami n aei, ngkana kam i tangitangiri.” (Ioane 13:35) Ao e bon eti bwa a aki toki n anaaki nanoia ake a reirei n te Baibara n te i tangitangiri are a noria n rokoia ni bobotaki. E korea ae kangai temanna te aine ae reirei n te Baibara: “I rangi ni kukukurei ni kaakaei bobotaki. Bwa a rangi n akoi kaaina!” E taekinna Iesu bwa a na boni kakaitaraaki akana riki bwa taan rimwina irouia oin aia utu. (Wareka Mataio 10:35-37.) Ma e beritanna Iesu bwa a na boni karekeia ‘tariia, mwaaneia, tinaia ao natiia’ aika bati n te ekaretia.—Mareko 10:30.
16 A karaoa naba te mwakuri ae kakawaki tarira ao mwanera n te onimaki aika a kara, ni buokaia aika reirei n te Baibara bwa a na rikirake. N te aro raa? Bwa e ngae ngke a aki kona ni kaira te reirei n te Baibara i bon irouia tabemani kaara, ma aia taeka n ibuobuoki ake a taekin ni bobotaki n te ekaretia, a kateimatoaaki iai aia onimaki ake a ongoraeakin. A riki taekaia kaara ake a nakonako ni “kawain te raoiroi” bwa karakaan riki katamaroaan te ekaretia ao ni katiki nanoia aomata aika raoiroi nakon ana botaki te Atua.—Taeka N Rabakau 16:31.
Tokanikai i Aoni Maakura
17. Tera ae ti kona ni karaoia bwa ti aonga ni kona n tokanikai i aon namakinan ae ti a aki tau ni karaoa te bwai teuana?
17 Tera arom ngkana ko kabokorakora ma namakinan ae ko aki tau ni karaoa te bwai teuana? Uringnga bwa Iehova e buoka Mote rinanon te taamnei ae raoiroi are e anganna ao toana are bon tarina ae Aaron. (Te Otinako 4:10-17) E berita Iesu bwa e na bon ibuobuoki taamnein te Atua n ara tai ni mwakuri n uarongorongo. (Mwakuri 1:8) Irarikin anne, e kanakoia taan tai Iesu ni kakauomania bwa a na uarongorongo. (Ruka 10:1) Ngaia are ngkana ko namakinna bwa iai am kangaanga ni kaineti ma kairan te reirei n te Baibara, tataro ao bubutiia te Atua taamneina bwa e na anganiko te wanawana ao katoako ma te tia uarongorongo temanna ae kona ni karikirakea onimakinam i bon iroum ao e na kona naba n ibuobuoki nakoim baike e a tia n rinanoi. E rangi ni kakorakoraa te onimaki ururingan ae Iehova e a tia n rineia aomata aika mangori ae “bwain aon te aba aika mamara” bwa a na kakororaoa te mwioko ae rianako aei.—1 I-Korinto 1:26-29.
18. Ti na kanga ni kona n tokanikai i aoni maakakin ae ti na kabwaka ni buoka te aomata ae reirei n te Baibara?
18 Ti na kanga ni kona n tokanikai i aon namakinan ae ti na kabwaka ni buoka ae reirei n te Baibara? Ti riai n ururingnga raoi are te mwakuri ae kairan temanna bwa e na riki bwa te tia rimwini Kristo bon tiaki aroni karaoan te amwarake are e boto kangkangina ma maaina i aon ana mwakuri tii temanna te aomata ae te tia kuka. Bwa te mwakuri ae kairan temanna bwa e na riki bwa te tia rimwini Kristo e aki tii boto i aon ana kakorakora temanna ma e boto naba i aon aia kakorakora tabeman riki. E karaoa te mwakuri ae moan te kakawaki Iehova ae burimaunian temanna nakoina. (Ioane 6:44) Ti a kabanea ara kona ngaira ao tabeman riki n te ekaretia ni kabongana te rabakau n angareirei ni buokan rikirakeia taan reirei n te Baibara. (Wareka 2 Timoteo 2:15.) Ao e riai te aomata are e reirei n te Baibara ni maiuakina te baere e reiakinna. (Mataio 7:24-27) Ti kona n rawawata n noran temanna bwa e a manga katoka ana reirei n te Baibara. Ti bon riai ni “bane n angan te Atua taekan arora” n tatabemanira nako, ngaia are ti kantaningaa temanna are e reirei n te Baibara bwa e na karaoa te motinnano ae eti.—I-Rom 14:12.
Baikara Kakabwaia?
19-21. (a) Baikara kakabwaia aika ti karekei mani kairan reirei n te Baibara? (b) Tera ana iango Iehova ibukia te koraki ake a uataboa te mwakuri n uarongorongo?
19 E kona ni buokira kairan reirei n te Baibara n teimatoa n ukoukora moa te Tautaeka n Uea. E kona n nano riki ara iango ma nanora n taiani koaua ake n Ana Taeka te Atua. Bukin tera? E kabwarabwaraa ae kangai temanna te bwaiania ae Barak: “Kairan reirei n te Baibara e a kaumakiko bwa ko na riki bwa te tia reiakina ngkoe Ana Taeka te Atua ae raoiroi riki. I a tia ni kunea bwa I riai moa ni kakorakoraa au koaua i bon irou imwain ae N na tau n reiakina temanna.”
20 Ngkana akea te reirei n te Baibara ae ko kairia, e koaua bwa e nanonaki n anne bwa akea uaan am mwakuri i matan te Atua? Bon tiaki ngaia anne! E rangi ni mutiakin raoi ara kakorakora Iehova ake ti karaoi ibukin neboana. Bon “raao ni mwakuri . . . i bukin te Atua” aomata nako ake a uataboa te mwakuri n uarongorongo. Ma kairan te reirei n te Baibara e kona ni kauataoa riki te kimwareirei ae ti karekea n noran te Atua ni karikirakei koraa ake ti uniki. (1 I-Korinto 3:6, 9) E taku temanna te bwaiania ae Amy: “Ngkana ko noria bwa e tabe n rikirake temanna ae reirei n te Baibara, ao ai aron ae e a kororake i nanom te kani kakaitau nakon Iehova, kioina ngke e a tia ni kariaia bwa ko na angan te aomata anne te bwaintangira ae moanibaan te tamaroa ae ataakin Iehova ao karekean te maiu are e aki toki.”
21 Karaoan ara kabanea ni kona ni moanakin ao kairan reirei n te Baibara e na kona ni buokira bwa ti na kaatuua riki iangoan ara beku iroun te Atua ao e na kamatoaa ara kantaninga ibukin te maiu i aan ana waaki te Atua ae boou n te aonnaba. Tao ti na kona naba ni buokiia ni kamaiuia aomata ake a ongora iroura man ana ibuobuoki Iehova. (Wareka 1 Timoteo 4:16.) Ai boni kakimwareireira te aro aei!
Ko Uringnga?
• Baikara kangaanga ake a kona n totokoia tabeman mani kairakin reirei n te Baibara?
• Tera ae ti kona ni karaoia ngkana a mwaiti aomata n ara aono aika aki kani bwerengaki?
• Baikara kakabwaia aika ti karekei mani kairakin te reirei n te Baibara?