‘Te Tia Tibwatibwaa Ana Akoi Te Atua’ Ngkoe?
“Kam na i tangitangiri n aia i tangitangiri taari; kam na biri rimoa n i karinerine.”—I-ROM. 12:10.
1. Baikara taeka ni karaunano aika ti nori n Ana Taeka te Atua?
E OKIOKI Ana Taeka te Atua ni karaui nanora bwa ti na boni buokaki iroun Iehova ngkana ti rotaki n te bwarannano ke te uruakinnano. N aron aei, nori taeka aika karaunano aikai: “E kabaneia akana bwaka ni kateimatoaia Iehova, ao E kabaneia akana bobaraki ni kateirakeia.” “E kamaiuia akana a uruaki nanoia, ao E kabae ikoakiia.” (Taian Areru 145:14; 147:3) Irarikin anne, e taekina naba ae kangai Tamara are i karawa: “Ba N na taua ataim, Ngai ae Iehova ae Atuam, ao N na kangai nako im, Tai maku; I a buokiko Ngai.”—Itaia 41:11.
2. E kanga Iehova ni katauraoa te ibuobuoki ibukia ana toro?
2 Ma e na kanga ngkanne Iehova ae mena i karawa ae te tabo ae e aki nonoraki n ‘taui ataira’? E na kanga ni ‘kateirakeira ngkana ti a bobaraaki’ ibukini korakain nanora? E katauraoa te ibuobuoki Iehova ae te Atua n aanga aika bati. N aron teuana, e angania ana aomata “te mwaka ae moan te korakora” rinanon taamneina ae raoiroi. (2 I-Korinto 4:7; Ioane 14:16, 17) A namakina naba kakorakoraaia ana toro te Atua man rongorongo ake a kunei n te Baibara ae Ana Taeka te Atua are e kaira koreana rinanon taamneina. (Ebera 4:12) Iai riki te anga ae e kona ni kakorakoraira iai Iehova? Ti na nora kaekaan aei n te boki ae te Moani Betero.
E a Kaotiotaki ‘Ana Akoi te Atua’ n Aanga Aika Kakaokoro
3. (a) Tera are e taekinna te abotoro Betero ni kaineti ma kataaki? (b) Tera ae maroroakinaki n raatokin ana moan reta Betero?
3 E koroboki te abotoro Betero nakoia raao n te onimaki aika kabiraki bwa a bon tau ni kimwareirei kioina ngkai e a mena imwaia te kaniwanga ae rangi ni kakawaki. Ao e a manga reitia riki ni kangai: “E boni ngae n riai ba kam na rawawata naba tabe bong ngkai ni bwai ni kataami aika a bati aroia.” (1 Betero 1:1-6) Nora te taeka ae “bati aroia” bwa e kateretereaki iai ae a na boni kakaokoro kataaki. E a aki tii kaota te kangaanga anne Betero ao ni katikuia naba tarina bwa a nangi bon iangoi aroia ni kekeiaki ribuakoni kataaki aika bati. Ma e katerea naba ae a riai Kristian n onimakina Iehova bwa e na boni buokiia rinanoni kataakia ake a aitara ma ngaai, n aki ongeia bwa aeka ni kataaki raa. E taekinaki te karaunano anne n raatokin ana reta Betero, ike e a maroroakinna iai te abotoro aei baike a irekereke ma “tokini bwaai ni bane.”—1 Betero 4:7.
4. E aera bwa a karaui nanora taeka ake n 1 Betero 4:10?
4 E taku Betero: ‘Bwaai n tituaraoi aika kam anganaki, kam na buobuokiia raomi iai, ngkai taan tibwatibwaa ngkami ana akoi te Atua [ae bati arona].’ (1 Betero 4:10) E a manga kamanena naba ikai Betero te kibuntaeka ae “bati arona.” Ae ai aron ae kangai raoi, ‘A roko kataaki n aanga aika kakaokoro, ao ana akoi ae rianako te Atua e kaotiotaki naba n aaro aika kakaokoro.’ E aera bwa e karaunano te kibuntaeka aei? E kaotaki iai bwa n aki ongeia bwa te aeka ni kataaki raa ae ti boo ma ngaia ma e na bon iai naba ana akoi te Atua ae e na kona ni buokira ni kekeiaki ni kaitaraa. Ko noria ngkanne n ana kibuntaeka Betero anne bwa tera aron Iehova ni kaota ana akoi ae rianako nakoira? Bon rinanoia raao ni Kristian.
‘Buobuokiia Raomi’
5. (a) Tera ae a riai ni karaoia Kristian n tatabemania nako? (b) Baikara titiraki aika tabekaki?
5 Ngke e taetae Betero nakoia kaain te ekaretia ni Kristian ni kabane ao e mwanewea ae kangai: “Aio te bwai ae moan te riai ae te kabatiai ami i-tangitangiri.” Ao e a manga reitia riki n taku: ‘Bwaai n tituaraoi aika kam anganaki, manga buobuokiia iai raomi.’ (1 Betero 4:8, 10) Ai ngaia are a riai raao ni Kristian n tatabemania nako n ikakorakoraia i marenaia. Ti a tia ni mwiokoaki n ana bwai Iehova ae rangi ni kakawaki, ao bon tabera naba manga tibwatibwana nakoia aomata nako. Tera ngkanne ae ti a tia ni mwiokoaki iai? E taku Betero bwa te bwai anne bon ‘te bwai n tituaraoi.’ Tera te bwai n tituaraoi anne? Ao ti na kanga ni kamanena ni ‘buobuokiia iai raora’?
6. Baikara bwaai n tituaraoi tabeua ake a mwiokoaki iai Kristian?
6 E taekinaki ae kangai n Ana Taeka te Atua: “A bane angabwai aika raraoi ma bwaai n tituaraoi aika moan raraoi n ruo mai eta.” (Iakobo 1:17) Ni koauana, bwaai n tituaraoi aika e mwiokoia iai ana aomata Iehova, a a kaotaki iai ana akoi ae rianako. Te bwai n tituaraoi teuana ae rangi ni kakawaki are e anganira Iehova bon te taamnei ae raoiroi. Te bwai n tituaraoi aei are e a buokira ni karikirakea iroura aroaron te Atua aika te tangira, te raoiroi ao te nimamannei. Aeka n aroaro aikai ake a kairira bwa ti na kaotiota ara tangira ni koaua nakoia raao n te onimaki ao tatauraoira ni buokiia. I buakoni bwaai n tituaraoi aikai iai naba te wanawana ni koaua ao te atatai ake ti a karekei rinanon ana ibuobuoki te taamnei ae raoiroi. (1 I-Korinto 2:10-16; I-Karatia 5:22, 23) Ni koauana, ti riai n iangoia bwa ti na kamanenai korakorara, ara konabwai, ao rabakaura ibukini karaoiroan ao karinean Tamara are i karawa. Iai iroura te mwioko mairoun te Atua ae kamanenaan ara konabwai ao aroarora bwa te anga teuana ni kaotiota ana akoi ae rianako te Atua nakoia raora n te onimaki.
‘Buobuokiia Iai Raomi’—N te Aro Raa?
7. (a) Tera ae kamatataaki n te taeka ae ‘n aron ae kam kona’? (b) Baikara titiraki aika ti riai n titirakinira iai ao bukin tera?
7 E taekina ae kangai Betero ni kaineti ma bwaai n tituaraoi ake a reke iroura: ‘Bwaai n tituaraoi aika kam anganaki, kam na buobuokiia iai raomi n aron ae kam kona.’ Kamanenaan te taeka ae ‘n aron ae kam kona’ e kamatataaki iai bwa a aki tii kakaokoro tein aroaro ao konabwai ma e boni kaokoro naba abwakia. Ma e ngae n anne, e a kaungaaki temanna ma temanna bwa e na ‘kamanena te bwai aei [ae te bwai n tituaraoi are e a tia n anganaki] ni buobuokiia iai raona.’ Ma irarikin naba anne, te taeka ae ‘buobuokiia iai raomi . . . ngkai taan tibwatibwaa te akoi aika raoiroi,’ bon te tua. Ai ngaia are ti riai n titirakinira ni kangai: ‘Te koaua bwa I boni kamanena raoi te bwai n tituaraoi are I anganaki ni kakorakoraia iai raou n te onimaki?’ (Kabotaua ma 1 Timoteo 5:9, 10.) ‘Ke tao I kamanena au konabwai ae e anganai Iehova ibukin oini kabwaiau ae tao karekean te kaubwai ke te kani kakannato?’ (1 I-Korinto 4:7) Ngkana ti kamanenai raoi bwaai n tituaraoi ake iroura ni ‘buobuokiia iai raora’ ti na boni kakukureia ngkanne nanon Iehova.—Taeka N Rabakau 19:17; wareka Ebera 13:16.
8, 9. (a) Baikara aanga tabeua ake a karaoi Kristian ni katobibia te aonnaba ni buobuokiia iai raoia n te onimaki? (b) A kanga taari mwaane ao aine n am ekaretia n ibuobuoki i marenaia?
8 E mwaneweaki n Ana Taeka te Atua aanga aika kakaokoro ake a ibuobuoki iai i marenaia Kristian ake n te moan tienture. (Wareka I-Rom 15:25, 26; 2 Timoteo 1:16-18.) N aron naba anne, ao e a kakororaoaki nanon te tua anne irouia Kristian ni koaua ni boong aikai, n aroia ni kamanena te bwai n tituaraoi are reke irouia ibukini buobuokaia raoia n te onimaki ma nanoia ni koaua. Iangoi tabeua aanga ake e a kakoroaki iai nanon aei.
9 A mwaiti taari mwaane ake a kabanei aoa aika bati ni katoa namwakaina ibukini katauraoani mwiokoaia ni bobotaki n taromauri. A kairaki kaain te ekaretia ni kabane bwa a na bwaina te nanomwaaka man aia taeka aika kaotiota te wanawana taari mwaane aikai ake a a tia ni kunei imwin aia ukeuke n te Baibara ake a taekin n taiani bobotaki. (1 Timoteo 5:17) A kinaaki taari aine ao mwaane aika bati n aia mwakuri n akoi ao ni mwamwannano nakoia raoia n te onimaki. (I-Rom 12:15) Tabeman a aki toki ni kakawariia ake a karawawataaki ao n tataro ma ngaiia. (1 I-Tetaronike 5:14) Iai tabeman ake a a tia ni kamwawaa aia tai ibukini korean aia reta ni kaunganano nakoia raao ni Kristian ake a kaaitara ma kataaki. Ma iai naba tabeman ake a buokiia te koraki ake a tiatianaki korakoraia ni mamaaran rabwataia, bwa a aonga ni kona ni kaei bobotaki n te ekaretia. Nga ma nga taani Kakoaua ake a uataboa te mwakuri n ibuobuoki, ibukini manga kateani mwengaia raoia n te onimaki ake a rotaki ni kabuanibwai aika karina n riki. Te tangira n akoi ao aeka ni mwamwannano ake a kaotiotaki irouia taari mwaane ao aine aikai e a kateretereaki iai ‘te akoi ae bati arona ae ana akoi te Atua.’—Wareka 1 Betero 4:11.
E Nga ae Kakawaki Riki?
10. (a) Baikara baika uoua ake e tabeakini Bauro ni kaineti ma ana beku iroun te Atua? (b) Ti na kanga ngaira ni boong aikai ni kakairi irouni Bauro?
10 A aki tii mwiokoaki ana toro te Atua n te bwai n tituaraoi are a na buobuokiia iai raoia n te onimaki ma a mwiokoaki naba n te rongorongo ae riai n tibwatibwaaki nakoia aomata nako. E atai raoi baika uoua aikai te abotoro Bauro bwa bon iteran naba ana beku iroun Iehova. E kororeta nakon te ekaretia are i Ebeto ni kaineti ma ‘te mwioko n akoi mairoun te Atua’ are e anganaki ibukini kakabwaiaia kaain te ekaretia anne. (I-Ebeto 3:2) E taekina naba ae kangai: “Ti a tia ni kataki ma ni kakoauaki iroun te Atua ba ti riai ni mwiokoaki n te euangkerio.” (1 I-Tetaronike 2:4) N ai aroni Bauro, ti ataia raoi naba bwa ti mwiokoaki n te mwakuri teuana are ti a riki iai bwa taan tataekina Ana Tautaeka n Uea te Atua. Ti kataia ni kakairi n ana katoto Bauro are e kateia ngkai te tia tataekina te rongorongo ae raoiroi ngaia ae e aki kukua, n ingaingan nanora n uataboa te mwakuri n uarongorongo. (Mwakuri 20:20, 21; 1 I-Korinto 11:1) Ti ataia bwa e kona ni kamaiuia aomata tataekinan rongorongon te Tautaeka n Uea aei. Ma n te tai naba aei, ao ti kataia ni kakairi irouni Bauro n arora n ukeri nako kawai ake ti na anganako iai te “bwai n akoi teuana ae bwain te tamnei” nakoia raao n te onimaki.—Wareka I-Rom 1:11, 12; 10:13-15.
11. Tera arora ae riai ni kaineti ma iangoani mwiokoara ae te uarongorongo ao kakorakoraaia tarira?
11 E nga riki ae kakawaki mai buakoni mwakuri ni Kristian aika uoua aikai? Tabekan te titiraki ae aekan aei e kuri n tii te arona ma tabekan te titiraki ibukin te mannikiba ae kangai: E nga ae kakawaki riki mai buakoni bain te mannikiba aika uaai? E rangi n teretere kaekaan aei. E kainnanoi baina aika uaai te mannikiba bwa e aonga ni kona ni kiba raoi. N aron naba anne, ti kainnanoaki naba bwa ti na uataboi iteran ara beku iroun te Atua aika uoua aikai, bwa ti aonga ni kona ni kakororaoi baike a kainnanoaki mairoura ngkai Kristian ngaira. N oneani mwin ae ti na iangoa mwiokoara ae tataekinan te rongorongo ae raoiroi bwa akea irekerekena ma kakorakoraaia raora n te onimaki, ti riai n iangoia n aron are a iangoia naba abotoro ake Betero ao Bauro ae mwioko aikai a uaia n airiiri. N te aro raa?
12. Ti kanga n riki bwa tabonibain Iehova?
12 Ngkai taan tataekina te euangkerio ngaira, ti a kamanenai aanga n reirei ake ti a kona iai n ring nanoia aomata nako n te rongorongo ae kaunganano ae rongorongon Ana Tautaeka n Uea te Atua. N te aro anne, ti a kona iai ni kantaningaia bwa a na buokaki n riki bwa taan rimwini Kristo. Ma e ngae n anne, ti a kamanenai ara konabwai ao bwaai n tituaraoi riki tabeua ake ti kona ni karekei, ni kaungai iai nanoia raora n te onimaki, n ara taeka aika ringa te nano ao ara mwakuri n ibuobuoki bwa kaanga kaotan ana akoi te Atua ae rianako. (Taeka N Rabakau 3:27; 12:25) N te aro anne, ti a kantaningaia iai bwa ti na buokiia bwa a na teimatoa n riki bwa ana reirei Kristo. Ni mwakuri aika uoua aikai ae tataekinan te rongorongo i mataia aomata ao ‘buobuokaia tarira,’ ti a karekea iai te mwioko ae moan te rine ngkai ti a riki bwa kaanga tabonibain Iehova.—I-Karatia 6:10.
“Kam na i Tangitangiri”
13. Tera ae e na kona n riki ngkana ti katoka ‘buobuokaia raora’?
13 E kaumakiia raona n te onimaki Bauro ni kangai: “Kam na i tangitangiri n aia i tangitangiri taari; kam na biri rimoa n i karinerine.” (I-Rom 12:10) Ni koauana, e kairira bwa ti na beku ma nanora ni koaua bwa taan tibwatibwaa ana akoi ae rianako te Atua tangiraia tarira. Ti ataia naba bwa e na bon uruana katiteuanakira Tatan ngkana arona bwa e tokanikai n totokoira mani ‘buobuokaia raora.’ (I-Korote 3:14) Bwa ngkana e kerikaaki te boonnano iroura e na kona ni kairira nakon kerikaakin ingaingan nanora n te mwakuri n uarongorongo. E bon ataia raoi Tatan bwa e riai ni katoka teuana mai buakon ara mwakuri aika uoua aikai, kaanga ai aroni kaikoakan teaina bain te mannikiba, n te aro ae ti na aki kona ni kakororaoa raoi ara beku iroun Iehova.
14. Antai aika a na kakabwaiaaki man ara uaia n ‘ibuobuoki i marenara’? Anga te katoto.
14 Man te uaia n ‘ibuobuoki i marenara’ a kona ni kakabwaiaaki iai ake a karekea ana akoi te Atua ao taan tibwatibwaa naba te akoi anne. (Taeka N Rabakau 11:25) Nora te katoto teuana, ae taekaia taanga aika Ryan ao Roni, ake a maeka i Illinois, U.S.A. Ngke a ongo taekan ana urubwai te angibuaka teuana ae te Hurricane Katrina are a rotaki buaka iai bubua ma bubua mwengaia taani Kakoaua, ao a kairaki n tangiraia tariia bwa a na kitan aia mwakuri ma mwengaia ao ni karekea aia kaa tewaana ae uarereke are a na kona naba ni matu iai, ao ni mwananga nako Louisiana n te raroa ae 1,400 te kiromita. A tiku ni maeka ikanne i nanon teuana tabun te ririki, n anga aia tai, korakoraia, ao kaubwaia ibukini buokaia tariia. E taku Ryan ae 29 ana ririki: “Uataboan te mwakuri n ibuobuoki e a buokai riki bwa N na kaan ma te Atua. I nora iai aron Iehova n tararuaia ana aomata.” E a manga reitia nako riki Ryan ni kangai: “Te uaia ni mwakuri ma taari aika ikawai riki, e a tia ni buokai bwa N na rabakau riki n tararuaia taari nako. Ao e a tia naba ni buokai n ataia bwa ngaia e bati riki ae kainnanoaki bwa ti na karaoia ngaira aika ti tabe n rikirake i nanon ana botaki Iehova.” E kakoauaa naba aei Roni ae ai 25 ana ririki ngke e kangai: “I rangi ni kakaitau ngkai I a tia ni kona ni uataboa te mwakuri ae buokaia aomata. I a namakina riki te kukurei i nanoni maiu. Ao I ataia bwa e na boni bati riki kakabwaiau nakon taai aika imwaiu man au mwakuri aika I a tia ni karaoi.”
15. Baikara bukina aika ti riai iai n teimatoa ni beku bwa taan tibwatibwaa ana akoi ae rianako te Atua?
15 Ni koauana te ongeaba nakon ana tua te Atua ae tataekinan te rongorongo ae raoiroi ao kaungaia raora n te onimaki e uotii kakabwaia nakoira ni bane. Ti a karekea kukurein nanora ae kona n reke tii man ara anganga, ngkai a tabe n rikirake n te onimaki te koraki ake ti a tia ni buokiia. (Mwakuri 20:35) E rikirake ni kakukurei te ekaretia ngkai a bane kaaina n uaia n ibuobuoki i marenaia ma te tangira. Irarikina riki, te tangira ao te mwamwannano are ti kaotiotia i marenara, e a katereira riki iai bwa boni Kristian ni koaua ngaira. E taku Iesu: “Ane a na ataingkami aomata ni kabaneia ba au reirei ngkami n aei, ngkana kam i tangitangiri.” (Ioane 13:35) Ma ae te kabanea ni kakawaki riki, e riai ni karineaki Iehova ae Tamara ae mwamwannano n aei, ngkai e kaotiotaki nanona ni kani kakorakoraia ake a kainnanoa buokaia rinanoia ana toro aika i aon te aba. Ai bon tamaroara ngkanne kamanenaan te bwai n tituaraoi ae iroura ae ‘buobuokaia raora ngkai ngaira taan tibwatibwaa ana akoi ae rianako te Atua’! Ko na teimatoa ni kakaraoa aei?—Wareka Ebera 6:10.
Ko Uringnga?
• N aaro raa ae e kakorakoraia iai ana toro Iehova?
• Tera ae ti mwiokoaki iai?
• Baikara aanga tabeua aika ti kona iai ni beku ibukia raora n te onimaki?
• Tera ae e na kairira bwa ti na teimatoa ni kamanena te bwai n tituaraoi are e reke iroura ni ‘buobuokiia iai raora’?
[Taamnei n iteraniba 18]
Ko kamanena te “bwai n tituaraoi” are e reke iroum ibukia tabemwaang ke i bon ibukini kabwaiam?