Ko Na Moana Am Reirei n te Baibara n Okitobwa?
1. Tera ae ti na angan te aba n Okitobwa?
1 Te maekatin ae e na anga te aba n Okitobwa bon Te Taua-n-Tantani. Ibukini manga okiraia aomata ake a kan ongora, ti kaungaaki bwa ti na anga te turaeki ae Ko Kan Ataa te Koaua? ao ni kakorakoraira ni moana ara reirei n te Baibara ma ngaiia. Ti na kanga ni moana ara reirei n te Baibara ni manga okiraia?
2. Ti na kanga ni kabongana te turaeki ae Ataa te Koaua ni moana ara reirei n te Baibara ni manga okiran te aomata are e butimwaea ara maekatin?
2 Aroni Kamanenaan te Turaeki: Ti kona ni kangai: “E kaungaia aomata aika a kakaokoro nako aroia ao aia aaro te maekatin are I katikua iroum bwa a na nenera raoi te Baibara. [Angan te aomata te turaeki ae Ataa te Koaua, ao kaotii nakoina titiraki aika a oti mai moa.] Aikai titiraki tabeua aika a kakannongora bwa iai kaekaaia man te Baibara aika a karaunano. Ko a tia n titiraki n aron aikai?” Imwin ana kaeka te aomata anne, uaia n rinanon te kaeka man te turaeki ae kaineti ma ana titiraki, ao wareka teuana mai buakoni kiibu ake a kaotaki. Ngkanne kabwarabwaraa bwa aio te katoto ibukin te reirei ae e kona ni karekei man te Baibara, ao anganna te boki ae Ana Reirei te Baibara. Ti kona ngkanne n rinanoi moani barakiraben te mwakoro are e rineia mani kanoan te boki n reirei anne. Ke ti kona n raibaea nakon rongorongo riki tabeua aika a kaineti ma ara maroro n te turaeki. Aikai bwaai n ibuobuoki aika ti kona ni kabonganai:
● E mumutiakinira te Atua? (i. 9-11, bar. 6-10)
● Iai te tai ae na akea iai te buaka ao te rawawata? (i. 12, bar. 12-13)
● Tera ae na riki nakoira ngkana ti mate? (i. 59-60, bar. 7-8)
● Iai te kantaninga ibukia maate? (i. 71, bar. 13-15)
● N na kanga n tataro ao n ongoraeakinaki iroun te Atua? (i. 166-167, bar. 5-8)
● N na kanga ni karekea te kakukurei ni maiu? (i. 9, bar. 4-5)
3. Ti na kanga ni kaangaraoa ara maroro ni kaineti ma arona ni kan ongora?
3 Ma ngkana iai baika riki ni moan okiran te aomata n te aro are e aki reke ara tai ni moana te reirei n te boki ae Ana Reirei te Baibara ao ni kaota arona, ti kona ni manga karaoa ara babaire ibukini manga okirana n reita ara maroro. Ni kaineti ma aron te aomata ni kan ongora, ti kona moa n rinanoi titiraki ake tabeua man te turaeki ni kaangaraoa ara maroro rinanon ara tai ake ti kawaria iai imwain are ti na anganna te boki. Ti kona ni kabongana te turaeki ae manena aei n Okitobwa ibukini moanakin te reirei n te Baibara ao ni buokiia aomata aika raoiroi nanoia bwa a na “ataa te koaua.”—Ioa. 8:31, 32.