E na Korakora Anaakin Nanoia n te Kauring
1. Tera ae kona n anaaki riki iai nanoia iruwa i rarikin te kabwarabwara n te Kauring? Kabwarabwaraa.
1 N ningai? N te tairiki are e na boo iai te Kauring. E bati te kakorakora ni kaoaia aomata bwa a na airi ma ngaira nakon te botaki anne. Tiaki tii te bwai ae e kona n anaaki iai nanoia iruwa baike a ongoraeakin. Imwini kaean te Kauring iroun te aine temanna, ao e taekina te bwai ae e noria ae te iraorao i marenaia aomata ni kabane ao tamaroani ma itiakin te Tabo n Taromauri are e kateaki ao ni kateimatoaaki taraaraoina irouia aomata aika a anga nanoia n aki kabooaki. Mangaia are, tiaki tii te tia kabwarabwara ae na uataboa anaakin nanoia te koraki ake a roko n te botaki ae te kabanea ni kakawaki aei n te ririki, ma boni ngaira ni kabane.—IEbe. 4:16.
2. Ti na kanga n anai nanoia iruwa n tatabemanira nako?
2 Kamauriia Iruwa ma te Tangira: E kona n anaaki nanoia iruwa, ngkana ti butimwaeiia ma te moangare ao ni kamauriia. (Ioa. 13:35) E ngae ngkana ko aki kona n taetae ma aomata nako, ma ko kona n ikikina ma te tangira ma te koraki ake a tekateka i rarikim. (Ebera 13:1, 2) Kakaaeia iruwa ake akea ae a kinaa. Tao a karekea aia beeba ni kakao n taini karaoan te mwakuri ae okoro ibukini kabutan te beeba ni kakao. Ko kona n titiraki ni kangai, “Ai tibwa am moan tai n roko aei?” Kaoia bwa a na tekateka i rarikim, ao taraia raoi bwa ko na kaekai aia titiraki ake a na taekin. Ngkana e na waekoa am ekaretia ni kitana te tabo anne ibukini kabonganaana iroun te ekaretia are teuana, ko kona ni kangai: “I kan ataia bwa tera am iango ibukin te botaki. E kona n reke te anga ae N na kona n reitaki iai ma ngkoe?”
3. Ti na kanga ni butimwaeiia taan uarongorongo aika a manga aki uarongorongo?
3 Butimwaeiia Taan Uarongorongo Aika A Manga Aki Uarongorongo: Akea te nanououa bwa a na boni bae n roko taan uarongorongo aika a manga aki uarongorongo, n ikotaki naba ma tabeman ake a tii roroko n te Kauring ni katoa ririki. Butimwaeiia ao ni kaotia nakoia ae ko rangi ni kukurei irouia ngkai ko a manga noriia. (IRom 15:7) A kona unimwaane ni kawariia te koraki akanne ni mwengaia imwin te Kauring, ni kaungaia bwa a na kateimatoaa bobotakia ma kaain te ekaretia. Bon ara tataro bwa a na kairaki te koraki aika mwaiti ake a roko, bwa a na neboa te Atua tiaki ibukini baike a ongo ma ibukin naba baike a nori ‘ibukin noran ara mwakuri aika raraoi.’—1 Bet. 2:12.