Butimwaeiia ma te Tangira

Antai aika a na butimwaeaki ma te tangira? Aomata nako ake a kaei ara bobotaki ni Kristian, ni moa mairouia aika boou ao aika ti tataneiai naba ma ngaiia. (Ro 15:7; Ebr 13:2) E kona n ae kaain te onimaki man te aba teuana ke te Kristian ae e a katoka reitakina ma te ekaretia, ao ai tibwa ana moantai i nanon ririki aika bati n roko n te botaki. Iangoia bwa aongkoa ngkoe anne. Tiaki ko na kukurei ni butimwaeam ma te tangira? (Mt 7:12) Ngaia are e aera ko aki biririmoa ni kawariia naake a roko n te Tabo n Taromauri ao ni kamauriia imwain ao imwin te botaki? E karikirakeaki iai te akoi ao te itangitangiri ao e neboaki iai Iehova. (Mt 5:16) E bae ni kangaanga te maroro ma aomata ni kabane ake a roko. Ma a na bane n namakina ae a butimwaeaki raoi ngkana ti bane ni karaoa tabera.a

E na kaotiotaki butimwaean raoi te aomata n taai nako ma tiaki tii ni botaki aika okoro n aron te Kauring. Ngkana a nora te itangitangiri ni Kristian naake a boou, a a kairaki iai bwa a na karaoiroa te Atua ao n raonira n te taromauri ae koaua.​—Io 13:35.