Butimwaeiia Ake A Kaea te Kauring!
1. Tera te botaki ae reke iai ara tai ae angaraoi ibukin te uarongorongo, ao bukin tera?
1 Akea te botaki ae reke iai ara tai ae angaraoi ibukin te uarongorongo, irarikin te Kauring ni katoa ririki. Iangoa aei: N te ririki aei, ao e kantaningaaki bwa a na kaea te Kauring aomata aika e raka i aon tebwina te mirion mwaitiia, ao n ongoraei aanga aika uoua aika rangi ni kakawaki ibukin te tangira are e kaotiotaki rinanon te karea ni kaboomwi. (Ioa. 3:16; 15:13) A na reiakin naba iai taekani kakabwaia aika a kona ni karekei rinanon ana bwaintangira Iehova. (Ita. 65:21-23) E ngae n anne, tiaki tii te tia kabwarabwara ae e na reke ana tai n uarongorongo n te botaki aei. E na angaraoi naba ibukin aia uarongorongo te koraki ni kabane ake a roko, ngkana a butimwaeiia aomata ake a tibwa kaea te Kauring.—IRom 15:7.
2. Tera arora ni butimwaeiia te koraki ake a tibwa kaea te Kauring?
2 N oneani mwin ae ko na kakaaea am tabo n tekateka ao n tataningaa moanakin te botaki, e aera ko aki biririmoa ni kamauriia akana a tekateka i rarikim? A kona n nako nanoia ao n aki ataa te bae e na karaoaki, te koraki ake a tibwa kaea te Kauring. Ngkana ti moangare ao ni kamauriia ma te iraorao, a na buokaki iai n aki maamaa ao n namakina ae a butimwaeaki raoi. Ngkana iai ae ti noria bwa e roko man te beeba ni kakao are e karekea, ti kona n titirakinna bwa ana moantai aei ni kaea ara bobotaki ke iai ae e kinaa n te ekaretia. Tao ko kona n tuangnga bwa e na tekateka i rarikim ao n ibuobuoki ma ngaia n am Baibara ao am boki n anene. Ngkana e kabonganaaki te Tabo n Taromauri, ko kona ni kaneweaba iai. Imwin te kabwarabwara, tauraoi ni kaekai ana titiraki. Ngkana a riai ni waekoa kaain am ekaretia ni kitana te tabo ni botaki ibukini kabonganaana irouia kaain te ekaretia are teuana, ko kona ni kangai: “I kan ataia bwa tera am iango ibukin te botaki aei. E kona n reke te anga ae N na kona n reitaki iai ma ngkoe?” Imwina, karaoa am babaire ibukini manga kawarana. A tauraoi unimwaanen te ekaretia ni kaungaia taan uarongorongo ake a manga aki uarongorongo, ake a kaea te Kauring.
3. Bukin tera ngkai e kakawaki bwa ti na biririmoa ni butimwaeiia te koraki ake a tibwa kaea te Kauring?
3 E na riki te botaki aei bwa aia moantai te koraki aika bati ake a tibwa kaea te Kauring, n namakina te kimwareirei, te rau ao te katiteuanaaki n te bwaretaiti n taamnei ae ti karekea, ngkai ana aomata Iehova ngaira. (TaiAre. 29:11; Ita. 11:6-9; 65:13, 14) Tera ae a na ururingnga imwini kaean te botaki, te koraki ake a tibwa kaea te Kauring? E boto aei n arora ni biririmoa ni butimwaeiia.