Kaotiotan te Taotaonakinnano n Ara Mwakuri ni Minita
1. E kanga Iehova ni kaotiota te taotaonakinnano nakoia te botannaomata?
1 Te taotaonakinnano bon aroaron te Atua ae kaotiotia nakoia te botannaomata. (TeOti. 34:6; TaiAre. 106:41-45; 2Bet. 3:9) Te katoto teuana ae te kabanea n tamaroa ibukin ana taotaonakinnano ae taabangaki norana, bon te mwakuri n uarongorongoa te Tautaeka n Uea ni katobibia te aonnaba. E a tia Iehova ni kaotiota te taotaonakinnano nakoia te botannaomata n te maan ae e kaania 2,000 te ririki, ao e bon teimatoa naba ni butimwaeiia aomata aika raoiroi nanoia ake a kani kawaria. (Ioa. 6: 44) E na kanga ara mwakuri ni minita ni katotonga ana taotaonakinnano Iehova?
2. Ti na kanga ni kaotiota te taotaonakinnano ngkana ti mwakuria ara aono?
2 Te Mwakuri ni Minita n te Auti Teuana ma Teuana: Ti katotonga ana taotaonakinnano Iehova n arora n uarongorongo “n aki toki” n taabo nako ake a mena iai aomata ake a aki kani kaotiota te kan ongora. (Mwa. 5: 42) Ti taotaonakinnano ma te nanomwaaka ribuakon te aki bwerengaki, te kakanikoaki ao te kaitaraaki n ara mwakuri ni minita. (Mareko 13:12, 13) Ti kaotiota naba te taotaonakinnano n arora n nanomwaaka n teboki koraan te koaua, e ngae ngke e kanganga kakaaeaia aika a raoiroi nanoia ni mwengaia.
3. Bukin tera bwa e kainnanoaki te taotaonakinnano ni manga okiraia aomata ao ni kairan reirei n te Baibara?
3 Te Reirei n te Baibara ma Aomata: E kainnanoa te taotaonakinnano karikirakean te aroka. Ti kona n ribanaia ma ti aki kona n ienikuria rikirakena. (Iak. 5:7) N aron naba anne, e ririkirake ni bibitaki teutana imwin teutana maiuakinan te onimaki ni koaua. (Mareko 4: 28) A kona ni kunea te koraki ake ti reirei ma ngaiia bwa e kangaanga irouia kitanan aia koaua Aaro aika kewe, ke katei aika a bobuaka ma ana reirei te Baibara. Ti aki riai ni kawaekoaa rikirakeia ara reirei n arora ni kairoroia bwa a na karaoa te bitaki. E kainnanoaki te taotaonakinnano bwa e na kariaia mwamwakurin taamnein te Atua n te tai ae riai bwa e na rota nanon te aomata are e reiakinaki.—1 Kor. 3:6, 7.
4. E na kanga te taotaonakinnano ni buokira bwa ti na uarongorongo n te aro ae uaana nakoia ara koraki aika tiaki kaain te onimaki?
4 Ara Koraki Aika Tiaki Kaain te Onimaki: E ngae ngke ti rangi n tangiriia ara koraki aika tiaki kaain te onimaki bwa a na reiakina te koaua, ti kaotiota te taotaonakinnano n arora n tataningaa te tai ae angaraoi ibukin tibwaakin ara onimaki nakoia, ao n taraia raoi bwa ti na aki taekin rongorongo aika bati nakoia. (TeMin. 3:1, 7) I nanon te tai anne, e na kaotaki n ara katoto bwa te aeka n aomata raa ngaira ibukin ara koaua, ao ti tauraoi ni kaotiota ara onimaki ma te nimamannei ao te karinerine ae bati. (1 Bet. 3:1, 15) Ni koauana, e na bon uaana riki ao ni kakukureia Tamara are i karawa kaotiotan te taotaonakinnano n te mwakuri ni minita.