BUOKAN TE UTU | TE TEKATEKA N TAANGA IMWIN TE MARE
Aroni Karikirakean te Taotaonakinnano
“E kataaki ni katoabong aia taotaonakinnano taanga. Tao tiaki te bwai ae kakawaki bwainan te taotaonakinnano ngkana ko tuai n iein, ma bon te anua ae rangi ni kakawaki ibukin nakoraoin te tekateka n taanga imwin te mare.”—John.
Bukin tera bwa ko kainnanoa te taotaonakinnano?
Ko kai atai kabwakan buum n tekatekami n taanga.
“Ni waakinakon te tai n tekateka n taanga, ko nang kai nori ngkanne anuani buum aika aki rangi ni katekenano. Ngkana ko iaiangoi anuana akanne, e na kai bua am taotaonakinnano.”—Jessena.
E kona te aki taotaonakinnano ni kairiko bwa ko na taetae imwain ae ko iango moa.
“I rangi ni baitii ni kaota au namakin n te aro are n tabetai, a a tiinako taeka ake I aki raoi nanoni. Ngkana N na bwaina te taotaonakinnano, I riai n iangoi taeka ake N na taekini bwa a riai taekinaia ke a aki, ao ngkana a aki, I kona ngkanne n aki taekin.”—Carmen.
E taku te Baibara: “E taotaonakinnano te tangira ao e akoi.” (1 I-Korinto 13:4) E taraa n ae a bon riai uoman aomata aika a tangiriia ni kaotiota te taotaonakinnano. Ma tiaki anne ae e riiriki. “N aron naba anua tabeua aika raraoi riki,” e taku John are taekinaki mai moa, “e bebete riki bwainan te aki taotaonakinnano nakoni kaotiotana. E kainnanoaki te mwakuri korakora ngkana ti na kaotiotia.”
Ko na kangaa ni kaotiota te taotaonakinnano?
Kataakin am taotaonakinnano ngkana e riki te bwai ae aki kantaningaaki.
Te katoto: E taetae ma te aki akoi buum nakoim. Ko na bae n tangiria ngkekei naba ni kabooa ana taeka ma te aki akoi.
Ana boto n reirei te Baibara: ‘Tai waekoa n un, bwa te un kanikinaean te nanobaba.’—Te Minita 7:9, te kabwarabwara mai nano.
Aroni kaotiotan te taotaonakinnano: Tautaua angina. Imwain are ko na kaeka, karaua moa iangoa nanon ana taeka buum, n oneani mwin are ko a bon iangoia naba bwa e taetae ni kani kauniko. “Angiina i buakora, ti waekoa n un naba ngkekei ibukina bwa ti kabuburai nanon taeka ake a taekini buura nakoira, e ngae ngke tiaki anne ae a nanonna,” e taekinaki anne n te boki ae Fighting for Your Marriage.
E ngae ngkana e kataia ni kauniko buum, e kona ni kerikaaki te un n oneani mwin are e na bubura riki, ngkana ko taotaona nanom n aki kabooa ana taeka ni kamarakinano. E taku te Baibara: “Ike akea iai te aia ao e mate te ai.”—Taeka N Rabakau 26:20.
“Ngkana ko a moanna n iangoa buum bwa kaanga aiam, teei moa ao karaua iangoa bukina ngkai ko tangiria, ao waekoa ni kataia ni karaoa ae raoiroi nakoina.”—Ethan.
Iangoa aei:
Tera arom nakoni buum ngkana e taekina ke ni karaoa ae e aki akoi nakoim?
Ko na kangaa ni kaotiota te taotaonakinnano ae korakora ngkana e a manga riki naba aei imwina?
Kataakin am taotaonakinnano ngkana e okioki ana kamarakinano buum
Te katoto: E a bon ririmwi naba buum, ko na bae n tataningaia—ao e a moanna ni maraki nanom iai.
Ana boto n reirei te Baibara: “Teimatoa n taotaon nanomi i marenami ao tauraoi n ikabwarabure.”—I-Korote 3:13.
Aroni kaotiotan te taotaonakinnano: Kataia ni moanibwaia nakoraoin tekatekami n taanga n oneani mwin are ko na karimoaa nanom. Titirakiniko, ‘E na buokaki tekatekara n taanga ngkana I taua au eti n te bwai ae riki aei, ke e na rotakibuaka iai?’ Uringnga naba are “ti bane n titibanako n taai aika bati.” (Iakobo 3:2) Nanon aei bwa iai naba baike ko riai ni bitii n aroarom.
“N tabetai, I rabakau riki n taotaona nanou nakon raoraou, ma e karako taotaonan nanou nakoni buu. Tao ibukina bwa I kakabanea te tai ae bati ma buu ike I a nori iai anuana aika aki kororaoi. Ma te taotaonakinnano bon iteran naba te tangira—ae kanikinaean raoi te karinerine—mangaia are e kakawaki anne n te tekateka n taanga.”—Nia.
Iangoa aei:
Ko tataotaona nanom ngkana e kairua buum?
Ko na kangaa ni kaotiota te taotaonakinnano ae korakora n taai aika imwaim?