Bwaina “te Nanoanga”
1. Tera ae a rangi ni kainnanoia aomata ni boong aikai?
1 E a bon rangi ni korakora riki ngkai mwaitiia aomata aika a rangi ni kainnanoa te ibuobuoki ae boto i aon te nanoanga. Rikiraken te waaki ae buakaka n te aonnaba e a karikii bwaai aika a taabangaki norakia aika te aki kukurei, te nanokawaki, te karawawata, ao ai te bwarannano. Mirion ma mirion mwaitiia te koraki ake a kainnanoa buokaia, ao ngaira aika Kristian ti bon riai n tauraoi ni kaotiota te mwamwannano ni koaua nakoia aomata nako. (Mat. 22:39; IKar. 6:10) E na kanga ni kaotiotaki te mwamwannano aio?
2. Tera te kawai ae te kabanea n tamaroa ibukira ni kaotiotan te nanoanga?
2 Te Mwakuri ae Kaotiota te Nanoanga: Bon akea te kabebeteaki ae teimatoa ao ni manena bwa bon tii mairoun te Atua. (2Kor. 1:3, 4) E kaumakira Iehova bwa ti na katotonga arona ni kaotiota “te nanoanga,” ao e a tia n anganira te mwioko ae kawaraia aomata ma te rongorongo ae raoiroi ae taekan te Tautaeka n Uea. (1Bet. 3:8) Kabanean ara kona ibukini karaoan te mwakuri aio, bon tii ngaia te kawai ae rangi n tamaroa ibukini buokaia ake a “uruaki nanoia,” ibukina bwa bon tii Ana Tautaeka n Uea te Atua ae e na kona ni katoki rawawataia te botannaomata. (Ita. 61:1, BG) Ibukin nanoangaaia ana aomata irouna, e na waekoa Iehova ni kamauna te buakaka ao ni waakina te waaki ae boou ae raoiroi i aon te aba.—2Bet. 3:13.
3. Ti na kanga n taraiia aomata n aron taraakia iroun Iesu?
3 Taraiia Aomata n Aron Taraakia Iroun Iesu: N ana tai n uarongorongo Iesu nakoia te koraki ae uanao ao e noriia naba te koraki aika mwaiti kurikuri. E taraiia aomata aikai bwa a rangi n tangira buokaia bwa a na ataa kakawakin te iraorao ae kaan ma te Atua. Kaanga ai aroia tiibu ake akea te tia kawakinia. E rangi n rotaki nanon Iesu n te bwai are e noria ao e kairaki iai bwa e na reireinia ma te taotaonakinnano. (Mareko 6:34) Arora n taraiia aomata n aron taraakia iroun Iesu e na kaungaira bwa ti na riai ni kaotiota te nanoanga ni koaua nakoia bwa kanga raora. E na oti aio man aron teini bwanaara n ara taetaenikawai ao ai teini moara are ti kaotiotia. E bon riai ni moanibwai iroura te uarongorongo, ao ti riai n rabakau ni kaotiota te mwamwannano nakon temanna ma temanna ma ana kangaanga.—1Kor. 9:19-23.
4. Bukin tera bwa ti riai ni karina i aora te nanoanga?
4 A mwaiti te koraki ae uanao man natannaomata nako ake a kukurei ni butimwaea te rongorongo ae taekan te Tautaeka n Uea ao ni kukurei ni kaota te kan ongora. Ti kaotiota te karinerine ao ni kakukureia Atuara ae nanoanga ae Iehova ngkana ti teimatoa ni karina i aora te nanoanga.—IKoro. 3:12.