Ko Karekea Reireiam ae Bati Mairoun Iehova?

1. Tera ana namakin Iehova ibukin te angareirei?

¹ E tangirira Iehova ae ara ‘tia Reirei ae Moan te Kakannato’ bwa ti na reiakinaki raoi. (Ita. 30:20, BG) E moana ana angareirei imwini karikan ana moan Nati. (Ioa. 8:28) Imwin ana karitei Atam, e aki katoka ana angareirei Iehova ma e katauraoa te kaetieti ma te tangira ibukia aomata aika aki kororaoi.—Ita. 48:17, 18; 2 Tim. 3:14, 15.

2. Tera te mwakuri n angareirei ae tabe ni waakinaki ngkai?

² Ni boong aikai, e kaira te mwakuri n angareirei Iehova ae rangi ni manena are e a kamani waakinaki. N aron ae taetae ni burabetinaki iroun Itaia, mirion ma mirion aomata ni katobibia te aonnaba aika a na raanga nakoni “maungani maneaban Iehova” n te aro ni kaikonaki. (Ita. 2:2, BG) Bukin tera bwa a na raanga nakoni mwaneaban Iehova? Ibukina bwa a na reiakinaki ni kawain nako te Atua ao a na reireinaki naba iroun Iehova! (Ita. 2:3) N te ririki ni mwakuri ae 2010, ao a karekea te aoa ae 1.6 te birion Ana Tia Kakoaua Iehova n uarongorongo ao n reireinia aomata taekan te koaua man te Baibara. Irarikin anne, e teimatoa n tataekinaki ni katoa wiki n ekaretia aika e raka i aon 105,000 ni katobibia te aonnaba te kaetieti ibukini maiuakinan te onimaki, ao a katauraoaki booki n reirei ibukia Kristian iroun te toro ae kakaonimaki ma ni wanawana n taetae aika e raka i aon 500.

3. Ti kanga n tia ni kakabwaiaaki man te reirei ae katauraoia Iehova?

³ Kakabwaiaakira Man te Reirei: Ai kakabwaiaakira ngaira n te reirei mairoun te Atua! Ti a tia n reiakinna ae iai aran te Atua ao e bon tabeakinira. (TaiAre. 83:18; 1 Bet. 5:6, 7) Ti reiakini kaekaan titiraki tabeua aika kakawaki ni maiura n aron ae: E aera ngkai a karawawataaki aomata ao ni mate? N na kanga ni karekea te kakukurei ni maiu? Tera manenan te maiu aei? E a tia Iehova n anganira te reirei ni kairiri ibukin te aroaro ni maiu ae riai bwa ti ‘aonga ni kakabwaiaaki ni kawaira.’—Iot. 1:8, BG.

4. Baikara reirei tabeua aika tauraoi ibukia ana toro te Atua, ao e aera ngkai ti riai n reiakini baika bati mairoun Iehova?

⁴ Irarikin anne, e katauraoi reirei aika okoro Iehova ibukini buokaia ana toro bwa a na kabatiaa riki aia beku ibukina. A karinanaki n iteraniba 4-6 reirei aika tauraoi ibukia tabeman. E ngae ngkana a angabuaka nakoira reirei ni kataneiai aika karinanaki aikai, ti kamanena raoi te reirei mairoun te Atua ae tauraoi ibukira? Ti kaungaia rooro n rikirake ake a aki toki n anaaki nanoia irouia taan reirei ao tabemwaang ibukin uaiakinan te reirei ae rietata, bwa a na katei tiaia n te onimaki ao n uaiakina te reirei ae rietata riki ae mairoun te Atua? Ti na kona ni karekea te maiu ae kakukurei ao te maiu are aki toki n taai aika na roko n reiakinani baika bati mairoun Iehova.—TaiAre. 119:105; Ioa. 17:3.

Te Reirei i Aon te Wareware ao te Koroboki

• Bukin te Reirei: Ibukin reiakinaia aomata aroia ni wareware ao ni koroboki bwa a aonga n rabakau ni karaoa aia reirei n te Baibara i bon irouia ao n reiakina te koaua nakoia tabemwaang.

• Maanna: N aroni kainnanoana.

• Te Tabo: Te Tabo n Taromauri.

• Aika A na Ira te Reirei: Taan uarongorongo ni kabane ao naake a kani kaea.

• Arom ni Kaainna: A bairea te reirei aei unimwaane n te ekaretia ibukini kainnanoana, ao a kaungaia aomata ni kabane bwa a na kaea ngkana a kona.

Te Kuura ni Kataneiai Ibukia Taan Uarongorongo

• Bukin te Reirei: Ibukini kataneiaakia taan uarongorongo bwa a na riki bwa taan tataekina te rongorongo ae raoiroi ao taan angareirei n te aro ae uaana.

• Maanna: E teimatoa ni kakaraoaki ni katoa wiki.

• Te Tabo: Te Tabo n Taromauri.

• Aika A na Ira te Reirei: Taan uarongorongo ni kabane, n ikotaki naba ma te koraki ake a kukurei n reirei n te Baibara, a iririi bobotaki n te ekaretia ao a kaboraoi maiuia ma booto n reirei ni Kristian.

• Arom ni Kaainna: Maroro ma te mataniwi ibukin Te Kuura ni Kataneiai Ibukia Taan Uarongorongo.

Te Reirei n Reiakinan Taetae Tabeua

• Bukin te Reirei: Ibukin reiakinaia taan uarongorongo aroia n tataekina te rongorongo ae raoiroi n te taetae teuana.

• Maanna: Aua ke nimaua te namwakaina. A kakaraoaki reirei n te Kaonobong koraki n te ingabong ibukin teuana ke uoua te aoa.

• Te Tabo: Te Tabo n Taromauri.

• Aika A na Ira te Reirei: Taan uarongorongo ake a raoiroi aroaroia ake a tangiria n uarongorongo n taetae tabeua.

• Arom ni Kaainna: A baireaki reirei man te aobiti n tararua ni kaineti ma kainnanoana.

Katean Taabo n Taromauri

• Bukin te Reirei: Ibukini katean ao onobwaian Taabo n Taromauri. Tiaki te kuura n reirei, ma ibukin reiakinaia taan anganano rabakau aika kakaokoro ibukin te kateitei.

• Maanna: E kaineti ma aron ana konabwai te tia anganano.

• Te Tabo: Taabo nako ake a baireaki man te Komete Ibukin te Kateitei n te Aono. A kona ni kaoaki tabeman taan anganano bwa a na ibuobuoki n aaba aika raroanako ake a rotaki n te kabuanibwai.

• Baika Kantaningaaki: A riai n tia ni bwabetitoaki taari mwaane ao aine ao n tia ni kariaiakaki man te rabwata n unimwaane. Tao e na iai rabakauia ke akea.

• Arom ni Kaainna: Kanoaa te booma ae te Kingdom Hall Volunteer Worker Questionnaire (S-82) ae katauraoaki irouia unimwaane n te ekaretia.

Te Kuura Ibukin te Mwakuri ni Bwaiania

• Bukin te Reirei: Ibukini buokaia bwaiania bwa a na ‘kakororaoa raoi aia mwakuri ni minita.’—2Tim. 4:5.

• Maanna: Uoua te wiki.

• Te Tabo: E baireaki man te aobiti n tararua; ma e kakaraoaki n te Tabo n Taromauri.

• Baika Kantaningaaki: Te koraki ake a tia n regular bwaiania tao i nanon teuana te ririki.

• Arom ni Kaainna: A kona ni kaainna naake a tia ni bwaiania i nanon te tai ae maan ao a na kaongoaki iroun aia mataniwi n te aono ae uarereke.

Te Reirei Ibukia te Koraki Aika Tibwa Rin n te Betaera

• Bukin te Reirei: E baireaki te reirei aei ibukia naake a boou bwa e aonga n nakoraoi aia beku n te Betaera.

Maanna: Teuana te aoa ni katoa wiki ibukin tebwi ma onoua te wiki.

• Te Tabo: Te Betaera.

• Baika Kantaningaaki: A riai n tia n riki bwa kaain te utu ni Betaera ke taan ibuobuoki ake a a tia ni mwakuri n te tai ae maan (tao teuana te ririki ke e raka riki).

• Arom ni Kaainna: A kona ni kaea te reirei te koraki ake boni kaain te utu ni Betaera aika a tau iai.

Te Kuura ni Minita Ibukin te Tautaeka n Uea

• Bukin te Reirei: Ibukini kataneiaakia unimwaane ao tabonibai n te ekaretia bwa a na tabeakina te aono are a tararuaia ao mwiokoaia n ana botaki te Atua. (Mwa. 20:28) E kakaraoaki te reirei aei i nanon ririki tabeua ngkana e baireaki man te Rabwata n Tautaeka.

• Maanna: N ririki aika tibwa nako ao e a tia ni karaoaki i nanon teuana ma te iterana te bong ibukia unimwaane ao te bongina ibukia tabonibai n te ekaretia.

• Te Tabo: Te Tabo n Taromauri ke te Tabo ni Botaki Ibukin te Bwabwaro.

• Baika Kantaningaaki: A riai n tia n riki bwa unimwaane ao tabonibai n te ekaretia.

• Arom ni Kaainna: A kaoaki iroun te mataniwi n te aono ae uarereke unimwaane ao tabonibai n te ekaretia aika a tau iai.

Te Kuura Ibukia Unimwaane n te Ekaretiaa

• Bukin te Reirei: Ibukini buokaia unimwaane bwa a na kakororaoi mwiokoaia n te ekaretia.

• Maanna: Nimabong.

• Te Tabo: E baireaki man te aobiti n tararua; ma e kakaraoaki n te Tabo n Taromauri ke te Tabo ni Botaki Ibukin te Bwabwaro.

• Baika Kantaningaaki: A riai n tia n riki bwa unimwaane.

• Arom ni Kaainna: A kaoaki man te aobiti n tararua unimwaane n te ekaretia ake a tau iai.

Te Kuura Ibukia Mataniwi Aika Mwamwananga ma Buuiab

• Bukin te Reirei: Bwa e na uaana riki aia beku ibukin te ekaretia mataniwi ibukin te aono ae uarereke ao ae bubura, a na “mwakuri korakora n tataekina ana taeka te Atua ao n angareirei iai” ao n tararuaiia te koraki ake a kairiia.—1Tim. 5:17; 1Bet. 5:2, 3. 

• Maanna: Uoua te namwakaina.

• Te Tabo: E baireaki man te aobiti n tararua.

• Baika Kantaningaaki: A riai n tia n riki bwa mataniwi n te aono ae uarereke ke ae bubura.

• Arom ni Kaainna: A kaoaki man te aobiti n tararua mataniwi aika mwamwananga aika a tau iai ma buuia.

Te Kuura n Reirei n te Baibara Ibukia Taari Mwaane Aika Akea Buuiac

• Bukin te Reirei: Ibukini katauraoaia unimwaane ao tabonibai n te ekaretia aika tuai ni mare nakoni mwioko riki tabeua. A na mwiokoaki angiia te koraki ake a tia ni kataneiai bwa a na beku i abaia ike e kainnanoaki iai te ibuobuoki. A kona ni mwiokoaki tabeman bwa a na mwakuri n te aba teuana ngkana a tauraoi iai.

• Maanna: Uoua te namwakaina.

• Te Tabo: E baireaki man te aobiti n tararua; ma e kakaraoaki n te Tabo ni Botaki Ibukin te Bwabwaro, ke n te Tabo n Taromauri.

• Baika Kantaningaaki: Taari mwaane ae aia ririki ni maiu i marenan 23 ao 62 aika akea buuia ao a marurung raoi, ake a tangiria ni buokiia taari ao n uataboa te mwakuri n uarongorongo n te tabo are e kainnanoaki iai. (Mareko 10:29, 30) A riai ni beku i nanon uoua te ririki ae reitinako ni mwiokoaia are a anganaki.

• Arom ni Kaainna: Ngkana e waakinaki te reirei aei n am tabo, e na karaoaki te maroro n tain te runga n aono ma te koraki ake a kani kaea te reirei. E na ongoraeaki riki rongorongona n tain te maroro.

Te Kuura n Reirei n te Baibara Ibukia Taanga ni Kristiand

• Bukin te Reirei: Bwa e aonga n reke aia tai taanga ni mare ibukin te reirei ae okoro, bwa a na kamanenaaki riki aia tai ni beku iroun Iehova ao ana botaki. A na mwiokoaki angiia te koraki ake a tia ni kataneiai bwa a na beku i abaia ike e kainnanoaki iai te ibuobuoki. A kona ni mwiokoaki tabeman bwa a na mwakuri n te aba teuana ngkana a tauraoi iai.

• Maanna: Uoua te namwakaina.

• Te Tabo: A waakinaki kuura aika e raka i aon teuana ke uoua n te Watchtower Educational Center, Patterson, New York, U.S.A. Imwina, e na manga karaoaki te kuura aei n taabo ake a baireaki man te aobiti n tararua, ma n angiin te tai e kakaraoaki n te Tabo ni Botaki Ibukin te Bwabwaro ke n te Tabo n Taromauri.

• Baika Kainnanoaki: Taanga ni mare ae aia ririki ni maiu i marenan 25 ao 50 ao a marurung raoi, ake a kani beku n taabo ake e kainnanoaki iai te ibuobuoki ae iai nanoia n taekina ae kangai: “Aio ngai; kanakoai.” (Ita. 6:8, BG) Irarikin anne, a riai n tia ni mare ao ni kabwanina aia tai ni beku ae reitinako n te maan ae uoua te ririki.

• Arom ni Kaainna: Ngkana e waakinaki te reirei aei n am tabo, e karaoaki te maroro n te bong ni botaki ae okoro ma te koraki ake a kani kaea te reirei. E na ongoraeaki riki rongorongona n tain te maroro.

Te Kuura ni Kireata

• Bukin te Reirei: Ibukini kataneiaakia bwaiania nakon te mwakuri ni mitinare, ao tabeman riki ake a kabwanina aia tai ni beku.

• Maanna: Nimaua te namwakaina.

• Te Tabo: Watchtower Educational Center, Patterson, New York, U.S.A.

• Baika Kainnanoaki: Taanga ake a tia ni bwabetitoaki i nanon te maan ae tenua te ririki ao aia ririki ni maiu i marenan 21 ao 38 n te tai are a moani kanoaa iai te booma. A riai n rabakau te taetae n Imatang, ao a na tia ni mare ao ni kabwanina aia tai ni beku ae reitinako n te maan ae uoua te ririki. A na marurung raoi. A kona naba n anga araia bwaiania ake a beku n aaba tabeua (n ikotaki ma te koraki ake a kataa te nakoa ni mitinare); mataniwi aika mwamwananga; kaain te utu ni Betaera; ao naake a tia ni kaea Te Kuura Ibukini Kataneiaakia Minita, Te Kuura n Reirei n te Baibara Ibukia Taari Mwaane Aika Akea Buuia, ao Te Kuura n Reirei n te Baibara Ibukia Taanga ni Kristian.

• Arom ni Kaainna: N aaba tabeua ao e karaoaki te maroro n tain te bwabwaro ma te koraki ake a kani kaea te reirei. E na ongoraeaki riki rongorongona n tain te maroro. Ngkana e aki maroroakinaki aei n tain te bwabwaro n am tabo, ko kona ni kororeta nakon te aobiti n tararua ibukin rongorongona ae bwanin ngkana ko kani kaea.

Te Kuura Ibukin te Komete n Tararua n Aia Aobiti Ana Tia Kakoaua Iehova, ma Buuia

• Bukin te Reirei: Ibukini buokaia te koraki ake a beku ibukin te Komete n Tararua n Aia Aobiti Ana Tia Kakoaua Iehova bwa a na tabeakin nakoraoin taabo ni maeka n te Betaera, mwakuri aika karaoaki n ekaretia nako, ao ni bairea te runga n aono ao te bwabwaro n aia aono ake a mwiokoaki iai, n ikotaki naba ma te mwakuri n rairai, te boreeti, ao kanakoani booki nakon aaba nako, ao tararuaani mwaangan te mwakuri aika kakaokoro.—Ruka 12:48b.

• Maanna: Uoua te namwakaina.

• Te Tabo: Watchtower Educational Center, Patterson, New York, U.S.A.

• Baika Kainnanoaki: Te koraki ake a tia ni kaaina te Komete n Tararua n Aia Aobiti Ana Tia Kakoaua Iehova ke Te Komete Ibukin te Aba, ke te koraki ake a mwiokoaki ni mwakuri aikai.

• Arom ni Kaainna: A kaoaki man te Rabwata n Tautaeka taari mwaane ake a tau iai ma buuia.

[Kabwarabwara ae nano]

Waaki n Reirei Tabeua Aika Tauraoi n Ana Botaki Iehova