“Karekea te Rau ma Aomata ni Kabane”
1. Tera ana reirei ni kairiri te Baibara ae ti riai ni maiuakinna ngkana ti kaitiboo ma aomata aika a aki kukurei ni kawarakia?
1 A tangira te rau ana aomata Iehova, ao e karekea te rau ara mwakuri ni minita. (Ita. 52:7) N taai tabetai ao ti kaitiboo ma aomata aika a aki kukurei ngkana ti kawariia n aia auti. Tera ae e na buokira ni karekea te rau n aeka ni kangaanga aikai?—IRom 12:18.
2. Bukin tera ngkai e kakawaki bwa ti na ataa aia kangaanga aomata?
2 Atai Aia Kangaanga Aomata: E ngae ngke iai tabeman aika a rawa ni butimwaeira ibukina bwa a ribaa te koaua, ma tabeman a kaota te aki kukurei bwa iai bukina ae e aki irekereke ma ara uarongorongo. Tao ti kawariia n te tai ae e aki angaraoi. Tao e aki kukurei kaain te auti ni butimwaeira bwa iai ana kangaanga ae taonaki iai. E ngae ngke e aki kukurei n te rongorongo ae raoiroi, ma ti riai n uringnga ae e kaeka n te aro anne ibukina bwa e a tia ni mwamwanaaki. (2Kor. 4:4) Ngkana ti ataa aia kangaanga aomata, ti na buokaki iai n teimatoa n rau ao n aki kabooa mwin te baere a karaoia nakoira.—TaeRab. 19:11.
3. Ti na kanga ni kaotiota te karinerine nakoni kaain te auti?
3 Kaotiota te Karinerine: A bati kaain ara aono aika a matoatoa n aia koaua. (2Kor. 10:4) Iai inaomataia n rineia bwa a na ongora n ara uarongorongo ke a na aki. Ti aki kani kakeaa bongan ana koaua kaain te auti ke ni kamangoria ibukina bwa ti ataa riki kanoan te Baibara nakoina. Ngkana e tuangira bwa ti na kitana ana auti, ti riai ni kitanna ma te karinerine.
4. Tera ae nanonaki n te taetae ma te atataiaomata?
4 Taetae ma te Atataiaomata: E ngae ngkana a taetae n aki akaka nakoira aomata, ma ti riai ni kaekaia ma te nimamannei ao te atataiaomata. (IKoro. 4:6; 1Bet. 2:23) N oneani mwin ae ti na kauntaeka, ti riai ni kataia ni kakaaei baika ti boraoi n iango iai. Tao ti kona n titirakinna ma te akoi bwa e na kaota bukina ngkai e aki kukurei. Ma e nakoraoi n tabetai ngkana ti aki reitaanako te maroro ibukin totokoan te kauntaeka.—TaeRab. 9:7; 17:14.
5. Baikara kakabwaia aika kona n reke ni bwainan te rau n ara mwakuri ni minita?
5 Ngkana ti teimatoa ni karekea te rau, e na kona kaain te auti n ururinga aron ara mwakuri ae ti karaoia ao ni manga butimwaea ane e uarongorongo nakoina imwina. (IRom 12:20, 21) E ngae ngkana e teimatoa ni kaaitaraira, ma n te taina e kona n riki bwa tarira n te onimaki. (IKar. 1:13, 14) N aki ongeia bwa e kan ongora n te koaua ke e aki, ma ti neboa Iehova ao ni katamaroaa ara angareirei ngkana ti teimatoa n taubaang n aki kauntaeka ao ni kaotiota te rau.—2Kor. 6:3.